IPL 2022 : క్రికెట్ లవర్స్ కు గుడ్ న్యూస్.. ఐపీఎల్ పై బీసీసీఐ కీలక నిర్ణయం..!

ఐపీఎల్ సీజన్ 2022 (IPL 2022) నిర్వహణ కీసం బీసీసీఐ (BCCI)కసరత్తు మొదలుపెట్టింది. అయితే, బీసీసీఐ సన్నాహాలకు బ్రేకులు వేసేందుకు.. కరోనా కూడా తన సత్తా చూపేందుకు సిద్ధమవుతోంది.

అయితే, గతేడాదిలానే ఈసారి కూడా టీ20 లీగ్ కరోనా విలయంలో చిక్కుకోకుండా బీసీసీఐ ‘ప్లాన్ బి’ని సిద్ధం చేస్తుంది. దేశంలో పెరుగుతున్న కరోనా కేసుల దృష్ట్యా, భారత క్రికెట్ కంట్రోల్ బోర్డు కొన్ని నిర్దిష్ట చర్యలు తీసుకోవాలనే మూడ్‌లో ఉంది. లీగ్ నిర్వహణకు సంబంధించి తన కీలక నిర్ణయం ఏంటో వెల్లడించింది.

ఈ ఏడాది వేసవిలో నిర్వహించే ఐపీఎల్‌ 15వ సీజన్‌ను భారత్‌లో నిర్వహించేందుకే బీసీసీఐ మొగ్గు చూపుతుందని, విదేశాల్లో నిర్వహించడాన్ని ఆప్షన్‌గా ఉంచుకుందని ఈ వ్యవహారాలకు సంబంధించిన ఓ ఉన్నతాధికారి తాజాగా జాతీయ మీడియాకు వెల్లడించారు.

భారత్‌లో రాబోయే రోజుల్లో కరోనా తీవ్రత మరింత పెరిగే అవకాశం ఉంది. దీంతో టోర్నీ నిర్వహణ ఇక్కడ కష్టంగా మారితే.. ప్రత్యామ్నాయంగా విదేశీ వేదికలను సైతం ఎంచుకునే వీలుందని ఆయన వివరించారు. అంతకంటే ముందు ఐపీఎల్‌ మెగా వేలంపైనే బీసీసీఐ ప్రధానంగా దృష్టిసారించిందని తెలిపారు.

అయితే, భారత్ లో నిర్వహణకు బీసీసీఐ ముందు రెండు ఎంపికలు ఉన్నాయ్. ముందుగా- అన్ని మ్యాచ్‌లు 10 వేదికల్లో జరగాలి. అంటే మొత్తం 10 జట్లకు హోమ్ గ్రౌండ్‌ల్లోనే మ్యాచ్‌లు జరగాలి.

లేదంటే పెరుగుతున్న కరోనా ముప్పు దృష్ట్యా, భారత క్రికెట్ నియంత్రణ మండలి ముంబైలో మాత్రమే టోర్నమెంట్‌ను నిర్వహించాలని ప్లాన్ చేసినట్లు తెలుస్తోంది. అంటే అన్ని మ్యాచ్‌లు ముంబైలోనే జరగాలి. ప్రస్తుతం, ఈ ఈవెంట్ కోసం మళ్లీ యూఏఈకి వెళ్లాలని బీసీసీఐ ఆలోచించడం లేదన్నట్టు తెలుస్తోంది.

ఇక ఈ టోర్నీ షెడ్యూల్‌ ప్రకటించకపోయినా ఏప్రిల్ తొలి వారంలో ప్రారంభమయ్యే అవకాశాలు ఉన్నాయి. మరోవైపు ఈ ఏడాది కొత్తగా రెండు జట్లు మెగా ఈవెంట్‌లో పాలుపంచుకుంటుండగా ఆటగాళ్ల వేలం ఆలస్యం కానుంది. దీన్ని ఫిబ్రవరి తొలివారంలో నిర్వహించే అవకాశం ఉందని చెప్పారు.