Tragedy : ముగ్గురు అక్కాచెల్లెళ్లు.. అందులో ఇద్దరు నిండు గర్భిణులు.. పిల్లలతోకలిసి బావిలో శవాలుగా..

కలిగినంతలో అన్నీ ఇచ్చుకున్నా.. ఇంకా తెమ్మంటూ అదనపు కట్నం కోసం భర్తలు, అత్తింటివారు తీవ్రంగా హింసించి వెళ్లగొట్టడంతో అటు పోలేక, పుట్టింట్లో ఉండలేక ఆ తోబుట్టువులు పిల్లలతో కలిసి ప్రాణాలు తీసుకున్నారు. లో శనివారం చోటుచేసుకున్న ఈ సంఘటన యావత్ దేశాన్ని ఉలిక్కిపాటుకు గురిచేసింది.

రాజస్థాన్​ లోని జైపుర్​ రూరల్​ జిల్లా దుందూ మండలపరిధిలో సామూహిక ఆత్మహత్యల ఉదంతం తీవ్ర కలకలం రేపింది. ముగ్గురు మహిళలు, ఇద్దరు చిన్నారుల శవాలు నరేనా రోడ్ సమీపంలోని బావిలో కనిపించాయి. సమాచారం అందుకొన్న దుదూ స్టేషన్ పోలీసులు, అధికారులు ఘటనాస్థలికి వెళ్లి విచారణ చేపట్టారు.

ఇద్దరు పిల్లలతోసహా బావిలోకి దూకి చనిపోయిన ముగ్గురు మహిళలు అక్కాచెల్లెళ్లు అని, అందులో ఇద్దరు గర్భవతులని పోలీసులు తెలిపారు. వీరిని కాలీ దేవి(27), మమతా దేవి(23), కమ్లేశ్​ మీనాగా(20) గుర్తించారు. చనిపోయిన చిన్నారుల్లో నాలుగేళ్ల హర్షిత్, 20 రోజుల వయసున్న శిశువు ఉన్నట్లు పోలీసులు చెప్పారు.

బావిలో దూకి బలవన్మరణానికి పాల్పడిన అక్కాచెల్లెళ్లలో మమతా దేవీ ఎనిమిది నెలల గర్భంతో ఉండగా.. కమ్లేశ్ తొమ్మిది నెలల నిండు గర్భిణి. మృతురాళ్ల బంధువు హేమరాజ్ మీనా చెప్పిన వివరాల ప్రకారం.. ముగ్గురు అక్కాచెల్లెళ్లకు ఒకే కుటుంబానికి చెందిన వ్యక్తులతో వివాహం జరిగింది. అదనపు కట్నం కోసం ముగ్గురు కోడళ్లనూ అత్తింటివారు వేధించసాగారు.

కోడళ్లపై హింసకు సైతం వెనుకాడని అత్తింటివారు పది రోజుల కిందట కూడా వీరిని తీవ్రంగా కొట్టి ఇంట్లో నుంచి బయటకు గెంటేశారు. దెబ్బలు తిన్న ముగ్గురు తోబుట్టువులు పుట్టింటి వెళ్లిపోగా, అక్కడికీ దాపురించి మళ్లీ వేదించారు అత్తింటివారు.

కట్నం వేధింపులు, భర్త, అత్తింటివారి హింస భరించలేని పరిస్థితి, ఎలాగైనాసరే కాపురానికి వెళ్లాల్సిందే కదా అనే పుట్టింటివారి సూచనలతో ఆ అక్కాచెల్లెళ్లు తీవ్ర మానసిక వేదనకు గురై చివరికి ఆత్మహత్య నిర్ణయం తీసుకున్నారు.

మార్కెట్​కు వెళ్తామని చెప్పి మే 25న(బుధవారం నాడు) ఇంటి నుంచి బయటకు వెళ్లి వెళ్లిన మహిళలు.. తిరిగి రాకపోవడంతో కుటుంబీకులు పోలీసులకు ఫిర్యాదు చేశారు. మూడు రోజుల వెతుకులాట తర్వాత చివరికి ఊరి శివారులోని బావిలో శవాలు కనిపించాయి.

అత్తింటివారి కట్నం వేధింపులు భరించలేకే తమ బిడ్డలు, పిల్లతో సహా ఆత్మహత్య చేసుకున్నారని మృతురాళ్ల తల్లిదండ్రులు ఫిర్యాదు చేశారు. అయితే అవతలివాళ్లు కాస్త పలుకుబడి గల వ్యక్తులు కావడం, స్థానిక ఎమ్మెల్యేకు దగ్గరివాళ్లు కావడంతో ఘటనపై పోలీసులు సరిగా స్పందించడంలేదని, దీంతో మహిళా కమిషన్​ను ఆశ్రయించామని మృతురాళ్ల బంధువులు చెప్పారు.