Agriculture Reform Acts: వ్యవసాయ చట్టాలపై తెలంగాణలో ప్రజాభిప్రాయమేంటి?.. న్యూస్18 సర్వే

కొత్త వ్యవసాయ చట్టాలపై దేశవ్యాప్తంగా హాట్ హాట్‌గా జరుగుతోంది. ఈ చట్టాలపై రాజకీయ దుమారం కూడా కొనసాగుతోంది. ఢిల్లీ శివారులో వేలాది మంది రైతులు 25 రోజులుగా ఆందోళనలు చేస్తున్నారు. ఐతే ఈ ఆందోళనల వెనక రాజకీయ కారణాలు ఉన్నాయని.. విపక్షాల ఉచ్చులో పడవొద్దని రైతులకు ప్రభుత్వం సూచిస్తోంది. అంతేకాదు రైతుల ఆందోళలు సంఘ విద్రోహ శక్తుల చేతుల్లోకి వెళ్లాయని స్పష్టం చేసింది. ఈ క్రమంలో అసలు కొత్త చట్టాలపై క్షేత్రస్థాయిలో రైతులు ఏమనుకుంటున్నారు? కొత్త చట్టాలను సమర్థిస్తున్నారా? వ్యతిరేకిస్తున్నారా? అని న్యూస్ 18 తెలుసుకునే ప్రయత్నం చేసింది. కాశ్మీర్ నుంచి కన్యాకుమారి వరకు 22 రాష్ట్రాలు, కేంద్ర పాలిత ప్రాంతాలకు చెందిన 2412 మంది ఓపీనియన్ సర్వేలో పాల్గొన్నారు. రైతులు, సాధారణ ప్రజలతో న్యూస్ 18 రిపోర్టర్లు మాట్లాడారు. వారికి 12 ప్రశ్నలు సంధించి సమాధానాలు తెలుసుకున్నారు. తెలంగాణలో ప్రజలు ఏమన్నారో ఇక్కడ చూడండి.

కొత్త చట్టాల ద్వారా రైతుల ఉత్పత్తులకు మంచి ధర లభిస్తుందని మీరు భావిస్తున్నారా? అని అడిగితే... కొత్త చట్టాల ద్వారా రైతు ఉత్పత్తులకు మంచి ధర లభిస్తుందని 62.3 శాతం మంది తెలిపారు. లభించదని 35.1 శాతం మంది తెలిపారు.

మండీల బయట తమ ఉత్పత్తులను అమ్ముకునేందుకు రైతులకు అవకాశం కల్పించడాన్ని మీరు సమర్థిస్తారా? అని అడగగా... 77.9 శాతం మంది దీన్ని సమర్థించారు. 22.1 శాతం మంది సమర్థించలేదు.

మీరు వ్యవసాయరంగంలో సంస్కరణలు, భారత వ్యవసాయాన్ని ఆధునీకరించడాన్ని సమర్థిస్తారా? ప్రశ్నించగా... సర్వేలో పాల్గొన్న వారిలో 77.9 శాతం మంది వ్యవసాయరంగంలో సంస్కరణలను సమర్థించారు. 22.1 శాతం మంది సమర్థించలేదు.

వరి, గోధుమ సహా 20కి పైగా పంట ఉత్పత్తులకు మద్దతు ధర యథాతధంగా కొనసాగిస్తామని ప్రధాని నరేంద్ర మోదీ హామీ ఇచ్చిన విషయం మీకు తెలుసా? అని ప్రశ్నిస్తే... ప్రధాని మోదీ హామీ ఇచ్చిన విషయం తెలుసని 53.2 శాతం మంది చెప్పగా.. 46.8 శాతం మంది తెలియదని అన్నారు.

కనీస మద్దతు ధర వ్యవస్థను కొనసాగిస్తామని ప్రభుత్వం రాతపూర్వక హామీ ఇస్తే, దానిని మీరు సమర్థిస్తారా? అని ప్రశ్నించగా... ప్రభుత్వం ఇచ్చే రాతపూర్వక హామీని 49.4 శాతం మంది సమర్థించారు. 19.5 శాతం మంది వ్యతిరేకించారు. 31.2 శాతం మంది కచ్చితంగా చెప్పలేమన్నారు.

ప్రస్తుత విపక్ష పార్టీలు గతంలో అధికారంలో ఉన్న సమయంలో ఇలాంటి వ్యవసాయ చట్టాలనే సమర్థించాయన్న విషయం మీకు తెలుసా? అని ప్రశ్నించగా... ఈ విషయం తమకు తెలుసని 62.3 శాతం మంది చెప్పగా... తెలియదని 37.7 శాతం మంది చెప్పారు.

ఢిల్లీలో కాలుష్యానికి కారణమవుతున్న పంట వ్యర్థాలను తగులబెట్టడాన్ని నిషేధిస్తూ.. కేంద్రం తెచ్చిన ఆర్డినెన్స్‌ను వెనక్కి తీసుకోవాలని రైతులు డిమాండ్ చేస్తున్నారు. దీన్ని మీరు సమర్థిస్తారా? అని ప్రశ్నించగా... 0 శాతం మంది సమర్థించేది లేదని చెప్పారు. ఢిల్లీలో పొల్యూషన్ పెద్ద సమస్య కాదన్నారు. 100 శాతం మంది రైతుల డిమాండ్ సరైనది కాదన్నారు.

మూడు వ్యవసాయ చట్టాలను రద్దు చేయాలని ఢిల్లీ బయట ఆందోళన చేస్తున్న రైతులు డిమాండ్ చేస్తున్నారు? మరే ఇతర ప్రతిపాదనలకు ఒప్పుకోమని అంటున్నారు? దీన్ని మీరు సమర్థిస్తారా? అని అడిగితే... 35.1 శాతం మంది దీన్ని సమర్థించారు. 64.9 శాతం మంది రైతులు రాజీకి రావాలని సూచిస్తున్నారు.

వ్యవసాయాన్ని ఆధునీకరిస్తాయనీ, రైతులకు ప్రయోజనం కలిగిస్తాయని కేంద్రం చెబుతున్న మూడు వ్యవసాయ సంస్కరణ చట్టాలకు మీరు మద్దతు ఇస్తున్నారా అంటే... 54.6 శాతం మంది కచ్చితంగా ఇస్తున్నామన్నారు. 19.5 శాతం మంది ఇవ్వట్లేదని చెప్పారు. 26 శాతం మంది చెప్పలేమన్నారు.

ప్రభుత్వ ఆధ్వర్యంలో నడిచే మండీలకు బయట తమ ఉత్పత్తులను అమ్ముకునే స్వేచ్ఛ రైతులకు లభించిందన్న విషయం మీకు తెలుసా? అని అడిగితే... అవును. కొత్త చట్టాల ద్వారా రైతులకు ఎన్నో అవకాశాలు లభిస్తాయని 62.3 శాతం మంది మంది అభిప్రాయపడ్డారు. 37.7 శాతం మంది ఈ విషయం తమకు తెలియదన్నారు.