IPL Auction 2023 Live Updates: ఐపీఎల్ మినీ వేలంలో గోల్డెన్ రూల్స్.. ఒళ్లు దగ్గర పెట్టుకుని ఫాలో కావాల్సిందే

ఇండియన్ ప్రీమియర్ లీగ్ (IPL) 2023 సీజన్ కు సంబంధించిన మినీ వేలం మరికాసేపట్లో ఆరంభం కానుంది. కొచ్చి వేదికగా జరిగే ఈ వేలంలో ఐపీఎల్ లోని 10 ఫ్రాంచైజీలు పాల్గొననున్నాయి.

మొత్తం 405 మంది ప్లేయర్లు వేలంలోకి రానున్నారు. వీరి నుంచి గరిష్టంగా 87 మందిని మాత్రమే ఫ్రాంచైజీలు కొనుగోలు చేసే అవకాశం ఉంది. సన్ రైజర్స్ హైదరాబాద్ దగ్గర అత్యధికంగా రూ. 42.25 కోట్ల ప్రైజ్ మనీ ఉండగా.. కోల్ కతా నైట్ రైడర్స్ దగ్గర అతి తక్కువగా రూ. 7.05 కోట్ల ప్రైజ్ మనీ ఉంది.

ఇక ఐపీఎల్ మినీ వేలంలో ఫ్రాంచైజీలన్ని కొన్ని నియమాలను పాటించాల్సి ఉంది. రూల్స్ విషయంలో బీసీసీఐ కఠినంగా వ్యవహరించే అవకాశం ఉంది. ఆ రూల్స్ ఏంటో ఇప్పుడు తెలుసుకుందాం.

ఈ మినీ వేలం కోసం ప్రతి జట్టుకు కూడా రూ. 5 కోట్ల రూపాయలను కేటాయించడం జరిగింది. ఈ మొత్తాన్ని సదరు ఫ్రాంచైజీ మనీ పర్సుకు జత చేయడం జరిగింది.

ప్రతి ఫ్రాంచైజీ కూడా వేలంలో తమ మొత్తం పర్సు నుంచి కనీసం 75 శాతాన్ని ఖర్చు చేయాల్సి ఉంది. ఎట్టి పరిస్థితులోనూ వేలం తర్వాత తమ పర్సులో 25 శాతానికి కంటే ఎక్కువ నిధులను మిగిల్చుకోవడానికి వీలు లేదు.

ఈసారి వేలంలో ‘నో రైట్ టు మ్యాచ్’ కార్డు లేదు. అంటే వేలంలో ఒక ప్లేయర్ ను కొనుగోలు చేసిన తర్వాత.. గత సీజన్ లో ఆ ప్లేయర్ కు ఓనర్ గా ఉన్న ఫ్రాంచైజీ ఆ మొత్తాన్ని చెల్లించి తిరిగి దక్కించుకోవడం.

ఉదాహరణకు.. 2022 సీజన్ లో కేన్ విలియమ్సన్ హైదరాబాద్ తరఫున ఆడాడు. ప్రస్తుతం వేలంలో ఉన్నాడు. మినీ వేలంలో అతడిని సన్ రైజర్స్ కాకుండా వేరే జట్టు ఒక ధరకు దక్కించుకుంటే.. రైట్ టు మ్యాచ్ కార్డు ద్వారా ఆ ధరను సన్ రైజర్స్ చెల్లించి తన టీంలోకి తీసుకునే అవకాశం ఉంటుంది. అయితే 2023 మినీ వేలంలో ఈ ఆఫ్షన్ లేదు.

ప్రతి ఫ్రాంచైజీ కూడా తన స్క్వాడ్ లో 17 నుంచి 25 మంది ప్లేయర్లను ఉండేలా చూసుకోవాలి. ఇందుకు తక్కువ గానీ, ఎక్కువ గానీ ఉండరాదు. విదేశీ ప్లేయర్ల విషయానికి వస్తే 8 మందికి మించి ఉండరాదు.

వేలం ఆరంభంలో అమ్ముడు పోని ప్లేయర్లు చివర్లో మళ్లీ వేలంలోకి వస్తారు. అయితే ఎవరు వేలంలోకి రావాలని అనే విషయాన్ని 10 ఫ్రాంచైజీలు నిర్ణయించే అవకాశం ఉంది. అన్ సోల్డ్ లిస్టు నుంచి షార్ట్ లిస్టు చేసి చివర్లో వేలం వేసే అవకాశం ఉంది.