Hyderabad Metro: ప్రయాణికులకు హైదరాబాద్ మెట్రో బంపర్ ఆఫర్.. సువర్ణ ఆఫర్ 2021 ప్రకటించిన మెట్రో.. పూర్తి వివరాలు ఇవే..

ప్రయాణికులకు హైదరాబాద్ మెట్రో సంస్థ గుడ్ న్యూస్ చెప్పింది. పండగల సీజన్‌ నేపథ్యంలో మెట్రో సువర్ణ ఆఫర్ 2021ని తీసుకొచ్చింది. ఈ ఆఫర్‌కు సంబంధించిన వివరాలను మెట్రో సంస్థ ఒక ప్రకటనలో తెలిపింది.

ఈ ఆఫర్‌లో ట్రిప్‌ పాస్‌, గ్రీన్‌ లైన్‌పై ప్రత్యేక ధర, మెట్రో ప్రయాణీకుల కోసం లక్కీ డ్రా వంటివి ఉన్నాయి. ప్రయాణికుల కోసం నూతన ఆఫర్లలతో మెట్రో సువర్ణ ఆఫర్‌ను తిరిగి పరిచయం చేస్తున్నందుకు సంతోషంగా ఉందని హైదరాబాద్ మెట్రో ఎండీ ఎన్వీఎస్ రెడ్డి తెలిపారు.

ట్రిప్‌ పాస్‌ ఆఫర్‌.. మెట్రో ప్రయాణీకులు తమ ప్రయాణ అవసరాలకు తగినట్లుగా ఏదైనా ఫేర్‌తో 30 ట్రిప్పులను కేవలం 20 ట్రిప్పుల ధర చెల్లించి కొనుగోలు చేయవచ్చు. ఈ ట్రిప్పులను 45రోజుల లోపు వినియోగించుకోవాల్సి ఉంటుంది. ఈ ఆఫర్‌ కేవలం మెట్రో స్మార్ట్‌ కార్డ్‌పై మాత్రమే వర్తిస్తుంది.

గ్రీన్‌ లైన్‌పై ప్రత్యేక ఫేర్‌ ఆఫర్‌.. గ్రీన్‌ లైన్‌(ఎంజీబీఎస్‌, జెబీఎస్‌ పరేడ్‌ గ్రౌండ్స్‌ మెట్రో స్టేషన్‌ల మధ్య) ప్రయాణించే ప్రయాణీకులు ప్రతి ట్రిప్‌కూ గరిష్టంగా 15 రూపాయలు చెల్లించి ఎక్కడికైనా ప్రయాణించవచ్చు.

నెలవారీ లక్కీ డ్రా.. అక్టోబర్‌ 2021 నుంచి ఏప్రిల్‌ 2022 వరకూ ఆకర్షణీయమైన బహుమతులను ప్రతినెలా గెలుచుకునే అవకాశం మెట్రో సంస్థ ప్రయాణీకులకు కల్పిస్తుంది. ప్రతి నెలా ఐదుగురు విజేతలను లక్కీడ్రా సీఎస్‌సీ కార్డు వినియోగదారుల నుంచి ఎంపిక చేస్తారు. వీరు ఓ క్యాలెండర్‌ నెలలో కనీసం 20 సార్లు ప్రయాణించాల్సి ఉంటుంది.

మెట్రో ప్రయాణీకులు ఈ ఆఫర్‌ను 18 అక్టోబర్‌ 2021 నుంచి 15 జనవరి 2022 మధ్య వినియోగించుకోవడానికి అవకాశం కల్పిస్తున్నారు. ఈ ఆఫర్‌కు సంబంధించిన మరిన్ని వివరాల కోసం సమీపంలోని మెట్రో స్టేషన్‌లను సంప్రదించాలని మెట్రో అధికారులు సూచించారు.