Kohli - Rohit : కోహ్లీకి వర్తించిన రూల్స్ రోహిత్ శర్మకి వర్తించవా..? విరాట్ విషయంలో మరీ ఇంత అన్యాయమా..!

పింక్ టెస్ట్ (IND vs SL Pink Test) లో టీమిండియా కెప్టెన్ రోహిత్ శర్మ (Rohit Sharma)అరుదైన ఘనత సాధించాడు. బెంగళూరు టెస్టుతో రోహిత్ శర్మ తన లో 400వ అంతర్జాతీయ మ్యాచ్ ఆడనున్నాడు. ఇప్పటి వరకు రోహిత్ తన కెరీర్ లో 44 టెస్టులు, 250 వన్డేలు, 125 టి20 మ్యాచ్ లు ఆడాడు. అంటే మొత్తం 399 మ్యాచ్ లు ఆడాడు. బెంగళూరు టెస్టుతో 400వ అంతర్జాతీయ మ్యాచ్.

ఇక్కడి వరకు బాగానే ఉంది. రోహిత్ శర్మ మైల్ స్టోన్ మ్యాచ్ అని ఫ్యాన్స్ కూడా సంబరపడుతున్నారు. కానీ, ఇక్కడే బీసీసీఐ తన వక్రబుద్దిని బయటపెట్టిందని కోహ్లీ ఫ్యాన్స్ విమర్శిస్తున్నారు. విరాట్ కోహ్లీ విషయంలో మరీ అన్యాయంగా ప్రవర్తించిందని వాపోతున్నారు.

విరాట్ కోహ్లి విషయంలో ఒకలా, ప్రస్తుత సారధి రోహిత్‌ శర్మల విషయంలో మరోలా బీసీసీఐ ప్రవర్తించిందని మండిపడుతున్నారు. కోహ్లి తన కెరీర్‌లో మైలురాయి టెస్ట్‌ అయిన 100వ టెస్ట్‌ను తనకు ప్రత్యేకమైన అనుబంధం ఉన్న బెంగళూరులో ఆడాలని ఆశించాడు. ఇందుకోసం బీసీసీఐ ప్రత్యేకమైన ఏర్పాట్లు కూడా చేస్తుందని భావించాడు.

అయితే ఈ విషయంలో కోహ్లి ఉద్దేశాలను అంతాగా పట్టించుకోని బీసీసీఐ.. ఆ మ్యాచ్‌ను షెడ్యూల్‌ ప్రకారం యధాతథంగా మొహాలీలోనే కొనసాగించి కోహ్లితో పాటు అతని ఫ్యాన్స్‌ను దారుణంగా నిరుత్సాహపరిచింది. ఫస్ట్ ఈ మ్యాచ్‌ను ప్రేక్షకులు లేకుండా ఖాళీ స్టేడియంలోనే నిర్వహించాలని భావించినప్పటికీ.. చివరి నిమిషంలో కోహ్లి అభిమానుల నుంచి తీవ్ర ఒత్తిడి రావడంతో 50 శాతం ప్రేక్షకులకు అనుమతించింది.

కోహ్లి కెరీర్‌లో చిరస్మరణీయంగా నిలిచిపోయే ఈ టెస్ట్‌ విషయంలో ఏ మాత్రం కనికరం చూపని బీసీసీఐ.. ప్రస్తుత టీమిండియా సారధి రోహిత్‌ శర్మ విషయంలో మాత్రం ప్రత్యేక ఆసక్తిని కనబర్చి, కోహ్లి ఫ్యాన్స్‌ నుంచి దారుణమైన ట్రోలింగ్‌ ఎదుర్కొంటుంది.

రోహిత్ శర్మ 400 వ మైల్ స్టోన్ మ్యాచ్ కోసం బీసీసీఐ ప్రత్యేక ఏర్పాట్లు చేయాలని భావించి, ముందుగా అనుకున్న కొన్ని నిబంధనలను సవరించి, బెంగళూరు టెస్ట్‌కు 100 శాతం ప్రేక్షకులకు అనుమతిస్తూ ప్రకటన జారీ చేసింది.

ఇదే కోహ్లి ఫ్యాన్స్‌ ఆగ్రహానికి కారణమైంది. తమ ఆరాధ్య క్రికెటర్‌ మైలురాయి టెస్ట్‌కు ప్రత్యేక ఏర్పాట్లు చేయకపోగా, 50 శాతం ప్రేక్షకులను మాత్రమే స్టేడియంలోని అనుమతించిన బీసీసీఐ.. రోహిత్‌ 400వ మ్యాచ్‌ను హైలైట్‌ (డే అండ్‌ నైట్‌, పింక్‌ బాల్‌ మ్యాచ్‌) చేస్తూ 100 శాతం ప్రేక్షకులను అనుమతించడమేంటని మండిపడుతున్నారు.

కోహ్లి విషయంలో కోవిడ్‌ నిబంధనల పేర్లు చెప్పి తప్పించుకున్న బీసీసీఐకి ఇప్పుడు ఆ నిబంధనలు పట్టవా అని ఫైరవుతున్నారు. బీసీసీఐ కంకణం కట్టుకుని మరీ కోహ్లిని అవమానించాలని చూస్తే మాత్రం ఊరుకోమని సోషల్‌మీడియా వేదికగా ఫైరవుతున్నారు.