SBI News: ఎస్‌బీఐ ఆఫర్ల వర్షం.. రూ.25 వేల డిస్కౌంట్, క్షణాల్లో రుణం, జీరో చార్జీలు!

SBI Yono | దేశంలోనే అతిపెద్ద బ్యాంక్‌గా కొనసాగుతూ వస్తున్న స్టేట్ బ్యాంక్ ఆఫ్ ఇండియా (ఎస్‌బీఐ) ఆఫర్ల వర్షం కురిపిస్తోంది. కొత్తగా కారు కొనే వారికి పలు రకాల ప్రయోజనాలు కల్పిస్తోంది. కారు కొనుగోలుదారులకు ఇది మంచి ఛాన్స్ అని చెప్పుకోవచ్చు.

ఎస్‌బీఐ తన యోనో యాప్ ద్వారా అదిరిపోయే ఆఫర్లు అందుబాటులో ఉంచింది. కారు బుకింగ్స్‌పై ఎక్స్‌క్లూజివ్ డీల్స్‌ను అందిస్తోంది. క్యాష్ డిస్కౌంట్, ఉచిత యాక్ససిరీస్, ప్రియారిటీ డెలివరీ వంటి పలు రకాల బెనిఫిట్స్‌ను ఆఫర్ చేస్తోంది.

టాటా మోటార్స్ కారు కొంటే రూ. 5 వేల వరకు అదనపు క్యాష్ డిస్కౌంట్ లభిస్తుంది. అదే కియా కంపెనీకి చెందిన కార్లను కొనుగోలు చేస్తే.. ప్రియారిటీ డెలివరీ బెనిఫిట్‌ను సొంతం చేసుకోవచ్చు.

మారుతీ సుజుకీ కార్ల విషయానికి వస్తే.. ఆన్‌లైన్‌లోనే బుక్ చేసుకునే వెసులుబాటు ఉంది. అలాగే మహీంద్రా కార్లపై అయితే ఉచితంగా రూ. 3 వేల విలువైన యాక్ససిరీస్ పొందొచ్చు. టయోటా కార్లపై కూడా ఇదే ఉచిత యాక్ససిరీస్ ఆఫర్ అందుబాటులో ఉంది.

ఇంకా రెనో కార్లను కొనుగోలు చేస్తే.. రూ. 5 వేల వరకు విలువైన యాక్ససిరీస్‌ను ఉచితంగా పొందొచ్చు. ఆడి కార్లపై కూడా ఆఫర్ ఉంది. అదనంగా రూ. 25 వేల వరకు క్యాష్ బెనిఫిట్ లభిస్తోంది. ఇంకా హ్యుందాయ్ కార్లపై అయితే ప్రియారిటీ డెలివరీ ఆప్షన్ ఉంది. ఎంపిక చేసిన మోడళ్లకు ఇది వర్తిస్తుంది.

కార్లపై ఆఫర్లు మాత్రమే కాకుండా సులభంగానే కారు కొనేందుకు లోన్ పొందొచ్చు. క్షణాల్లో సూత్రప్రాయ ఆమోదం పొందొచ్చు. తక్కువ వడ్డీ రేటుకే రుణాలు పొందొచ్చని బ్యాంక్ పేర్కొంటోంది. అయితే క్రెడిట్ స్కోర్ ప్రాతిపదికన మారు లోన్ వడ్డీ రేటు మారుతుందని గుర్తించాలి.

అంతేకాకుండా కారు లోన్స్‌పై మరో రెండు బెనిఫిట్స్ కూడా ఉన్నాయి. జీరో ప్రాసెసింగ్ ఫీజుతో మీరు కారు లోన్ పొందొచ్చని బ్యాంక్ తెలియజేస్తోంది. ఇంకా కారు ధరకు సమానమైన మొత్తాన్ని ఫైనాన్స్ రూపంలో పొందొచ్చు. అంటే 100 శాతం ఫైనాన్స్ వస్తుంది.

ఎస్‌బీఐ యోనో యాప్‌లోకి లాగిన్ అవ్వాలి. మీ ఫోన్‌నో ఎస్‌బీఐ యోనో యాప్ లేకపోతే గూగుల్ ప్లేస్టోర్ నుంచి ఉచితంగా డౌన్‌లోడ్ చేసుకోవచ్చు. తర్వాత నెట్ బ్యాంకింగ్ ద్వారా లాగిన్ అవ్వాలి. డెబిట్ కార్డు కూడా అవసరం పడొచ్చు. లాగిన్ అయిన తర్వాత షాప్ అండ్ ఆర్డర్‌లోకి వెళ్లాలి. అక్కడ ఆటోమాల్ అనే ఆప్షన్ ఉంటుంది. దీని ద్వారా మీరు ఈ ఆఫర్లు పొందొచ్చు.