ట్రాన్స్ జెండర్లకు తెలంగాణ సర్కార్ మరో శుభవార్త..ఇక నుంచి అక్కడ ఫ్రీ ఆపరేషన్స్..పూర్తి వివరాలివే..

ట్రాన్స్ జెండర్లకు తెలంగాణ సర్కార్ మరో శుభవార్త చెప్పింది. వాళ్లకు ఉన్న ప్రత్యేకమైన ఆరోగ్య పరిస్థితుల నేపథ్యంలో ప్రభుత్వం కీలక నిర్ణయం తీసుకుంది. ట్రాన్స్ జెండర్లకు మెరుగైన వైద్యం కోసం మానవతా దృక్పధంతో ప్రభుత్వ ఆలోచన వారికి వెలుగు రేఖగా మారింది.

అంతగా అనుభవం లేని వైద్యుల చేతుల్లో లింగమార్పిడి సర్జరీలు చేయించుకొని ప్రాణాలు కోల్పోతున్న ట్రాన్స్ జెండర్ల కోసం వరంగల్ ఎంజిఎం లో సూపర్ స్పెషాలిటీ క్లినిక్ నెలకొల్పింది. విలువైన ట్రాన్స్ జెండర్ల ప్రాణాల కోసం అరుదైన కార్యక్రమం చేపట్టింది.

ఇటీవల ట్రాన్స్ జెండర్లకు ప్రత్యేక వైద్యం అందించడానికి ఎంజిఎం మహాత్మగాంధీ మెమోరియల్ హాస్పిటల్ లో ఆగష్టు 2న ప్రత్యేక క్లినిక్ ప్రారంభించారు. ప్రతీ మంగళవారం ఈ క్లినిక్ లో వారికీ ఓపి సేవలు అందిస్తున్నారు. యూరాలజీ, మానసిక సమస్యలు, జనరల్ సర్జరీలు వంటి సేవలు ఇక్కడ లభిస్తున్నాయి.

కాగా ప్రత్యేకమైన ఆరోగ్య పరిస్థితులు ఉండే వారీగా తమను గుర్తించాలని ట్రాన్స్ జెండర్స్ అనేక విజ్ఞప్తులు చేయగా..ఆగష్టు 19న రాష్ట్ర ట్రాన్స్ జెండర్ వెల్ఫేర్ బోర్డు ఏర్పాటు చేస్తూ జీవో 21ను రిలీజ్ చేశారు.

ప్రస్తుతం వీరి కోసం ప్రత్యేక సంక్షేమ బోర్డు ఏర్పాటు చేసి రూ.2 కోట్లు కేటాయించారు. ప్రధానంగా ట్రాన్స్ జెండర్స్ కు ఆరోగ్య భద్రత, వివక్ష లేకుండా మెరుగైన వైద్యం అందించాలని చూస్తుంది. ఈ క్రమంలోనే కొత్తగా క్లినిక్ ను ఏర్పాటు చేసింది.

కాగా వరంగల్ ఎంజిఎం ఆసుపత్రిలో ట్రాన్స్ జెండర్ క్లినిక్ లో సేవలను క్రమంగా విస్తరించనున్నారు. భవిష్యత్తులో ఇది ఓ ప్రత్యేక విభాగంగా మారే అవకాశం ఉంది. దీనితో ట్రాన్స్ జెండర్లకు వివక్ష లేకుండా చికిత్చ అందనుంది.

ఇక సమగ్ర కుటుంబ సర్వే 2014 ప్రకారం తెలంగాణలో వీరి సంఖ్యా దాదాపు 60 వేలు ఉన్నట్టు అంచనా. అయితే ఇప్పటికి వీరి జనాభా 90 వేలు వరకు ఉండవచ్చు. సర్కార్ నిర్ణయంతో వీరందరికి ఊరట కలగనుంది.

ప్రస్తుతం నిర్వహిస్తున్న సేవల ఆధారంగా డేటా సేకరించి ఈ సమాచారం ఆధారంగా రానున్న రోజుల్లో మరిన్ని సేవలు అందించనున్నారు. అలాగే మరిన్ని పరికరాలు, ఆపరేషన్ థియేటర్ల కోసం ప్రభుత్వాన్ని అభ్యర్ధించనున్నారు. దీనితో ట్రాన్స్ జెండర్లకు కూడా మెరుగైన వైద్య సేవలు అందనున్నాయి.