Prabhas: ప్రభాస్ భారీ మల్టీస్టారర్ బడ్జెట్ ఎంతో తెలుసా..? నిర్మాతలు ఇంత ధైర్యం చేస్తున్నారా..?

భారీ సినిమాలకు కేరాఫ్ అడ్రస్ అవుతున్నారు యంగ్ రెబల్ స్టార్ ప్రభాస్. ఆయన డేట్స్ కోసం బడా నిర్మాతలు క్యూ కట్టే పరిస్థితి నెలకొంది. పాన్ ఇండియా క్రేజ్ ఉన్న ఆయనతో భారీ రేంజ్ సినిమాలు తీసి చరిత్రలో నిలిచిపోవాలనే నిర్మాతల సంఖ్య పెరుగుతూ వస్తోంది.

ఇప్పటికే పలు బిగ్గెస్ట్ ప్రాజెక్ట్స్ లో భాగమవుతూ బిజీ బిజీగా ఉన్న ప్రభాస్‌తో ఓ భారీ మల్టీస్టారర్ ప్లాన్ చేశారట పఠాన్ మూవీ డైరెక్టర్ సిద్దార్థ్ ఆనంద్ (Siddharth Anand). బలమైన కథతో ప్రభాస్ హీరోగా ఇండియన్ సినీ హిస్టరీలో ఎన్నడూ లేనివిధంగా ఈ మూవీ తెరకెక్కించనున్నారని తెలుస్తోంది.

ఈ సినిమాను మైత్రి మూవీ మేకర్స్ బ్యానర్ పై నిర్మిస్తున్నట్లు తెలిసింది. రీసెంట్ గా మైత్రి నిర్మాతతో పఠాన్ మూవీ డైరెక్టర్ సిద్దార్థ్ ఆనంద్ మీట్ కావడంతో ఈ సినిమాను మైత్రి వాళ్ళే నిర్మిస్తున్నట్లు అంతా కన్ఫర్మ్ చేసుకున్నారు.

ఈ బిగ్గెస్ట్ సినిమాలో ప్రభాస్‌తో పాటు బాలీవుడ్ స్టార్ హీరో హృతిక్ రోషన్ నటించనున్నట్లు తెలుస్తుండటం ఆసక్తికరం. అతి త్వరలో ఈ సినిమాను అఫీషియల్‌గా అనౌన్స్ చేయబోతున్నట్లు టాక్. ఈ క్రమంలోనే ఈ మూవీ బడ్జెట్ విషయమై ఓ ఆసక్తికర విషయం బయటకొచ్చింది.

భారతీయ సినీ చరిత్రలోనే రికార్డ్ రేంజ్ బడ్జెట్ కేటాయించి ఈ సినిమా తెరకెక్కించబోతున్నారట.1500 కోట్ల రూపాయల బడ్జెట్ తో ఈ సినిమాను గ్రాండ్ గా రూపొందించాలని ప్లాన్స్ చేస్తున్నారట. ఎక్కడా రాజీ పడకుండా ఈ మూవీని అత్యున్నత సాంకేతిక పరిజ్ఞానంతో షూట్ చేయనున్నారని సమాచారం.

2024లో ఈ ప్రాజెక్టు పట్టాలెక్కే అవకాశం ఉందని అంటున్నారు. ఈ మూవీ కోసం ప్రభాస్ ఒక్కరే దాదాపు 200 కోట్ల రెమ్మ్యూనరేషన్ తీసుకోబోతున్నట్లు తెలుస్తోంది. దీన్ని బట్టి ఈ మూవీ ఏ రేంజ్ లో ఉంటుందో ఊహించుకోవచ్చు.

ప్రస్తుతం ప్రభాస్ చేతిలో బిగ్గెస్ట్ సినిమాలున్నాయి. కెజీఎఫ్ ఫేమ్ ప్రశాంత్ నీల్ దర్శకత్వంలో సలార్ మూవీ చేస్తున్నారు ప్రభాస్. భారీ యాక్షన్ ఎంటర్‌టైనర్ గా రాబోతున్న ఈ సినిమాను తెలుగు, తమిళ, కన్నడ, మలయాళ, హిందీ భాషల్లో ఒకేసారి రిలీజ్ చేయనున్నారు.

అదేవిధంగా బాలీవుడ్ దర్శకుడు ఓం రౌత్ దర్శకత్వంలో ఆదిపురుష్ సినిమాను ఇప్పటికే కంప్లీట్ చేశారు ప్రభాస్. ప్రస్తుతం ఈ సినిమా పోస్ట్ ప్రొడక్షన్ దశలో ఉంది. నాగ్ అశ్విన్ దర్శకత్వంలో మరో సినిమాను లైన్ లో పెట్టిన ప్రభాస్.. రీసెంట్ గానే మారుతి దర్శకత్వంలో కొత్త సినిమాకు గ్రీన్ సిగ్నల్ ఇచ్చారు.

ఇంత బిజీ షెడ్యూల్ లో కూడా సిద్దార్థ్ ఆనంద్ దర్శకత్వంలో ప్రభాస్ భారీ సినిమా ఉండనుందని తెలియడం రెబల్ స్టార్ అభిమానులకు కిక్కిచ్చింది. ఇప్పటికే పఠాన్ సినిమాతో సెన్సేషన్ క్రియేట్ చేసిన సిద్దార్థ్ ఆనంద్.. ప్రభాస్, హృతిక్ లతో ఎలాంటి స్కెచ్ వేశారనేది తెలియాలంటే ఇంకొన్ని రోజులు ఆగాల్సిందే.