Hardik Pandya : కెప్టెన్ గా ధోని, కోహ్లీ, రోహిత్ లకు సాధ్యం కాని పనిని.. సారథిగా తొలి మ్యాచ్ లోనే సాధించిన హార్దిక్

సీనియర్లు ఇంగ్లండ్ (England)తో జూలై 1 నుంచి ఆరంభమయ్యే టెస్టు మ్యాచ్ కోసం ప్రిపరేషన్ లో ఉండగా.. కుర్రాలతో కూడిన టీమిండియా (Team India) ఐర్లాండ్ (Ireland)తో రెండు మ్యాచ్ ల టి20 సిరీస్ ఆడుతోంది.

ఇక ఈ సిరీస్ కు హార్దిక్ పాండ్యా (Hardik pandya)ను కెప్టెన్ గా నియమించింది బీసీసీఐ (BCCI). ఆదివారం జరిగిన తొలి టి20 హార్దిక్ పాండ్యా టీమిండియాకు నాయకుడిగా తొలిసారి బరిలోకి దిగగా.. భారత్ 7 వికెట్ల తేడాతో ఘనవిజయం సాధించింది.

ఈ మ్యాచ్ లో హార్దిక్ పాండ్యా అరుదైన రికార్డును సొంతం చేసుకున్నాడు. టి20ల్లో టీమిండియా కెప్టెన్ గా ఉంటూ వికెట్ తీసిన తొలి భారత సారథిగా హార్దిక్ నిలిచాడు.

ఈ మ్యాచ్ లో రెండు ఓవర్లు వేసిన హార్దిక్ ఒక వికెట్ ను తన ఖాతాలో వేసుకున్నాడు. గతంలో భారత జట్టుకు ధోని, విరాట్ కోహ్లీ, సురేశ్ రైనా, రహానే, రోహిత్ శర్మ, వీరేంద్ర సెహ్వాగ్, శిఖర్ ధావన్, రిషభ్ పంత్ లు టి20ల్లో భారత్ కు నాయకత్వం వహించారు.

అయితే వీరిలో ఎవరూ కూడా కెప్టెన్ గా ఉంటూ వికెట్ తీయలేదు. తాజాగా హార్దిక్ పాండ్యా కెప్టెన్ గా తన తొలి మ్యాచ్ లోనే ఆ ఘనతను సాధించాడు. వర్షం అంతరాయం కలిగించడంతో ఈ మ్యాచ్ ను ఇన్నింగ్స్ కు 12 ఓవర్ల చొప్పున కుదించారు.

ఐర్లాండ్ జట్టు 12 ఓవర్లలో 4 వికెట్లకు 108 పరుగులు చేసింది. హ్యారీ హెక్టార్ (33 బంతుల్లో 64 నాటౌట్; 6 ఫోర్లు, 3 సిక్సర్లు) మెరుపు ఇన్నింగ్స్ ఆడాడు. అనంతరం ఛేదనలో భారత్ 9.2 ఓవర్లలోనే కేవలం 3 వికెట్లు మాత్రమే నష్టపోయి 111 పరుగులు చేసి గెలుపొందింది. ఓపెనర్ గా వచ్చిన దీపక్ హుడా (29 బంతుల్లో 47; 6 ఫోర్లు నాటౌట్, 2 సిక్సర్లు) జట్టుకు విజయాన్ని అందించాడు.