IND vs NZ: శుభ్‌మన్ గిల్ ఆట.. కోహ్లీ వేట.. షమీ అరుదైన ఘనత.. కివీస్ సిరీస్ లో బద్దలయ్యే రికార్డులివే!

ఈ ఏడాది భారత క్రికెట్ జట్టు (Indian Cricket Team) వరుసగా వన్డే సిరీస్‌లు ఆడుతోంది. ఇప్పటికే సొంతగడ్డపై శ్రీలంకతో వన్డే సిరీస్ నెగ్గింది. నేటి నుంచి న్యూజిలాండ్‌తో సిరీస్ ప్రారంభం కానుంది. బ్యాటింగ్, బౌలింగ్ విభాగంలో టీమిండియా బలంగా కనిపిస్తోంది.

సొంత గడ్డపై ఆడటం మనవాళ్లకు ప్లస్ పాయింట్‌గా చెప్పుకోవచ్చు. మరోవైపు ప్రత్యర్థి జట్టు న్యూజిలాండ్ కూడా అంతే బలంగా కనిపిస్తోంది. అయితే ఈ తాజా సిరీస్‌లో కొన్ని వన్డే రికార్డులు బద్దలయ్యే అవకాశం ఉంది. అవేంటో చూడండి.

* 13,000 వన్డే రన్స్ సాధించిన బ్యాటర్‌గా విరాట్ కోహ్లీ : ఈ ఏడాది విరాట్ కోహ్లీ టాప్ రేంజ్ ఫామ్‌తో దూసుకుపోతున్నాడు. శ్రీలంకతో జరిగిన సిరీస్‌లో విశ్వరూపం చూపాడు. మూడు మ్యాచ్‌ల ODI సిరీస్‌లో కోహ్లి 141.5 సగటుతో 283 పరుగులు చేశాడు.

విరాట్ ప్రస్తుతం 259 వన్డే ఇన్నింగ్స్‌లలో 58.2 సగటుతో 12,754 పరుగులు చేశాడు. న్యూజిలాండ్‌తో మూడు మ్యాచ్‌ల వన్డే సిరీస్‌లో 246 పరుగులు చేస్తే.. 13,000 వన్డే రన్స్ మార్క్‌ను చేరుకున్న ఐదో బ్యాటర్‌గా నిలుస్తాడు.

* వన్డేల్లో అత్యంత వేగంగా 1000 పరుగులు చేసిన ఇండియన్ బ్యాటర్‌గా శుభ్‌మన్ గిల్ : శ్రీలంకతో వన్డే సిరీస్‌లో శుభ్‌మన్ గిల్ సత్తా చాటాడు. టీమ్ మేనేజ్‌మెంట్ తనపై పెట్టుకున్న నమ్మకానికి న్యాయం చేశాడు. లంకతో మూడు మ్యాచ్‌ల్లో 69 సగటుతో 207 పరుగులు చేశాడు. ఇందులో ఒక అర్ధ సెంచరీ, సెంచరీ కూడా ఉంది. ఈ క్రమంలో గిల్ ఒక చారిత్రక రికార్డుకు దగ్గరయ్యాడు. ఇప్పటి వరకు అతడు కేవలం 18 ఇన్నింగ్స్‌లలో 59.6 సగటుతో 894 పరుగులు సాధించాడు. అయితే 1000 వన్డే పరుగులు పూర్తి చేయడానికి ఈ యంగ్ ప్లేయర్‌కు కేవలం 106 రన్స్ అవసరం.

న్యూజిలాండ్‌తో జరిగే సిరీస్‌లో గిల్ ఈ మైలురాయిని చేరుకుంటే.. అత్యంత వేగంగా 1000 వన్డే రన్స్ (ఇన్నింగ్స్ పరంగా) చేరుకున్న ఇండియన్ బ్యాటర్‌గా నిలుస్తాడు. ప్రస్తుతం ఈ రికార్డు విరాట్ కోహ్లీ, శిఖర్ ధావన్ పేరిట ఉంది. ఈ ఢిల్లీ బ్యాటర్లు ఇద్దరూ తమ 24వ వన్డే ఇన్నింగ్స్‌లో నాలుగు అంకెల మార్కును చేరుకున్నారు.

* టాప్-10 ఇండియన్ వన్డే వికెట్ టేకర్స్‌ లిస్ట్‌లో మహ్మద్ షమీ : టీమిండియా సీనియర్ బౌలర్ మహ్మద్ షమీ మరో రికార్డుకు చేరువయ్యాడు. గత కొంత కాలంగా జట్టులో నిలకడగా రాణిస్తున్న ఈ టాలెంటెడ్ ప్లేయర్.. ఇప్పటి వరకు 82 వన్డేల్లో 25.7 సగటుతో 152 వికెట్లు తీశాడు.

షమీ ప్రస్తుతం ఈ ఫార్మాట్‌లో ఎక్కువ వికెట్లు తీసిన ఇండియన్ బౌలర్స్‌లో 11వ స్థానంలో ఉన్నాడు. అయితే తాజా సిరీస్‌లో ఈ వెటరన్ సీమర్.. వన్డేల్లో టాప్-10 లీడింగ్ ఇండియన్ వికెట్ టేకర్‌గా నిలిచే అవకాశం ఉంది. షమీ కనీసం మూడు వికెట్లు పడగొడితే.. మనోజ్ ప్రభాకర్ (157 వన్డే వికెట్లు)ను అధిగమిస్తాడు. తద్వారా 50 ఓవర్ల క్రికెట్‌లో మరో మైలురాయిని చేరుకుంటాడు.