Hyper Aadi: ఆ విషయంలో హైపర్ ఆది మరీ దిగజారిపోతున్నాడా.. అమ్మాయిలని కూడా చూడకుండా..!

జబర్దస్త్ కమెడియన్ హైపర్ ఆది కాంట్రవర్సీల్లో ఇరుక్కువడం కొత్తేం కాదు. అల్లుడు అత్తారింటికి వెళ్లొచ్చినట్లు.. కావాల్సినప్పుడల్లా కాంట్రవర్సీల జోలికి వెళ్తుంటాడు హైపర్ ఆది. మొన్నటికి మొన్న కూడా తెలంగాణ గౌరమ్మ, బతుకమ్మాను కించపరిచాడు అంటూ ఈయనపై మండి పడ్డారు తెలంగాణ జాగృతి సభ్యులు.

ఈ కమెడియన్ వేసే పంచులు చూసి ఎంత నవ్వుకుంటారో.. అప్పుడప్పుడూ చేసే పనులు చూసి అంత కోపగించుకునే వాళ్లు కూడా ఉన్నారు. కామెడీ కోసం ఏం చేయడానికైనా సిద్ధమే అని ఆది ఇప్పటికే చాలా సార్లు చెప్పాడు.

నవ్వించడం మా పని.. అదే చేస్తున్నాను నేను.. మీకు నచ్చకపోతే నేనేం చేయలేను అంటూ మొండిగానే వాదిస్తుంటాడు. అయితే కామెడీ కోసం ఏదైనా చేయమంటే.. ఎదుటి వాళ్లను తక్కువ చేయమని కాదు కదా అంటూ హైపర్ కుర్రాడికి కొందరు ప్రతీసారి చురకలు అంటిస్తూనే ఉంటారు.

ఎంత చెప్పినా ఈ కమెడియన్ మాత్రం తన స్టైల్ మార్చుకోవడం లేదు. చివరికి నాగబాబు కూడా చెప్పేసాడు.. హైపర్ ఆదిలో టాలెంట్ ఉంది కానీ ఒకే దగ్గర ఆగిపోయాడు.. ఎప్పుడూ అదే పాత పంచుల మీదే ఆధారపడతాడు అని. అయినా కూడా హైపర్ ఆది మాత్రం మారడం లేదు.

ఇప్పటికీ అదే పంచ్ డైలాగులతోనే నెట్టుకొస్తున్నాడు. అంతా బాగానే ఉంది కానీ ఈ మధ్య హైపర్ ఆది స్కిట్స్‌లో ఒక్కటి మాత్రం ఎవరికీ అంతగా నచ్చడం లేదు. అదే బాడీ షేమింగ్.. ఎప్పట్నుంచో ఇది చేస్తున్నాడు ఈయన.. ఇందులో కొత్తేముంది అనుకుంటున్నారా..?

అవును చేస్తున్నాడు.. కానీ ఎప్పట్నుంచో చేసినా కూడా అబ్బాయిలపై మాత్రమే బాడీ షేమింగ్ చేస్తూ వచ్చాడు ఆది. అమ్మాయిల జోలికి వెళ్లలేదు.. వెళ్లినా తక్కువగానే వెళ్లాడు. అయితే ఈ మధ్య ఆయన స్కిట్స్‌లో ఓ అమ్మాయి రెగ్యులర్‌గా కనిపిస్తుంది.

పటాస్‌తో పాపులర్ అయిన ఫైమా జబర్దస్త్‌లో చేస్తుంది. అందరి స్కిట్స్‌లోనూ ఈమె కనిపిస్తుంది. అయితే ఈమెపై విపరీతమైన పంచులు వేస్తున్నాడు హైపర్ ఆది. మరీ ముఖ్యంగా డబుల్ మీనింగ్ డైలాగులు కూడా రాసేస్తున్నాడు.

అమ్మాయిపై ఇలాంటి వల్గర్ పంచులు రాయడానికి కొంచెం కూడా సిగ్గుగా అనిపించడం లేదా ఆది గారూ అంటూ మర్యాదగానే కొందరు సోషల్ మీడియాలో ఆయన్ని ప్రశ్నిస్తున్నారు. నీ బాడీలో ఒక్కటైనా సరిగ్గా ఉందా.. అన్నీ ఎవరో లోపలికి తోసేసినట్లున్నావ్ అంటూ తాజాగా స్కిట్‌లో ఈయన ఫైమాపై వేసిన పంచ్‌కు నెటిజన్స్ నుంచి నెగిటివ్ రెస్పాన్స్ వస్తుంది.

కామెడీ కోసం ఏమైనా చేయండి కానీ అమ్మాయిలను ఇంత దారుణంగా కించపరిచి మాట్లాడాల్సిన అవసరం లేదనే విషయాన్ని మాత్రం గుర్తు పెట్టుకోండి హైపర్ ఆది అంటూ మండి పడుతున్నారు. అయితే ఇలాంటి మండి పడటాలు కొన్నేళ్లుగా చూస్తున్నాడు ఆది. అయినా మారలేదు.. మరి ఇప్పుడైనా ఆ మార్పు కనిపిస్తుందో లేదో..?