Dhanush - Aishwarya: ఇలా విడిపోయారు.. ఎలా కలిసారో తెలుసా.. ట్రెండింగ్‌లో ధనుష్, ఐశ్వర్య లవ్ స్టోరీ..

సోషల్ మీడియాలో ఇప్పుడు ఎక్కడా చూసినా కూడా ధనుష్, ఐశ్వర్య గురించే చర్చ జరుగుతుంది. చిలకా గోరింకల్లా ఉన్న ఈ జంట.. ఉన్నట్లుండి అలా విడిపోయారేంటి అంటూ అంతా మాట్లాడుకుంటున్నారు. అసలు ఏమై ఉంటుంది.. ఎందుకు విడిపోయారు అంటూ ఆరా తీస్తున్నారు. ఇదిలా ఉంటే ఇలా విడిపోయారు కానీ ధనుష్, ఐశ్వర్య ఎలా కలిసారు అనేది కూడా ఇప్పుడు ట్రెండింగ్ అవుతుంది. వాళ్ల లవ్ స్టోరీ గురించి తెలుసుకుంటున్నారు.

సూపర్ స్టార్ రజినీకాంత్ అప్పాయింట్‌మెంట్ దొరకడానికి కూడా ఇండస్ట్రీలో చాలా మంది హీరోలకు టైమ్ పడుతుంది. ఆయన్ని కలవాలంటే అంత ఈజీ కాదు. అలాంటి రజినీ ఇంటికి అల్లుడు కావడం అంటే సామాన్యమైన విషయం కాదు. కానీ అది చేసి చూపించాడు ధనుష్. స్టార్ హీరో కానపుడే ఈయన సూపర్ స్టార్ అల్లుడు అయిపోయాడు. అలాగే అందరికీ పరిచయం అయ్యాడు కూడా.

రజినీకాంత్ అల్లుడు అయ్యే ముందు ధనుష్‌కు పెద్దగా బ్యాగ్రౌండ్ కూడా లేదు. ఎందుకంటే చాలా చిన్న సినిమాలతో ఇండస్ట్రీకి వచ్చాడు ధనుష్. ‘తుల్లువదో ఇలమై’ అనే చిన్న సినిమాతో హీరోగా పరిచయం అయ్యాడు ధనుష్. తొలి సినిమాలో ఆయన లుక్స్ చూసి.. ఇతడేం హీరోరా బాబూ అంటూ హేళన చేసారు కూడా.

అసలు హీరో అంటే ఎలా ఉండాలి.. కనీసం ఒక్క లుక్ అయినా బాగుండాలి కదా అంటూ వెక్కిరించారు. కానీ ఇప్పుడు అదే ధనుష్ తమిళనాట స్టార్ హీరోగా వెలిగిపోతున్నాడు. అయితే ఈయన రజినీ అల్లుడు ఎలా అయ్యాడు అనేది చాలా మందికి ఐడియా లేదు. ఇప్పుడు విడాకులు తీసుకున్న తర్వాత.. వాళ్లిద్దరి లవ్ స్టోరీ వైరల్ అవుతుంది.

ఒకప్పుడు చిన్న హీరోనే అయినా కూడా ఇప్పుడు మాత్రం రెండు జాతీయ అవార్డులు గెలిచి స్టార్ హీరో అయిపోయాడు. రజినీకాంత్‌కు తగ్గ అల్లుడు అనిపించుకుంటున్నాడు. ధనుష్ స్టార్ హీరో కావడానికి ముందే.. అప్పుడప్పుడే ఎదుగుతున్న క్రమంలోనే ఆయన సూపర్ స్టార్ అల్లుడు అయిపోయాడు. దాంతో మనోడి దశ తిరిగిపోయింది. పైగా టాలెంట్ కూడా అలాగే ఉంది ఈయనకు.

ఎక్కడ చూసాడో.. ఎందుకు నచ్చాడో తెలియదు కానీ రజినీ పెద్ద కూతురు ఐశ్వర్యకు ఈయన బాగా నచ్చేసాడు. రెండు కుటుంబాలు కూర్చుని మాట్లాడుకోవడం.. పెళ్లి చేసేయడం అంతా చకాచకా జరిగిపోయాయి. తుల్లువదో ఇలమై సినిమాతో ధనుష్ చాలా విమర్శలు ఎదుర్కొన్నాడు.

అయితే ఆయన అన్నయ్య సెల్వ రాఘవన్ అప్పటికే మంచి దర్శకుడిగా గుర్తింపు తెచ్చుకున్నాడు. అలాంటి సమయంలో అన్నయ్య దర్శకత్వంలో ధనుష్ నటించిన రెండో సినిమా ‘కాదల్ కొండేన్’ సంచలన విజయం సాధించింది. ఇదే సినిమాను తెలుగులో నేను పేరుతో అల్లరి నరేష్‌తో రీమేక్ చేసారు.

ఈ సినిమాతో ధనుష్‌కు నటుడిగా మంచి గుర్తింపు వచ్చింది. అదే సమయంలో ఆ సినిమా చూసిన రజినీకాంత్ పెద్దమ్మాయి ఐశ్వర్య తనకు ఓ బొకే పంపిందని తెలిపాడు. అంతేకాదు ‘గొప్పగా నటించారు. కంగ్రాట్స్.. కీప్ ఇన్ టచ్’ అని అందులో మెసేజ్ కూడా పెట్టిందని చెప్పాడు ధనుష్. అప్పట్నుంచే ఈ ఇద్దరి మధ్య పరిచయం ప్రేమగా మారింది.

ఆ తర్వాత ఒకసారి కాఫీ షాపులో కలిసి మాట్లాడుకున్నామని.. అదెలా బయటికి వచ్చిందో కానీ.. మీడియా వాళ్లు ప్రేమలో పడ్డట్లే రాసేశారని తెలిపాడు ధనుష్. తన వల్ల సూపర్ స్టార్ కూతురికి చెడ్డ పేరు వచ్చిందే అని బాధ పడుతున్న తరుణంలో పెద్ద వాళ్లు ఇందులో తప్పేం లేదని భావించి.. పెళ్లి చేసారని చెప్పాడు ధనుష్.

పెళ్లి మాటలు జరిగాక కూడా తాము పెద్దగా మాట్లాడుకుంది లేదని.. అసలు తనతో పెళ్లికి ఐశ్వర్య ఒప్పుకుందన్న విషయం తాను నమ్మలేకపోయానని చెప్పుకొచ్చాడు ఈ హీరో. చాలా త్వరగా తమ పెళ్లి జరిగిపోయిందని.. తొలిసారి కలుసుకున్న ఆరు నెలల్లోనే దంపతులయ్యామని గత విషయాలు ఆ మధ్య గుర్తు చేసుకున్నాడు ధనుష్.

ఈ ఇద్దరి మధ్య ఇంత అందమైన ప్రేమకథ నడిచింది. 18 నవంబర్ 2004న అంగరంగ వైభవంగా ధనుష్, ఐశ్వర్య పెళ్లి జరిగింది. అప్పట్లో ఈ పెళ్లి గురించి అంతా చర్చించుకున్నారు. ఈయన్ని ఎలా రజినీకాంత్ అల్లుడు చేసుకున్నాడ్రా బాబూ అన్నారు. కానీ తర్వాత రోజుల్లో రజినీకాంత్ అల్లుడు ధనుష్ అనడం మానేసి.. ధనుష్ మామ రజినీ అనే స్థాయికి కూడా ఎదిగాడు. అంత అన్యోన్యంగా ఉన్న ఈ జంట ఇప్పుడు విడిపోవడంతో అభిమానులు బాధ పడుతున్నారు. ఏదేమైనా వాళ్లు తీసుకున్న నిర్ణయాన్ని గౌరవిస్తున్నారు.