PM Modi in Germany : మ్యూనిచ్‌లో మోదీ మేనియా.. భారీ స్వాగతం -G7 Summitతోపాటు..

జర్మనీలోని చారిత్రక మ్యూనిచ్ నగరంలో భారత ప్రధాని మోదీ అడుగుపెట్టింది మొదలు.. ఎయిర్ పోర్టులో, ఆయన బస చేసే హోటల్ వద్ద పెద్ద ఎత్తున కోలాహలం నెలకొంది. పెద్ద సంఖ్యలో తరలి వచ్చిన ప్రవాసభారతీయులు మోదీ-మోదీ నినాదాలతో సిటీని హోరెత్తించారు.

ఐక్యరాజ్యసమితి తర్వాత అత్యంత బలమైన అంతర్జాతీయ వేదిక, ఏడు అగ్రదేశాల కూటమి అయిన జీ-7 లో భారత్ భాగస్వామి కానప్పటికీ, జర్మనీ ఛాన్సరల్ ఒలాఫ్ షోల్జ్ ఆహ్వానం మేరకు ఈ సదస్సుకు మోదీ హాజరవుతున్నారు.

నిజానికి భారత్ కు ఉన్న ప్రాధాన్యం రీత్యా గడిచిన చాలా ఏళ్లుగా జీ-7 సదస్సుకు మన దేశాధినేతలకు ఆహ్వానాలు అందుతూనే ఉన్నాయి.

మ్యూనిచ్ సిటీ వేదికగా ఆది, సోమవారాల్లో జరిగే జీ-7 శిఖరాగ్ర సదస్సులో భారత ప్రధాని మోదీ మొత్తం 12 దేశాల అధినేలతో దైపాక్షిక, బహుళపాక్ష చర్చలు జరుపనున్నారు.

ప్రపంచవ్యాప్తంగా మానవత్వాన్ని ప్రభావితం చేస్తోన్న కీలక అంశాలపై అంతర్జాతీయ సహకారాన్ని మరింత బలోపేతం చేయడమే లక్ష్యంగా ఈ ఏడాది జీ-7 సదస్సు జరుగుతున్నది. ఇండియాతోపాటు అర్జెంటీనా, ఇండోనేషియా, సెనెగల్, సౌతాఫ్రికా వంటి దేశాలను కూడా జర్మనీ ఆహ్వానించింది.

స్థానిక కాలమానం ప్రకారం ఆదివారం తెల్లవారిన తర్వాత ప్రధాని మోదీ మ్యూనిచ్ నగరంలో ల్యాండ్ అయ్యారు. ఎయిర్ పోర్టులో ఆయనకు జర్మనీ ముఖ్యనేతలు, అధికారులు స్వాగతం పలికారు. జర్మన్ సైనిక వందనం స్వీకరించిన మోదీ.. జవాన్ల ప్రత్యేక స్వాగత గీతాన్ని ఆనందించారు.

ఎయిర్ పోర్టు నుంచి హోటల్ కు వెళ్లే దారి వెంబడి ప్రవాస భారతీయులు పెద్ద సంఖ్యలో బారులు తీరి, మోదీ-మోదీ నినాదాలతో ప్రధానికి స్వాగతం పలికారు. హోటల్ వద్ద ప్రధాని.. ప్రవాస భారతీయులను పరామర్శించారు. చిన్నపిల్లలను ముద్దుచేస్తూ క్షేమ సమాచారం అడిగితెలుసుకున్నారు.

కరోనా కారణంగా రెండేళ్ల పాటు వర్చువల్ గానే జరిగిన జీ-7 శిఖరాగ్ర సదస్సు ఈసారి భౌతికంగా జరుగుతున్నది. ప్రధాని మోదీ తన మ్యూనిచ్ పర్యటనలో జీ 7 స‌ద‌స్సులో పాల్గొన‌డంతో పాటు వివిధ దేశాల అధినేత‌ల‌తో ప్ర‌త్యేకంగా స‌మావేశ‌మ‌వుతారు. జూన్ 26, 27 తేదీల్లో ఆయ‌న జ‌ర్మ‌నీలో ఉంటారు. సుమారు 15 ఇత‌ర‌ కార్య‌క్ర‌మాల్లోనూ ఆయ‌న పాల్గొంటారు.

జ‌ర్మ‌నీలోని మ్యునిచ్‌లో ప్ర‌ధాని మోదీ ప్రవాస భారతీయులతో భారీ సమావేశాన్ని నిర్వహించనున్నారు. జర్మనీ పర్యటన ముగిసిన తర్వాత జూన్ 28న మోదీ యూఏఈ కి వెళ్తారు. ఇటీవ‌ల మ‌ర‌ణించిన యూఏఈ రాజు, మాజీ అధ్య‌క్షుడు షేక్ ఖ‌లీఫా బిన్ జాయేద్ అల్ న‌హ్యాన్ కు నివాళుల‌ర్పించి, ఆయ‌న‌ కుటుంబ స‌భ్యుల‌ను మోదీ ప‌రామ‌ర్శిస్తారు.