T20 World cup 2024 : మరింత రసవత్తరంగా 2024 టి20 ప్రపంచకప్.. కొత్త ఫార్మాట్ రూల్స్ ఇవే

ఆస్ట్రేలియా (Australia) వేదికగా 2022 టి20 ప్రపంచకప్ (T20 World Cup) ముగిసింది. ఫైనల్లో పాకిస్తాన్ (Pakistan)పై నెగ్గిన ఇంగ్లండ్ (England) విశ్వవిజేతగా నిలిచింది. 2024లో అమెరికా, వెస్టిండీస్ వేదికగా టి20 ప్రపంచకప్ జరగనుంది.

అయితే ఈసారి జరిగే టి20 ప్రపంచకప్ కొత్త ఫార్మాట్ లో జరగనుంది. ఈ ఏడాది జరిగిన ఫార్మాట్ కు ఇది పూర్తిగా భిన్నంగా ఉండనుంది. కొత్త ఫార్మాట్ లో ప్రపంచకప్ మరింత రసవత్తరంగా జరగనుంది.

ఈ ఏడాది జరిగిన టి20 ప్రపంచకప్ లో 16 జట్లు పాల్గొనగా.. మొదట క్వాలిఫయింగ్ రౌండ్స్.. ఆ తర్వాత సూపర్ 12 దశ జరిగింది. అయితే 2024లో జరిగే ప్రపంచకప్ లో సూపర్ 12తో పాటు క్వాలిఫయింగ్ రౌండ్స్ ను తీసేశారు.

అంతేకాకుండా 2024లో 20 జట్లు పాల్గొంటాయి. మొదట గ్రూప్ దశ జరగనుంది. ఆ తర్వాత సూపర్ 8 దశ.. సెమీఫైనల్స్.. ఫైనల్స్ జరగనున్నాయి.

గ్రూప్ దశలో 20 జట్లను నాలుగు జట్ల చొప్పున 5 గ్రూపులుగా విభజిస్తారు. ప్రతి జట్టు కూడా తమ గ్రూప్ లో మిగిలిన నాలుగు జట్లతో ఒక్కో మ్యాచ్ ఆడుతుంది. ప్రతి గ్రూప్ లో టాప్ 2లో నిలిచిన మొత్తం 8 జట్లు సూపర్ ‘8’ దశకు అర్హత సాధిస్తాయి.

సూపర్ 8 దశలో నాలుగు జట్ల చొప్పున రెండు గ్రూపులుగా విభజిస్తారు. ఇందులో ప్రతి గ్రూప్ లోనూ ఒక జట్టు మిగిలిన మూడు జట్లతో ఒక్కో మ్యాచ్ ఆడుతుంది. పోటీలు అనంతరం రెండు గ్రూపుల్లోనూ టాప్ 2లో నిలిచిన మొత్తం 4 జట్లు సెమీస్ కు చేరతాయి.

అనంతరం సెమీస్.. ఫైనల్స్ జరుగుతాయి. ఇక ఇప్పటికే 12 జట్లు అర్హత సాధించాయి. ఈ ఏడాది జరిగిన టి20 ప్రపంచకప్ లో టాప్ 8లో నిలిచిన ఇంగ్లండ్, పాకిస్తాన్, న్యూజిలాండ్, భారత్, సౌతాఫ్రికా, ఆస్ట్రేలియా, శ్రీలంక, నెదర్లాండ్స్ జట్లు నేరుగా 2024 ప్రపంచకప్ కు అర్హత సాధించాయి.

బంగ్లాదేశ్, అఫ్గానిస్తాన్ జట్లు తమ ర్యాంకులు ఆధారంగా ప్రపంచకప్ కు అర్హత సాధించాయి. ఆతిథ్య దేశాలుగా అమెరికా, వెస్టిండీస్ జట్లు కూడా మెగా టోర్నీకి అర్హత సాధించాయి. ఇక మిగిలిన 8 జట్లు వివిధ క్వాలిఫయింగ్ టోర్నీల ద్వారా 2024 ప్రపంచకప్ కు అర్హత సాధించనున్నాయి.