SBI Interest Rates: ఎస్‌బీఐ కస్టమర్లకు దీపావళి గిఫ్ట్.. ఈరోజు నుంచి..

State Bank Of India | దేశంలోనే అతి పెద్ద బ్యాంక్‌గా కొనసాగుతూ వస్తున్న స్టేట్ బ్యాంక్ ఆఫ్ ఇండియా (SBI) తాజాగా తన కస్టమర్లకు తీపికబురు అందించింది. కీలక నిర్ణయం తీసుకుంది. ఫిక్స్‌డ్ డిపాజిట్లపై (FD) వడ్డీ రేట్లు పెంచుతున్నట్లు ప్రకటించింది. దీంతో చాలా మందికి ఊరట కలుగనుంది.

ఎస్‌బీఐ ఫిక్స్‌డ్ డిపాజిట్లపై వడ్డీ రేట్లను 20 బేసిస్ పాయింట్ల వరకు పెంచేసింది. రూ. 2 కోట్లలోపు డిపాజిట్లపై ఈ పెంపు వర్తిస్తుంది. బ్యాంక్ వెబ్‌సైట్ ప్రకారం.. వడ్డీ రేట్ల పెంపు నిర్ణయం అక్టోబర్ 15 నుంచి అమలులోకి వస్తుంది.

స్టేట్ బ్యాంక్ రెండు నెలల తర్వాత రిటైల్ టర్మ్ డిపాజిట్లపై వడ్డీ రేట్లను పెంచేసింది. వడ్డీ రేట్ల పెంపు 10 బేసిస్ పాయింట్ల నుంచి 20 బేసిస్ పాయింట్ల వరకు ఉంది. ఇప్పుడు మనం ఏ ఏ ఫిక్స్‌డ్ డిపాజిట్లపై వడ్డీ రేటు ఎంత పెరిగిందో ఇప్పుడు తెలుసుకుందాం.

ఎస్‌బీఐ 7 రోజుల నుంచి 45 రోజుల ఫిక్స్‌డ్ డిపాజిట్లపై వడ్డీ రేటును 2.9 శాతం నుంచి 3 శాతానికి పెంచేసింది. అలాగే 46 రోజుల నుంచి 179 రోజుల ఎఫ్‌డీలపై వడ్డీ రేటు 4 శాతానికి చేరింది. ఇదివరకు ఈ టెన్యూర్‌లోని ఫిక్స్‌డ్ డిపాజిట్లపై వడ్డీ రేటు 3.9 శాతంగా ఉండేది.

ఇంకా 180 రోజుల నుంచి 210 రోజుల ఎఫ్‌డీలపై వడ్డీ రేటు 4.55 శాతం నుంచి 4.65 శాతానికి చేరింది. 211 రోజుల నుంచి ఏడాదిలోపు ఎఫ్‌డీలపై అయితే వడ్డీ రేటు 4.6 శాతం నుంచి 4.7 శాతానికి పెరిగింది. ఇప్పుడు ఏడాది నుంచి రెండేళ్ల టెన్యూర్‌లోని ఫిక్స్‌డ్ డిపాజిట్లపై వడ్డీ రేటు 5.6 శాతంగా ఉంది. ఇదివరకు ఈ టెన్యూర్‌పై వడ్డీ రేటు 5.45 శాతంగా ఉండేది.

రెండేళ్ల నుంచి మూడేళ్ల కాల పరిమితిలోని ఫిక్స్‌డ్ డిపాజిట్లపై వడ్డీ రేటు 5.5 శాతం నుంచి 5.65 శాతానికి ఎగసింది. మూడేళ్ల నుంచి ఐదేళ్ల టెన్యూర్‌లోని ఎఫ్‌డీలపై వడ్డీ రేటు 5.6 శాతం నుంచి 5.8 శాతానికి చేరింది. అంటే ఇక్కడ వడ్డీ రేటు 20 బేసిస్ పాయింట్లు పైకి చేరింది.

ఇక ఐదేళ్ల నుంచి పదేళ్ల వరకు టెన్యూర్‌లోని ఫిక్స్‌డ్ డిపాజిట్లపై వడ్డీ రేటు 5.85 శాతానికి చేరింది. ఇదివరకు ఈ వడ్డీ రేటు 5.65 శాతంగా ఉంది. గతంలో కన్నా ఇప్పుడు బ్యాంక్‌లో డబ్బులు దాచుకుంటే అధిక రాబడి వస్తుందని చెప్పుకోవచ్చు.

ఇకపోతే సీనియర్ సిటిజన్స్‌కు కూడా బ్యాంక్ తీపికబురు అందించింది. ఫిక్స్‌డ్ డిపాజిట్లపై వడ్డీ రేట్లను పెంచేసింది. వడ్డీ రేటు 20 బేసిస్ పాయింట్లు పెరిగింది. వీరికి 3.5 శాతం నుంచి 6.65 శాతం వరకు వడ్డీ లభిస్తుంది. కాగా కొత్తగా ఎఫ్‌డీ చేసే వారికి లేదంటే పాత ఎఫ్‌డీలను రెన్యూవల్ చేసుకునే వారికి మాత్రమే కొత్త వడ్డీ రేట్లు వర్తిస్తాయని గుర్తించుకోవాలి.