Ranji Trophy 2023 : అన్నొచ్చాడు.. ఇరగదీశాడు.. అక్షర్, సుందర్ లు తట్టా బుట్టా సర్దుకోవాల్సిందేనా?

గతేడాది జరిగిన ఆసియాకప్ (Asia cup 2022) టోర్నీ సందర్భంగా టీమిండియా (Team India) ఆల్ రౌండర్ రవీంద్ర జడేజా (Ravindra Jadeja) మోకాలి గాయం బారిన పడ్డ సంగతి తెలిసిందే. ఇండోర్ లో సర్ఫింగ్ చేస్తూ మోకాలి గాయం బారిన పడ్డాడు.

దాంతో రవీంద్ర జడేజా ఆసియా కప్ తో పాటు టి20 ప్రపంచకప్ కు కూడా దూరమయ్యాడు. మోకాలికి సర్జరీ చేయించుకున్న అతడు దాదాపుగా ఐదు నెలల పాటు ఆటకు దూరమయ్యాడు.

రవీంద్ర జడేజా గైర్హాజరీలో జట్టులోకి వచ్చిన అక్షర్ పటేల్ అద్భుత ప్రదర్శన చేశాడు. అటు బౌలింగ్ లో ఇటు బ్యాటింగ్ లో అద్భుత ఆటతీరు కనబరిచాడు. అయితే టి20 ప్రపంచకప్ లో మాత్రం అక్షర్ ఆకట్టుకోలేకపోయాడు.

ప్రస్తుతం జడేజా స్థానం అక్షర్ పటేల్ దే. మూడు ఫార్మాట్లలోనూ అక్షర్ మంచి ప్రదర్శన చేస్తున్నాడు. అయితే గాయం నుంచి కోలుకున్న రవీంద్ర జడేజా ఆస్ట్రేలియాతో జరిగే తొలి రెండు టెస్టులకు ఎంపికయ్యాడు.

దాని కంటే ముందు ఈ లెఫ్టాండ్ ఆల్ రౌండర్ రంజీ ట్రోఫీ బరిలో నిలిచాడు. సౌరాష్ట్ర కెప్టెన్ గా బరిలోకి దిగిన జడేజా తమిళనాడుపై అద్భుత ప్రదర్శన చేశాడు.

బౌలింగ్ లో 8 వికెట్లతో రాణించాడు. తొలి ఇన్నింగ్స్ లో ఏకంగా 7 వికెట్లు తీసిన జడేజా.. రెండో ఇన్నింగ్స్ లో ఒక వికెట్ తీశాడు. ఈ క్రమంలో తన కమ్ బ్యాక్ ను ఘనంగా చాటాడు.

అయితే బ్యాటింగ్ లో మాత్రం రవీంద్ర జడేజా ఆకట్టుకోలేకపోయాడు. రెండు ఇన్నింగ్స్ ల్లోనూ కలిపి 40 పరుగులు మాత్రమే చేశాడు. ఇక ఈ మ్యాచ్ లో రవీంద్ర జడేజా బౌలింగ్ మాయాజాలం ప్రదర్శించినా విజయం తమిళనాడునే వరించింది.

జడేజా సూపర్ బౌలింగ్ తో మెరవడంతో.. ఆస్ట్రేలియాతో జరిగే టెస్టు సిరీస్ లో అతడి స్థానం పక్కా అని తేలిపోయింది. టెస్టుతో పాటు వన్డేల్లోనూ పునరాగమనం చేయడం ఖాయంగా కనిపిస్తుంది. అదే జరిగితే అక్షర్ పటేల్ తో పాటు వాషింగ్టన్ సుందర్ కూడా బెంచ్ కే పరిమితం కావాల్సి వస్తుంది.