IND vs PAK : టీమిండియా ప్లేయింగ్ ఎలెవెన్ పై గంభీర్ వితండ వాదం.. ఆ ఇద్దరు వద్దంటూ షాకింగ్ కామెంట్స్

టి20 ప్రపంచకప్ (T20 World Cup) 2022లో అక్టోబర్ 22 నుంచి సూపర్ 12 దశ ఆరంభం కానుంది. అసలైన సమరం మొదలు కానుండటంతో మెగా టోర్నీపై ఆసక్తి పెరగనుంది.

ఇక టీమిండియా తన తొలి మ్యాచ్ ను అక్టోబర్ 23 (ఆదివారం) చిరకాల ప్రత్యర్థి పాకిస్తాన్ తో తలపడనుంది. ఇక ఈ మ్యాచ్ కోసం ఇప్పటికే భారత్ మెల్ బోర్న్ కు చేరుకుని ప్రాక్టీస్ మొదలు పెట్టింది.

ఇక ఈ మ్యాచ్ లో బరిలోకి దిగే జట్టుపై భారత మాజీ కెప్టెన్ గౌతం గంభీర్ ఆసక్తికర వ్యాఖ్యలు చేశాడు. ప్లేయింగ్ ఎలెవెన్ ఎలా ఉండాలనే దానిపై ఆసక్తికర కామెంట్స్ చేశాడు.

పాకిస్తాన్ తో జరిగే మ్యాచ్ కోసం దినేశ్ కార్తీక్, భువనేశ్వర్ కుమార్ లను పక్కన పెట్టాలని సూచించాడు. తానైతే భువనేశ్వర్ కుమార్, దినేశ్ కార్తీక్ లను ఆడించనంటూ షాకింగ్ కామెంట్స్ చేశాడు.

కేవలం 10 బంతులను మాత్రమే ఆడే కార్తీక్ ను జట్టులోకి తీసుకోవడం మంచిది కాదని పేర్కొన్నాడు. అతడి స్థానంలో పంత్ ను తీసుకుంటేనే మంచిదని తెలిపాడు.

ఇక అదే సమయంలో భువనేశ్వర్ కుమార్ స్థానంలో షమీకి చోటు ఇవ్వాలని తన అభిప్రాయాన్ని తెలిపాడు. హర్షల్ పటేల్, అర్ష్ దీప్ సింగ్ లను కొనసాగించాలని హితవు పలికాడు.

మొత్తంగా కార్తీక్, భువనేశ్వర్ లను తప్పించి.. వారి స్థానాల్లో పంత్, షమీలను తీసుకుంటే జట్టుకు మంచిదని తన అభిప్రాయాన్ని వ్యక్తం చేశాడు. ఇక టి20ల్లో పంత్ ఇప్పటి వరకు తనను తాను నిరూపించుకోలేకపోయాడు. ఓపెనర్ గా.. ఫినిషర్ గా.. మిడిలార్డర్ లో ఎక్కడ పంపినా అతడి విఫలం అయ్యాడు.

ఇటీవల వెస్ట్రన్ ఆస్ట్రేలియాతో జరిగిన రెండు వార్మప్ మ్యాచ్ ల్లోనూ ఓపెనర్ గా వెళ్లిన పంత్ నిరాశ పరిచాడు. అటువంటి పంత్ ను జట్టులోకి తీసుకోవాలని గంభీర్ చెప్పడం ఎంటో అని క్రికెట్ అభిమానులు చర్చించుకుంటున్నారు.