IND vs BAN ODI Series : ఆటలో అరటిపండులా టీమిండియా స్టార్ ప్లేయర్.. ఫామ్ లో ఉన్నా జట్టుకు దూరంగానే

వచ్చే ఏడాది భారత్ (India) వేదికగా వన్డే ప్రపంచకప్ (ODI World Cup) జరగనున్న సంగతి తెలిసిందే. 2011 తర్వాత వన్డే ప్రపంచకప్ కు భారత్ ఆతిథ్యమివ్వడం ఇదే తొలిసారి.

ఇక గత కొంత కాలంగా ఐసీసీ టోర్నీల్లో భారత్ పెద్దగా రాణించడం లేదు. హాట్ ఫేవరెట్ గా ప్రపంచకప్ బరిలోకి దిగడం.. గ్రూప్ స్టేజ్ లో అదరగొట్టడం.. ఆ తర్వాత సెమీస్ లేదా ఫైనల్లో చిత్తవ్వడం భారత్ కు సర్వసాధారణం అయ్యింది.

టీమిండియాలో గత కొంత కాలంగా సంజూ సామ్సన్ నిలకడగా ఆడుతున్నాడు. తనకు వచ్చిన ప్రతి అవకాశాన్ని సద్వినియోగం చేసుకున్నాడు. ట్యాలెంట్ కు ఏ మాత్రం కొదవ లేదు. అయినా సంజూ ఇప్పటికీ టీమిండియాలో రెగ్యులర్ ప్లేయర్ గా మారలేదు.

సంజూ సామ్సన్ విషయంలో బీసీసీఐ చాలా కఠినంగా వ్యవహరిస్తుందనే చెప్పాలి. సీనియర్లు లేనప్పుడు జట్టులోకి తీసుకోవడం.. ఒకటి రెండు మ్యాచ్ లను ఆడించడం ఆ తర్వాత డ్రాప్ చేయడం సంజూ విషయంలో సర్వ సాధారణంగా మారిపోయింది.

ఇక తాజాగా న్యూజిలాండ్ తో టి20, వన్డే సిరీస్ లకు ఎంపికైనా.. ఒకే ఒక్క మ్యాచ్ లో ఆడే అవకాశం వచ్చింది. బంగ్లాదేశ్ తో జరిగే వన్డే సిరీస్ కు ఎంపిక చేయలేదు. ఇక తాజాగా టీమిండియా మేనేజ్ మెంట్ తీసుకున్న ఒక నిర్ణయం సంజూ క్రికెట్ కెరీర్ కు ఫుల్ స్టాప్ పెట్టేలా కనిపిస్తుంది.

బంగ్లాదేశ్ తో జరిగిన వన్డే సిరీస్ లో అనూహ్యంగా కేఎల్ రాహుల్ వికెట్ కీపర్ గా బరిలోకి దిగాడు. రాహుల్ వికెట్ కీపింగ్ కు సంజూ సామ్సన్ క్రికెట్ కెరీర్ కు లింక్ ఏంటనే సందేహం తలెత్తడం సహజం.

రాహుల్ ను వికెట్ కీపర్ గా ఆడిస్తే.. పంత్, సంజూ సామ్సన్ లు జట్టులో ఉన్నా బెంచ్ కే పరిమితం కావాలి. అదే సమయంలో భారత్ ఒక ఎక్స్ ట్రా ప్లేయర్ తో బరిలోకి దిగొచ్చు. ఒక వేళ జట్టులో రాహుల్ ఉన్నా వికెట్ కీపింగ్ చేయకపోతే అప్పుడు పంత్ లేదా సంజూ సామ్సన్ లలో ఒకర్ని జట్టులోకి తీసుకోవాల్సి ఉంటుంది.

అయితే రాహుల్ ను వికెట్ కీపర్ గా సక్సెస్ అయితే అతడికి స్టాండ్ బైగా పంత్ ఉండే అవకాశం ఉంది. ఇక సంజూ ఇంటికే పరిమితం కావాల్సి ఉంటుంది. ఈ లెక్కన సంజూ సామ్సన్ మరోసారి ప్రపంచకప్ కు దూరంగా ఉండే అవకాశం అయితే ఉంది. ప్రతిభ ఉన్నా చివరకు సంజూ సామ్సన్ ఆటలో అరటిపండులా మారే అవకాశం లేకపోలేదు.