SSY: ఆ స్కీమ్ లో ఇన్వెస్ట్ చేసేవారికి కేంద్రం షాక్.. ఈ సారి కూడా నిరాశే!

కేంద్రంలోని ఎన్డీఏ ప్రభుత్వం ప్రవేశపెట్టిన సోషల్ సెక్యూరిటీ స్కీమ్స్‌లో సుకన్య సమృద్ధి యోజన (SSY) పాపులర్ అయింది. ఆడపిల్లలకు ఆర్థిక భరోసా ఇవ్వడానికి ఈ పథకాన్ని ప్రవేశపెట్టారు. బాలికలకు పదేళ్ల లోపు వయసు ఉన్నప్పుడు వారి పేరుతో సుకన్య సమృద్ధి అకౌంట్ ఓపెన్ చేయవచ్చు. అకౌంట్ ఓపెన్ చేసిన రోజు నుంచి.. ఇందులో నెలవారీ లేదా వార్షిక ప్రాతిపదికన 15 సంవత్సరాల పాటు డిపాజిట్లు చేయవచ్చు.

అయితే గతంలో మాదిరిగా SSY అకౌంట్‌ వడ్డీరేటు మరీ ఎక్కువగా ఉండట్లేదు. ఈ నేపథ్యంలో ఏప్రిల్ 1 నుంచి ప్రారంభమయ్యే కొత్త ఆర్థిక సంవత్సరంలో అయినా ఈ స్కీమ్ వడ్డీ రేట్లు పెంచుతారేమోనని డిపాజిటర్లు ఎదురుచూస్తున్నారు.

ఫిక్స్‌డ్ డిపాజిట్లు, ఇతర ప్రభుత్వ పొదుపు పథకాలపై వర్తించే వడ్డీ రేట్లు కంటే సుకన్య సమృద్ధి అకౌంట్ వడ్డీరేటు ఎక్కువగా ఉంటుంది. అయితే ఈ వడ్డీ రేటు గత 12 త్రైమాసికాల పాటు మారలేదు. ప్రస్తుతం SSY అకౌంట్ డిపాజిట్లపై ప్రభుత్వం 7.6 శాతం వడ్డీని అందిస్తోంది.

అయితే 2023-24 కొత్త ఆర్థిక సంవత్సరం మొదటి త్రైమాసికానికి (ఏప్రిల్- జూన్) కూడా ప్రభుత్వం ఈ వడ్డీ రేటును పెంచకపోవచ్చని ‘ది ఫైనాన్షియల్ ఎక్స్‌ప్రెస్’ ఇటీవల ఒక కథనం ప్రచురించింది. అంటే తర్వాతి త్రైమాసికంలో కూడా SSY వడ్డీ రేటు మారే అవకాశాలు లేవు.

* మారని వడ్డీ రేటు : 2020-21 ఆర్థిక సంవత్సరం మొదటి త్రైమాసికంలో SSY అకౌంట్ వడ్డీ రేటును 8.4 శాతం నుంచి 7.6 శాతానికి తగ్గించారు. ఆ సమయంలో PPF వడ్డీ రేటును కూడా 7.9% నుంచి 7.1 శాతానికి తగ్గించారు. ఆ తర్వాత నుంచి సుకన్య వడ్డీరేటు 7.6 శాతంగానే ఉంటోంది. 2022 డిసెంబర్‌లో డిపాజిటర్లకు పన్ను ప్రయోజనాలను అందించని కొన్ని చిన్న సేవింగ్స్ స్కీమ్స్ వడ్డీ రేట్లను ప్రభుత్వం సవరించింది. అయితే SSY, పబ్లిక్ ప్రావిడెంట్ ఫండ్ (PPF) వంటి ప్రముఖ పథకాల వడ్డీ రేట్లను మాత్రం మార్చలేదు.

SSY వడ్డీ రేటులో ఎలాంటి మార్పు లేనప్పటికీ, పన్ను మినహాయింపు ప్రయోజనాల కారణంగా ఇది ఇప్పటికీ బెస్ట్ సేవింగ్స్ స్కీమ్స్‌లో ఒకటిగా ఉంది. SSY అకౌంట్‌లో కనీసం రూ.250 నుంచి గరిష్టంగా రూ.1.5 లక్షలు డిపాజిట్ చేయవచ్చు. ఆదాయ పన్ను చట్టంలోని సెక్షన్ 80C కింద, ఈ మొత్తం కాంట్రిబ్యూషన్‌పై పన్ను మినహాయింపు పొందవచ్చు.

SSY, ఇతర సేవింగ్స్ స్కీమ్స్‌పై సెక్షన్ 80C కింద రూ.1.5 లక్షల వరకు ట్యాక్స్ ఎగ్జమ్షన్ పొందవచ్చు. మరోవైపు, 2024 ఆర్థిక సంవత్సరం మొదటి త్రైమాసికంలో వివిధ చిన్న పొదుపు పథకాలపై సవరించిన వడ్డీ రేట్లను ఈ నెలాఖరులోగా ప్రభుత్వం ప్రకటించే అవకాశం ఉంది.