IND vs PAK : మ్యాచ్ విన్నర్ ట్యాగ్ తో కళ్లు నెత్తికెక్కితే ఇలాగే ఉంటది.. ఇకనైనా సీనియర్ల మాట విను

పాకిస్తాన్ (Pakistan)తో జరిగిన ఆసియా కప్ (Asia Cup) సూపర్ 4 మ్యాచ్ లో భారత్ (India) 181 పరుగులు చేసినా కూడా ఓటమి పక్షానే నిలిచింది. టాస్ ఓడటం భారత్ కు ప్రతికూలంగా మారింది కూడా.

పేలవ ఫీల్డింగ్, చెత్త బౌలింగ్ భారత్ ఓటమికి ప్రధాన కారణాలుగా నిలిచాయి. కీలక సమయాల్లో అర్ష్ దీప్ సింగ్ ఈజీ క్యాచ్ ను జారవిడవడం భారత్ ను ఓడించేలా చేసింది.

అయితే పాకిస్తాన్ తో అంతకుముందు జరిగిన మ్యాచ్ లో ఆల్ రౌండ్ షోతో అదరగొట్టిన హార్దిక్ పాండ్యా (Hardik Pandya).. ఈ మ్యాచ్ లో మాత్రం తేలిపోయాడు. బ్యాటర్ గా డకౌట్ అయిన అతడు బౌలర్ గా 4 ఓవర్లలో 44 పరుగులు సమర్పించుకున్నాడు.

ప్రతి మ్యాచ్ లోనూ అదిరిపోయే ప్రదర్శన చేయడం ఎవరికీ సాధ్యం కాదు. కొన్ని సార్లు బ్యాటింగ్ లో బౌలింగ్ లో దారుణంగా విఫలం అవుతుంటాం. అంతమాత్రనా సదరు ప్లేయర్ ను విమర్శించడం తగదు.

హార్దిక్ పాండ్యా విషయంలోనూ అదే జరిగింది. పాకిస్తాన్ తో జరిగిన గ్రూప్ మ్యాచ్ లో హార్దిక్ 3 వికెట్లు తీయడంతో పాటు 33 పరుగులు చేసి భారత్ కు విజయాన్ని అందించాడు. అయితే సరిగ్గా వారం రోజుల తర్వాత సేమ్ టీంతో జరిగిన మ్యాచ్ లో దారుణంగా విఫలం అయ్యాడు.

అయితే ఈ మ్యాచ్ లో హార్దిక్ తన ఆట కంటే కూడా అతడి ప్రవర్తన వల్ల అభిమానుల చేతుల్లో విమర్శల పాలవుతున్నాడు. భారత్ ఇన్నింగ్స్ లో బ్యాటింగ్ చేసేందుకు సిద్ధంగా డగౌట్ లో ఉన్న హార్దిక్ దగ్గరకు రోహిత్ వెళ్లి కీలక సూచనలు చేస్తాడు.

అక్కడ రోహిత్ శర్మ చాలా సీరియస్ గా చెబుతుంటే హార్దిక్ మాత్రం అస్సలు పట్టించుకోడు. రోహిత్ ఏదో జోక్ వేస్తున్నట్లు హార్దిక్ నవ్వుతుంటాడు. అనంతరం బ్యాటింగ్ కు వెళ్లి డకౌట్ అవుతాడు. డ్రెస్సింగ్ రూంకు చేరుకున్న హార్దిక్ కు రోహిత్ క్లాస్ పీకుతాడు. ఇక బౌలింగ్ సమయంలో కోహ్లీ హార్దిక్ దగ్గరకు వచ్చి సూచనలు ఇస్తాడు. ( PC : TWITTER)

ఈ సమయంలో కూడా కోహ్లీ మాటలను హార్దిక్ పట్టించుకోడు. గత మ్యాచ్ లో షార్ట్ పిచ్ బంతులతో వికెట్లు తీసిన హార్దిక్.. ఈ మ్యాచ్ లో మాత్రం అటువంటి ఫలితాన్ని సాధించలేకపోయాడు. షార్ట్ పిచ్ బంతులు వేసినా పాక్ బ్యాటర్లు మంచిగా ఆడటంతో భారీగా పరుగులు సమర్పించుకున్నాడు.