T20 World Cup 2022 : ఇలా జరిగితే ఫైనల్లో ఇండియాతో పాకిస్తాన్ తలపడటం పక్కా.. మరి జరుగుతుందా?

టి20 ప్రపంచకప్ (T20 World Cup) 2022 అంతిమ ఘట్టానికి చేరుకుంది. నవంబర్ 6తో సూపర్ 12 పోటీలకు తెరపడనుంది. రెండు గ్రూపుల్లో టాప్ 2లో నిలిచిన మొత్తం నాలుగు జట్లు సెమీఫైనల్ కు చేరుకుంటాయి.

ఇప్పటికే గ్రూప్ ‘1’ నుంచి న్యూజిలాండ్ చేరుకోగా.. శనివారం రోజు ఇంగ్లండ్, ఆస్ట్రేలియా జట్లలో ఒకటి సెమీఫైనల్ కు చేరుకుంటుంది. ఇక ఆదివారం (నవంబర్ 6న) గ్రూప్ ‘2’ నుంచి సెమీస్ చేరే జట్లు ఏవో తెలుస్తుంది.

ఐసీసీ టోర్నీల్లో భారత్, పాకిస్తాన్ జట్ల మధ్య మ్యాచ్ అంటే ఉండే కిక్కే వేరు. ఈ దాయాది దేశాల మధ్య మ్యాచ్ జరుగుతుంటే చేసేందుకు అభిమానులు ఎగబడతారు. ఈ టోర్నీలోనూ వీరిద్దరూ సూపర్ 12 దశలో పోటీ పడగా అందులో భారత్ నెగ్గింది.

ప్రస్తుతం భారత్, పాకిస్తాన్ జట్లు సెమీస్ రేసులో ఉన్నాయి. అయితే భారత్ తన ఆఖరి పోరులో నెగ్గితే నేరుగా సెమీస్ చేరుతుంది. అయితే పాకిస్తాన్ పరిస్థితి అలా లేదు. ఆఖరి మ్యాచ్ లో బంగ్లాదేశ్ పై పాకిస్తాన్ నెగ్గినా ఇతర జట్ల ఫలితాలపై ఆధారపడాల్సి ఉంటుంది.

ఇక గ్రూప్ ‘2’ నుంచి భారత్, పాకిస్తాన్ జట్లు సెమీస్ చేరాలంటే ఏం జరగాలో ఇప్పుడు చూద్దాం. ప్రస్తుతం భారత్ 6 పాయింట్లతో టాపర్ గా ఉంది. సౌతాఫ్రికా 5 పాయింట్లతో రెండో స్థానంలో.. పాకిస్తాన్ 4 పాయింట్లతో మూడో స్థానంలో ఉంది.

భారత్ తన ఆఖరి మ్యాచ్ లో జింబాబ్వేపై నెగ్గినా లేదా ఆ మ్యాచ్ వర్షంతో రద్దయినా సెమీస్ కు చేరుకుంటుంది. ఇక భారత్ తో పాటు పాకిస్తాన్ సెమీస్ చేరాలంటే మాత్రం సౌతాఫ్రికా తన ఆఖరి మ్యాచ్ లో నెదర్లాండ్స్ చేతిలో ఓడిపోవాల్సి ఉంటుంది.

ఆ తర్వాత బంగ్లాదేశ్ పై పాకిస్తాన్ నెగ్గాలి. అటువంటి సందర్భంలో భారత్ గ్రూప్ టాపర్ హోదాలో.. పాకిస్తాన్ 6 పాయింట్లతో గ్రూప్ రన్నరప్ హోదాలో సెమీఫైనల్ కు చేరుకుంటాయి. ఇక సెమీఫైనల్లో గ్రూప్ ‘1’ జట్లతో జరిగే మ్యాచ్ ల్లో భారత్, పాక్ నెగ్గితే ఫైనల్లో ఫైనల్లో దాయాది దేశాలు తలపడటం ఖాయం.

బలమైన దక్షిణాఫ్రికాను నెదర్లాండ్స్ ఓడించాలనుకోవడం కాస్త ఆత్యాశే అవుతుంది. కానీ, టి20 ఫార్మాట్ లో ఎప్పుడు ఏం జరుగుతుందో చెప్పడం చాలా కష్టం. బలహీన జట్లు కూడా తమదైన రోజున పెద్ద జట్లకు షాక్ ఇవ్వడం ఖాయం.

ఈ ప్రపంచకప్ లో ఇప్పటికే ఇలాంటి సంచలనాలు ఇప్పటికే నమోదయ్యాయి కూడా. శ్రీలంకపై నమీబియా.. వెస్టిండీస్ పై స్కాట్లాండ్.. పాక్ పై జింబాబ్వే.. ఇంగ్లండ్ పై ఐర్లాండ్ జట్లు సంచలన విజయాలను నమోదు చేసిన సంగతి మరవకూడదు. ఈ క్రమంలో సఫారీ జట్టుపై నెదర్లాండ్స్ విజయావకాశాలను కొట్టి పారేయలేం.