World Test Championship ఫైనల్ చేరాలంటే టీమిండియా లెక్కలేంటి..? భారత్ ముందు ఉన్న సవాళ్లు ఇవే..!

ఐసీసీ వరల్డ్ టెస్ట్ చాంపియన్‌షిప్ 2021-23 (WTC 2021-23 Final) ఫైనల్ రేస్ రసవత్తరంగా మారింది. కీలకమైన వరల్డ్ టెస్ట్ ఛాంపియన్షిప్ ఫైనల్ (WTC 2021-23 Final) కు ఈ సారి టీమిండియా(Team India) చేరడమే క్లిష్టంగా మారింది. కష్టపడితే మాత్రం ఛాన్సులుంటాయ్. ప్రస్తుతం పాయింట్స్ టేబుల్ లో టీమిండియా మూడో స్థానంలో కొనసాగుతోంది.

ఇప్పటి వరకు 58.33 విజయాల శాతంతో పాటు 77 పాయింట్స్ సాధించిన భారత్.. వరుసగా రెండోసారి ఫైనల్ చేరాలంటే అప్‌కమింగ్ సిరీస్‌లన్నీ గెలవాల్సిన పరిస్థితి ఏర్పడింది. ప్రస్తుతం ఆస్ట్రేలియా టాప్ ప్లేసులో కొనసాగుతుండగా.. రెండో స్థానంలో దక్షిణాఫ్రికా ఉంది.

గత వరల్డ్ టెస్ట్ చాంపియన్‌షిప్ ఫస్ట్ ఎడిషన్‌లో ఫైనల్ చేరిన టీమిండియా.. తృటిలో విశ్వవిజేతగా నిలిచే అవకాశాన్ని చేజార్చుకుంది. మాజీ కెప్టెన్ విరాట్ కోహ్లీ సారథ్యంలో అద్భుత విజయాలు అందుకొని ఫైనల్ చేరిన భారత జట్టు.. ఇంగ్లండ్ వేదికగా న్యూజిలాండ్‌తో జరిగిన తుది పోరులో ఓటమిపాలైంది.

ఈ క్రమంలోనే ఈ సారైనా వరల్డ్ టెస్ట్ ఛాంపియన్షిప్ టైటిల్ తమ ఖాతాలో వేసుకోవాలని టీమిండియా ఉవ్విల్లూరుతోంది. అయితే.. ఈ ఏడాది సౌతాఫ్రికా పర్యటనలో ఎదురైన ఓటములు.. టీమిండియా అవకాశాల్ని దెబ్బతీశాయ్. సౌతాఫ్రికా చేతిలో ఓటములతో టీమిండియా లెక్కలన్నీ ఒక్కసారిగా మారిపోయాయ్.

ఆస్ట్రేలియా 75 శాతం విజయాలతో అగ్రస్థానంలో ఉంది. ఇక, డబ్ల్యూటీసీ 2021-23 ఎడిషన్‌లో టీమిండియా ఫైనల్ చేరాలంటే ఈ సీజన్‌లో మిగిలి ఉన్న ఏడు మ్యాచ్‌ల్లో అద్భుత ప్రదర్శన కనబరచడంతో పాటు మిగతా జట్ల జయాపజయాలపై ఆధారపడాల్సిన పరిస్థితి తెచ్చుకుంది. సౌతాఫ్రికా గడ్డపై టెస్ట్ సిరీస్ ఓటమి భారత జట్టు అవకాశాలను సంక్లిష్టం చేసింది.

ఇప్పటి వరకు ఇంగ్లండ్‌, న్యూజిలాండ్‌, సౌతాఫ్రికా, శ్రీలంక జట్లతో జరిగిన సిరీస్‌ల్లో 6 విజయాలు, 2 డ్రా చేసుకున్న టీమిండియా డబ్ల్యూటీసీ పాయింట్ల పట్టికలో మూడో స్థానంలో ఉంది. ఇక 2021-23 షెడ్యూల్‌లో భాగంగా ఇంకా ఇంగ్లండ్‌లో ఒక టెస్టు, బంగ్లాదేశ్‌లో రెండు, స్వదేశంలో ఆస్ట్రేలియాతో నాలుగు టెస్టులు టీమిండియా ఆడాల్సి ఉంది.

ఈ సీజన్‌లో ఆడనున్న ఏడింటిలో ఫైనల్ చేరాలంటే కచ్చితంగా ఐదింటిలో రోహిత్‌ సేన అవకాశాలు మెరుగుపడే అవకాశం ఉంది. అయితే, ఇంగ్లండ్ లో జరిగే టెస్ట్.. ఆస్ట్రేలియాతో స్వదేశంలో నాలుగు టెస్టులు మాత్రం టీమిండియాకు సవాల్ విసరనున్నాయ్.

ఆస్ట్రేలియా బలమైన జట్టు. పాకిస్తాన్‌, శ్రీలంకతో టెస్టు సిరీస్‌ ఆడటం వాళ్లకు కలిసొచ్చినట్టే. ఉపఖండ పరిస్థితులను చక్కగా అర్థం చేసుకోవడానికి టీమిండియాతో సిరీస్‌కు ముందు పాక్‌, శ్రీలంక పర్యటన వారికి మేలు చేస్తుంది. ఆస్ట్రేలియా టీమ్ కు నాథన్‌ లియాన్‌, స్వెప్సన్‌ రూపంలో ఇద్దరు స్పిన్నర్లు ఉన్నారు. అయితే, ఇంగ్లండ్‌తో మ్యాచ్‌ మినహా మిగతావన్నీ ఉపఖండంలోనే ఆడటం భారత్‌కు కలిసి వచ్చే అంశం.