IPL 2022 - MS Dhoni : ఈ న‌క్క‌ల వేట ఎంత సేపు.. కుంబ‌స్థ‌లాన్ని బ‌ద్ద‌లు కొట్టనున్న ధోని.. మహీ ఖాతాలో డబుల్ సెంచరీ..

ఐపీఎల్ 2022 (IPL 2022) సీజన్‌ రసవత్తరంగా సాగుతోంది. ప్లే ఆఫ్ రేస్ (Playoff Race) రంజుగా సాగుతోంది. తుది నాలుగు స్థానాల్లో నిలవడానికి తొమ్మిది జట్లు హోరాహోరీగా పోరాడుతున్నాయ్. ఇప్పటికే.. ముంబై ఇండియన్స్ (Mumbai Indians) ప్లే ఆఫ్ రేస్ నుంచి నిష్క్రమించింది.

ఈ నేపథ్యంలో ఫ్యాన్స్ ను అలరించడానికి మరో ఇంట్రెస్టింగ్ ఫైట్ రెడీ అయింది. ధోని కెప్టెన్సీలోని చెన్నై సూపర్ కింగ్స్- ఫాఫ్ డుప్లెసిస్ సారథ్యంలోని రాయల్ ఛాలెంజర్స్ బెంగళూరుతో అమీతుమీ తేల్చుకోనుంది. రెండు జట్లకూ కీలకమైన మ్యాచ్ ఇది. ప్లే ఆఫ్ రేస్ లో నిలవడానికి గెలుపు తప్పనిసరి.

ఇక, ఈ మ్యాచులో కొన్ని అరుదైన రికార్డులు మహేంద్రుడిని ఊరిస్తున్నాయ్. టీ20 మెగా టోర్నీ ఐపీఎల్ లో ధోనీ ఆడబోయే 200వ మ్యాచ్ ఇది. టోర్నీలో ఒకే జట్టుకు 200 మ్యాచ్ లు ఆడిన రెండో ఆటగాడిగా ధోనీ నిలవనున్నాడు.

ఈ జాబితాలో బెంగళూరు మాజీ సారథి విరాట్ కోహ్లీ మొదటి స్థానంలో ఉన్నాడు. పోయిన సీజన్ లోనే విరాట్ 200వ మ్యాచ్ ఆడగా.. ఇవాళ ఆడబోయే మ్యాచ్ 217వది.

వాస్తవానికి 2016, 2017లో చెన్నై జట్టుకు ధోనీ దూరమైన సంగతి తెలిసిందే. దీంతో పూణే తరఫున 30 మ్యాచ్ లు ఆడాడు. లేదంటే ఐపీఎల్ లో ఎక్కువ మ్యాచ్ లు ఆడిన ఆటగాడిగా ధోనీనే మొదటి స్థానంలో నిలిచేవాడు.

ఇక టీ20 (అన్నీ కలిపి) కెప్టెన్ గా ధోనీకిది 302వ మ్యాచ్. ఇప్పటిదాకా సారథిగా ధోనీ 5,994 రన్స్ చేశాడు. 6 వేల పరుగుల మైలురాయికి మరో 6 పరుగుల దూరంలో నిలిచాడు. ఇవాళ ఆ మార్కును అధిగమిస్తే భారత్ తరఫున ఈ ఘనత సాధించిన రెండో ఆటగాడిగా ధోనీ తన పేరును లిఖించుకోనున్నాడు. ఇప్పటికే విరాట్ కోహ్లీ 6,451 పరుగులతో మొదటి స్థానంలో కొనసాగుతున్నాడు.

బెంగళూరుపై ధోనీ ఇప్పటివరకు 836 పరుగులు సాధించాడు. అందులో 46 సిక్సర్లున్నాయి. మరో 4 బాదితే.. బెంగళూరుపై సిక్సర్ల అర్ధశతకాన్ని నమోదు చేసినట్టవుతుంది. ఒక జట్టుపై సిక్సర్ల అర్ధశతకం నమోదు చేసిన తొలి ఆటగాడిగా ధోనీ ఘనతకెక్కుతాడు.

ఇక, ఈ ఏడాది ఐపీఎల్ లో కెప్టెన్ గా తప్పుకొంటున్నానని చెప్పి షాకిచ్చాడు ధోనీ. జడేజా పగ్గాలు అందుకోవడం.. అపజయాల బాటలో జట్టు నడవడం కలవరపరచింది. దీంతో మళ్లీ అతడు జట్టు సారథిగా బాధ్యతలు చేపట్టాడు. తన మార్కు కెప్టెన్సీని ప్రత్యర్థులకు రుచి చూపించాడు. అదే ఊపును కొనసాగించి ఈ మ్యాచులో కూడా తన జట్టును విజయంవైపు నడిపించాలని ధోని భావిస్తున్నాడు.