Veerappan : వీరప్పన్ సోదరుడు మత్తయ్యన్ మృతి.. 35ఏళ్లుగా జైలులోనే.. కూతురు విద్యారాణి బీజేపీలో

పేరు మోసిన బందిపోటు, దివంగత స్మగ్లర్ వీరప్పన్ కు ఒకప్పటి కీలక సహచరుడు, ఆయన పెద్దన్న కూడా అయిన మత్తయ్యన్ కన్నుమూశారు. 75 ఏళ్ల మత్తయ్యన్ తమిళనాడులోని సేలం ప్రభుత్వ ఆస్పత్రిలో మరణించాడు.

తమ్ముడితోపాటు మత్తయ్యన్ అనేక నేరాల్లో పాలుపంచుకున్నట్లు రికార్డులున్నాయి. అయితే ఓ హత్య కేసులో నేరం రుజువుకావడంతో సేలం సెంట్రల్ జైలులో జీవిత ఖైదు శిక్ష పొందుతున్నాడు. వయసుతోపాటే ఆరోగ్య సమస్యలు పెరిగాయి. మే 1న గుండెపోటు రాగా మత్తయ్యన్ ను జైలు అధికారులు సేలం ఆస్పత్రికి తరలించారు.

సేలంలోని కుమారమంగళం మెడికల్ కాలేజీ ఆస్పత్రిలో చికిత్స పొందుతూ బుధవారం (మే25) ఉదయం మత్తయ్యన్ కన్నుమూశారు. వీరప్పన్ సోదరుడి మరణాన్ని పోలీసులు అధికారికంగా ధృవీకరించారు.

1987లో ఫారెస్ట్ రేంజ్ చిదంబరం హత్య జరిగింది. ఈ హత్య కేసులో పోలీసులు మత్తయ్యన్‌ను అరెస్టు చేశారు. ఈ కేసులోనే వీరప్పన్ పెద్దన్న మత్తయ్యన్‌కు జీవిత ఖైదు పడింది. గత 35 ఏళ్లుగా ఆయన జైలులోనే ఉన్నాడు. మత్తయ్యన్‌నూ విడుదల చేయాలని పలువురు పిటిషన్లు వేసినా ఫలించలేదు.

మత్తయ్యన్ మృతదేహాన్ని కుటుంబీకులకు అప్పగించే ఏర్పాట్లు చేశారు పోలీసులు. కాగా, ప్రస్తుత నేత వీరప్పన్ కూతురు విద్యారాణి తన పెదనాన్న అంత్యక్రియలు నిర్వహించనున్నట్లు తెలుస్తోంది. వీరప్పన్ చనిపోయేనాటికే భార్య ముత్తులక్ష్మి, ఇద్దరు కూతుళ్లు (ప్రభ, విద్యారాణి) ఉన్నారు.

వీరప్పన్ ను పట్టుకునేందుకు పోలీస్ స్పెషల్ టాస్క్ ఫోర్స్ ఆపరేషన్ కుకూన్ పేరుతో 1991 నుంచి ప్రయత్నాలు ఆరంభించి, విజయకుమార్ నేతృత్వంలో 2004 అక్టోబర్ 18న వీరప్పన్, అతని అనుచరులు సేతుకాళి గోవిందన్, చంద్రె గౌడ, సేతుమునిలను కాల్చిచంపడంతో ఆపరేషన్ ముగిసింది. దాదాపు రూ.100 కోట్ల ఖర్చుతో భారతదేశ చరిత్రలోకెల్లా అత్యంత ఖరీదైన ఆపరేషన్ గా నిలిచింది.

వీరప్పన్ మరణం తర్వాత భార్య ముత్తులక్ష్మి సైతం కొన్నాళ్లు జైలు జీవితం, సుదీర్ఘకాలంపాటు పోలీసుల నుంచి వేధింపులు ఎదుర్కొన్నారు. పిల్లలు ప్రభ, విద్యారాణిలు వాళ్ల మేనత్త మాల సంరక్షణలో పెరిగారు. ప్రభ ప్రచారానికి దూరంగా ఉంటుండగా, విద్యారాణి రాజకీయాల్లోకి అడుగపెట్టారు. తమిళనాడు బీజేపీలో ప్రస్తుతం ఆమె యువనేతగా రాణిస్తున్నారు.

చిన్నప్పటి నుంచి తండ్రిని చూడలేదని, చనిపోయాక కాసేపు మృతదేహాన్ని చూశానని విద్యారాణి చెబుతారు. తండ్రి ఎలాంటివాడైనా సమాజం మాత్రం తనను శత్రువుగానో, ప్రత్యర్థిగానో చూడలేదని, మంచితనంతో ఆదరించిన వాళ్లు ఎందరో ఉన్నారని, ఇదే భాగ్యంగా భావిస్తున్నట్లు ఆమె పేర్కొన్నారు. వీరప్పన్ మంచితనం గురించి కూడా తాను చాలా విన్నానని చెప్పారామె. తమిళనాడులో బీజేపీ ఎదుగుదలకు కృషి చేస్తానని, దేశంలో జాతీయ పార్టీ అంటే ఒక్క బీజేపీ మాత్రమేనని వీరప్పన్ కూతురు విద్యారాణి అంటారు.