Gold: తులం బంగారంపై రూ.3,000 తగ్గింపు... ఈరోజు మాత్రమే అవకాశం

1. రిజర్వ్ బ్యాంక్ ఆఫ్ ఇండియా-RBI మరోసారి సావరిన్ గోల్డ్ బాండ్స్ అమ్మకాలు మొదలుపెట్టింది. 2020-21 సిరీస్ సావరిన్ గోల్డ్ బాండ్స్ 6వ, ఆఖరి సబ్‌స్క్రిప్షన్ ఇది. సెప్టెంబర్ 4 వరకు గోల్డ్ బాండ్ అమ్మకాలు ఉంటాయి. (ప్రతీకాత్మక చిత్రం)

2. సావరిన్ గోల్డ్ బాండ్ ఒక గ్రాముకు రూ.5,117 ధర ఫిక్స్ చేసింది ఆర్‌బీఐ. ఆన్‌లైన్‌లో కొంటే రూ.50 డిస్కౌంట్ లభిస్తుంది. అంటే 1 గ్రాము బంగారాన్ని రూ.5,067 ధరకే కొనొచ్చు. (ప్రతీకాత్మక చిత్రం)

3. ప్రస్తుతం హైదరాబాద్‌లో స్వచ్ఛమైన బంగారం 10 గ్రాముల ధర రూ.53,600. అదే సావరిన్ గోల్డ్ బాండ్ 10 గ్రాములు కొంటే 50,670 చెల్లిస్తే చాలు. అంటే సుమారు రూ.3,000 తగ్గింపు పొందొచ్చు. (ప్రతీకాత్మక చిత్రం)

4. బంగారంపై ఇన్వెస్ట్ చేయాలనుకునేవారికి ఇదే మంచి అవకాశం. ఈ ఆర్థిక సంవత్సరంలో ఇదే ఆఖరి అవకాశం కూడా. ప్రతీసారి మార్కెట్ రేటు కన్నా సావరిన్ గోల్డ్ బాండ్‌లో బంగారం రేటు తక్కువగా ఉంటుంది. (ప్రతీకాత్మక చిత్రం)

5. ఇటీవల బంగారం రేటు బాగా పెరిగిపోవడంతో సావరిన్ గోల్డ్ బాండ్స్‌కి డిమాండ్ పెరిగింది. బంగారం అంటే భారతీయులకు పొదుపుతో పాటు పెట్టుబడి సాధనం కూడా. డబ్బు పొదుపు చేయడం, పెట్టుబడి పెట్టి లాభాలను ఆర్జించడం కోసం బంగారాన్ని కొంటూ ఉంటారు. (ప్రతీకాత్మక చిత్రం)

6. ఈ బంగారాన్ని బిస్కెట్ల రూపంలో కొంటారు. దాచుకుంటారు. అయితే ఈ ఫిజికల్ గోల్డ్‌ని దాచుకోవడం ఓ పెద్ద సమస్య. అందుకే సావరిన్ గోల్డ్ బాండ్ స్కీమ్‌ని రిజర్వ్ బ్యాంక్ ఆఫ్ ఇండియా నవంబర్ 2015న ప్రారంభించింది. ఫిజికల్ గోల్డ్‌కు ఉన్న డిమాండ్ తగ్గించడం కూడా ఓ కారణం. (ప్రతీకాత్మక చిత్రం)

7. సావరిన్ గోల్డ్ బాండ్స్ అమ్మకాలు రిజర్వ్ బ్యాంక్ ఆఫ్ ఇండియా ఆధ్వర్యంలో జరుగుతాయి. గోల్డ్ బాండ్స్‌ని బ్యాంకులు, ఎంపిక చేసిన పోస్ట్ ఆఫీసులు, ఎన్ఎస్ఈ, బీఎస్ఈ, స్టాక్ హోల్డింగ్ కార్పొరేషన్ ఆఫ్ ఇండియా లిమిటెడ్‌లో కొనొచ్చు. (ప్రతీకాత్మక చిత్రం)

8. ఓ వ్యక్తి ఆర్థిక సంవత్సరంలో కనీసం 1 గ్రాము నుంచి గరిష్టంగా 500 గ్రాముల వరకు గోల్డ్ బాండ్స్‌లో పెట్టుబడులు పెట్టొచ్చు. హిందూ అవిభాజ్య కుటుంబం గరిష్టంగా 4 కిలోల వరకు, ట్రస్టులు 20 కిలోల వరకు గోల్డ్ బాండ్స్ కొనొచ్చు. మైనర్ పేరు మీదా ఈ బాండ్ తీసుకోవచ్చు. (ప్రతీకాత్మక చిత్రం)

9. రూ.20,000 వరకు నగదు, అంతకన్నా ఎక్కువైతే డిమాండ్ డ్రాఫ్ట్, చెక్ లేదా ఎలక్ట్రానిక్ బ్యాంకింగ్ ద్వారా పేమెంట్స్ చేయొచ్చు. మీరు ఫిజికల్ గోల్డ్ కొనడానికి ఎలాంటి కేవైసీ నిబంధనలు ఉంటాయో అవే గోల్డ్ బాండ్స్ కొనడానికీ వర్తిస్తాయి. ప్రతీ దరఖాస్తుపైన ఇన్వెస్టర్ పాన్ నెంబర్ తప్పనిసరి. (ప్రతీకాత్మక చిత్రం)

10. గోల్డ్ బాండ్స్ కూడా ఓ పెట్టుబడి సాధనమే. వీటిని డిమాట్ రూపంలోకి మార్చుకోవచ్చు. వీటిని తాకట్టు పెట్టి రుణాలు కూడా తీసుకోవచ్చు. రిజర్వ్ బ్యాంక్ ఆఫ్ ఇండియా నిర్దేశించే గోల్డ్ లోన్‌కు సమానంతో గోల్డ్ బాండ్స్‌పై లోన్స్ తీసుకోవచ్చు. (ప్రతీకాత్మక చిత్రం)

11. ఒక్కసారి బాండ్ కొంటే ఎనిమిదేళ్ల లాక్-ఇన్ పీరియడ్ ఉంటుంది. ఎనిమిదేళ్ల తర్వాత అప్పుడు ఉన్న బంగారం ధరతో సమానంగా తిరిగి చెల్లిస్తారు. దాంతోపాటు వడ్డీ కూడా లభిస్తుంది. గోల్డ్ బాండ్స్‌పై వచ్చే వడ్డీకి ట్యాక్సులు చెల్లించాల్సి ఉంటుంది. (ప్రతీకాత్మక చిత్రం)

12. వీటిపై సంవత్సరానికి నామమాత్రపు విలువపై 2.5 శాతం వడ్డీ లభిస్తుంది. ఈ వడ్డీని ఆరు నెలలకోసారి చెల్లిస్తారు. బాండ్ జారీ చేసిన ఐదో ఏట అవసరం అనుకుంటే... బాండ్ ఇచ్చేసి డబ్బులు వెనక్కి తీసుకోవచ్చు. (ప్రతీకాత్మక చిత్రం)