Third Wave: ముంచుకొస్తోంది మూడో ముప్పు.. పెద్దలతో సమానంగా పిల్లలకు హెచ్చరిక.. తస్మాత్ జాగ్రత్త..!

మూడో ప్రమాద హెచ్చరిక తప్పదా.. తొలి రెండు వేవ్ ల కంటే ఇది అంత ప్రమాదకరమా..? అవుననే అంటోంది తాజా నివేదిక.. నిర్లక్ష్యం మాటున ప్రయాణిస్తున్న ప్రజలకు అప్రమత్తత అవసరాన్ని గుర్తు చేస్తోంది. పెద్దల విషయంలోనే కాదు... పిల్లల కోసం కరోనాపై ఎలాంటి జాగ్రత్తలు తీసుకుంటున్నామో సరిచూసుకొమ్మని హెచ్చరిస్తోంది. జాతీయ విపత్తుల నిర్వహణ సంస్థ (ఎన్‌ఐడీఎం) సారథ్యంలోని నిపుణుల కమిటీ తాజా నివేదిక కరోనాపై కొత్త యుద్ధానికి సిద్ధం కమ్మని అలర్ట్ చేస్తోంది.

పలు అధ్యయనాలు ఇప్పటికే చెప్పినట్టు కరోనా థర్డ్‌వేవ్‌ రావడం ఖాయమనీ, అది అక్టోబర్‌ ద్వితీయార్ధానికి తారస్థాయికి చేరుకోవచ్చనీ ఈ సంఘం ప్రధానమంత్రి కార్యాలయానికి తెలియజేసింది. ఈసారి పెద్దలతో సమానంగా పిల్లలకూ ముప్పుందని హెచ్చరించడం ఆందోళన పెంచుతోంది.

పెద్ద సంఖ్యలో పిల్లలు కరోనాకు గురైతే, అవసరమైన వైద్య సిబ్బంది, వెంటిలేటర్లు, అంబులెన్సుల సహా వసతులే లేవని హెచ్చరించింది. ఇతర ఆరోగ్య సమస్యలున్న పిల్లలకూ, దివ్యాంగులకు మున్ముందుగా టీకాలు వేయాలని ప్రభుత్వానికి సూచించింది. ఇక, కరోనాతో సహజీవనంలో సరికొత్త సమరానికి సిద్ధం కావాల్సింది మనమే అని తేల్చి చెప్పేసింది.

ప్రజలకు సంకల్పం, మోదీ మార్గదర్శనం ఉంటే.. అసలు థర్డ్‌ వేవ్‌ రానే రాదని కొత్త ఆరోగ్య మంత్రి పార్లమెంట్‌ సాక్షిగా చెప్పారు. సహకరులంతా చప్పట్లు కొట్టారు. కానీ దురదృష్టవశాత్తూ, శాస్త్రీయ అధ్యయనంతో నిపుణులిచ్చిన తాజా నివేదిక అందుకు విరుద్ధంగా ఉంది.

సాక్షాత్తూ కేంద్ర హోమ్‌ శాఖ ఉత్తర్వుల మేరకు డాక్టర్‌ గగన్‌దీప్‌ కాంగ్‌ లాంటి పలువురు ప్రముఖ నిపుణులతో ఏర్పాటైన సంఘం ఇచ్చిన నివేదిక ఇది. దేశంలోని వివిధ ప్రాంతాల్లో జూలై చివరి వారంలో కరోనా ‘ఆర్‌’వ్యాల్యూ 0.96 నుంచి 1 పైగా పెరగడాన్ని బట్టి చూస్తే, థర్డ్‌వేవ్‌ ఇప్పటికే పడగ విప్పినట్టు అర్థమవుతోందని కూడా నిపుణుల నివేదిక పేర్కొంది.

ఇప్పుడున్న టీకాల సత్తాను మించిన బలమైన, కొత్త వేరియంట్లు థర్డ్‌వేవ్‌లో వచ్చే ముప్పుందనేది ఆ నివేదిక సారాంశం. అయితే, కరోనా వచ్చినా ప్రాణాంతకం కాకుండా కాపాడే ఇప్పుడున్న టీకాలు ఎంత వరకు పని చేస్తాయో చూడాలి..

మన దేశంలో 58.25 కోట్ల పైగా టీకా డోసులు వేశామని పాలకులు చెబుతున్నారు. అందులో 45.15 కోట్ల పైగా మొదటి డోసులే. మిగతా 13.10 కోట్లు రెండో డోసులు. దేశజనాభాలో 13.87 శాతం మందికే కరోనా టీకా రెండు డోసులూ వేయడం పూర్తయింది. అంటే, మన దేశంలో నూటికి 84 మందికి టీకాలు పూర్తిగా వేయ లేదు.. ఇది కూడా ఆందోళన పెంచే అంశమే..

కేంద్ర ఆరోగ్యశాఖే చెప్పిన మాట. ఈ ఆగస్టులో తొలి పది రోజులతో పోలిస్తే, తరువాతి పది రోజుల్లో రోజువారీ వేస్తున్న టీకా డోసుల సంఖ్య 48.8 లక్షల నుంచి 57 లక్షలకు పెరిగింది. ఆ మేరకు సంతోషమే. కానీ, రోజుకు 98 లక్షల డోసులైనా వేస్తే తప్ప, ఈ ఏడాది చివరికి కనీసం వయోజనుల వరకైనా టీకాలేయడం పూర్తి కాదు.

చిన్నారులకు ముప్పుందని తాజా నివేదిక మళ్ళీ చెబుతున్న నేపథ్యంలో వాస్తవ గణాంకాలు నిర్లక్ష్యం పనికి రాదని నిద్ర లేపుతున్నాయి. ఇప్పుడే సరైన వైద్యు సదుపాయాలు లేక పరిస్థితి కాస్త ఆందోళనగానే ఉంది. నివేదిక చెప్పినట్టు రేపు థర్డ్‌ వేవ్‌ వచ్చి భారీ సంఖ్యలో పిల్లలు కరోనా బారిన పడితే ప్రజారోగ్య రంగం కుప్పకూలడం ఖాయం.

తాజాగా 12 నుంచి 18 ఏళ్ళ లోపు పిల్లల కోసం మన దేశంలో తయారైన కొత్త టీకా కాస్త ఆశలు పెంచుతోంది.. పిల్లలకు తగ్గట్టే సూది లేకుండా వేసే ఈ మూడు డోసుల ‘జైకోవ్‌–డి’ టీకాకు నిజానికి 66 శాతం మేర సామర్థ్యం ఉంది అంటున్నారు. అత్యవసర వినియోగం కోసం భారత ఔషధ నియంత్రణ జనరల్‌ ఆమోదించింది. భారత్‌ బయోటెక్‌ తయారీ కోవ్యాగ్జిన్‌ తర్వాత ఈ కొత్త ‘జైడస్‌ క్యాడిలా’ మన దేశవాళీ రెండో టీకా కానుంది.