Mohan Babu: భూమా మౌనికను పెళ్లాడిన మంచు మనోజ్.. ఆ పుకార్లకు చెక్ పెట్టేసిన మోహన్ బాబు

మంచు మనోజ్ రెండో పెళ్లి వేడుక ఫిల్మ్ నగర్‌లోని మంచు నిలయంలో ఘనంగా జరిగింది. భూమా మౌనికా రెడ్డిని (Bhuma Mounika Reddy) పెళ్లాడారు మంచు మనోజ్ (Manchu Manoj). ప్రస్తుతం ఈ వేడుకకు సంబంధించిన ఫొటోస్ నెట్టింట వైరల్ అవుతున్నాయి.

మార్చి 3వ తేదీన జరిగిన ఈ పెళ్లి వేడుకతో మంచు మనోజ్- భూమా మౌనికా రెడ్డి కొత్త జీవితాన్ని ప్రారంభించారు. ఇద్దరూ కూడా తమ తమ జీవితంలో రెండో సారి ఏడడుగులు వేసి నూతన అధ్యాయానికి శ్రీకారం చుట్టారు. అటు మనోజ్, ఇటు మౌనిక ఇద్దరిదీ కూడా రెండో వివాహమే కావడం విశేషం.

దివంగత దంపతులు భూమా నాగిరెడ్డి, శోభారెడ్డి రెండో కుమార్తెనే ఈ భూమా మౌనిక రెడ్డి. మౌనికను ప్రేమించిన మంచు మనోజ్.. ఇప్పుడు ఆమె మెడలో మూడుముళ్లు వేసి భార్యగా తన జీవితంలోకి ఆహ్వానించారు. పెళ్లి బంధంతో ఒక్కటైన ఈ జంటకు పలువురు సినీ, రాజకీయ ప్రముఖులు శుభాకాంక్షలు తెలుపుతున్నారు.

గత నాలుగైదు రోజులుగా మంచు మనోజ్ పెళ్లి వార్త ట్రెండ్ అవుతుండగా.. ఈ పెళ్లి మోహన్ బాబుకు ఇష్టం లేదని, ఆయన పెళ్ళికి రావడం లేదని అన్నారు. కానీ అలాంటి పుకార్లకు చెక్ పెడుతూ తన చిన్న కొడుకు మనోజ్ పెళ్లిని దగ్గరుండి మరీ జరిపించారు మోహన్ బాబు.

టీడీపీ నేత భూమా నాగిరెడ్డి కుమార్తె భూమా మౌనికా రెడ్డి కావడంతో.. ఆమెను మోహన్ బాబు కోడలిగా స్వీకరించడానికి అంగీకరించలేదని నిన్న మొన్నటి దాకా వార్తలు వచ్చాయి. కానీ మనోజ్ పెళ్లి ఫొటోలతో ఆ వార్తలన్నీ పుకార్లే అని తేలిపోయింది.

హైదరాబాద్ ఫిలిం నగర్ లోని మంచు లక్ష్మి ఇంట్లో మంచు మనోజ్ పెళ్లి జరిగింది. తమ్ముడి పెళ్లికి పెద్దగా ఆమెనే వ్యవహరిస్తూ అన్నీ దగ్గరుండి చూసుకుందట. తమ్మున్ని పెళ్లి కొడుకును చేయడంతో పాటు మౌనిక మెడలో మూడు ముళ్ళు వేసేవరకు అన్ని బాధ్యతలు ఆమెనే తీసుకొని ఈ పెళ్లి జరిపించింది.

గతంలో హైదరాబాద్ కి చెందిన ప్రణతి రెడ్డిని 2015 లో పెళ్లి చేసుకున్న మంచు మనోజ్.. నాలుగేళ్లు కాపురం చేసి ఆమెతో 2019లో డివోర్స్ తీసుకున్నారు. వ్యక్తిగత కారణాల వల్ల పరస్పర అంగీకారంతో మంచు మనోజ్ విడాకులు జరిగాయని తెలిసింది. ఇప్పుడు మౌనికతో కొత్త బంధంలోకి అడుగు పెట్టారు మంచు మనోజ్.

మొదటి భార్యతో విడాకులు తీసుకున్న మనోజ్.. రెండో పెళ్లికి రెడీ కావడం జనాల్లో హాట్ టాపిక్ అయింది. దీనిపై రకరకాలుగా రూమర్స్ నడిచాయి కానీ చివరకు పెళ్లి బంధంతో కొత్త జర్నీ స్టార్ట్ చేశారు మనోజ్- మౌనిక.

మోహన్ బాబు నట వారసుడిగా టాలీవుడ్‌లో అడుగుపెట్టిన మంచు మనోజ్.. హీరోగా తనకంటూ ప్రత్యేక గుర్తింపు తెచ్చుకున్నారు. మంచు మనోజ్ తను చేసిన సినిమాల కంటే పర్సనల్ విషయాలతోనే ఎక్కువగా ఫోకస్ అయ్యారు. తాజాగా మౌనిక రెడ్డితో రెండో పెళ్లితో మరోసారి వార్తల్లో నిలిచారు.

మంచు మనోజ్ సెకండ్ మ్యారేజ్‌కు రెడీ అవుతున్నట్లు చాలా రోజులుగా వార్తలు వస్తున్నప్పటికీ వీటిపై రియాక్ట్ కాలేదు మంచు ఫ్యామిలీ. భూమా మౌనికతో కలిసి మనోజ్ ఎప్పుడైతే పబ్లిక్ గా కనిపించారో అప్పటినుంచి మనోజ్ సెకండ్ మ్యారేజ్‌ న్యూస్ జనాల్లో హాట్ టాపిక్ అయింది.

అయితే తాజాగా జరిగిన మనోజ్ పెళ్లి వేడుకకు ఇటు మంచు కుటుంబ సభ్యులతో పాటు.. అటు భూమా నాగిరెడ్డి ఫ్యామిలీ మెంబర్స్ అంతా హాజరయ్యారు. వీరితో పాటు ఫ్యామిలీ ఫ్రెండ్స్, సన్నిహితులు ఈ పెళ్లి వేడుకలో పాల్గొన్నారు.