Eas-E: రూ.5 లక్షల కన్నా తక్కువ ధరకే ఎలక్ట్రిక్ కారు.. ఒక్కసారి చార్జ్ చేస్తే 200 కి.మి. వెళ్లొచ్చు!

Electric Vehicle | మీరు కొత్త కారు కొనుగోలు చేయాలని భావిస్తున్నారా? అయితే మీకు గుడ్ న్యూస్. అదిరిపోయే ఆప్షన్ ఒకటి అందుబాటులో ఉంది. తక్కువ ధరలోనే మంచి ఎలక్ట్రిక్ కారును కొనుగోలు చేయొచ్చు. ఇంతకీ అది ఏ మోడల్ అని చూస్తున్నారా? అయితే ఈ దీని గురించి తెలుసుకోవాల్సిందే.

పీఎంవీ ఎలక్ట్రిక్ అనే ఈవీ స్టార్టప్ ఒకటి ఈస్ ఇ ఎలక్ట్రిక్ కారును మార్కెట్‌లో లాంచ్ చేసింది. దీని ఎక్స్‌షోరూమ్ ధర రూ. 4.79 లక్షలు. పీఎంవీ ఈస్ ఇ కారును మీరు కేవలం రూ. 2 వేల మొత్తంతో బుక్ చేసుకోవచ్చు.

కంపెనీ ప్రకారం చూస్తే.. ఈ కారు టాప్ స్పీడ్ గంటకు 70 కిలోమీటర్లు. ఇది 0 నుంచి 40 కిలోమీటర్ల వేగాన్ని కేవలం ఐదు సెకన్లలోనే అందుకుంటుంది. ఇది మూడు వేరియంట్ రూపంలో కస్టమర్లకు అందుబాటులో ఉంటుంది.

ఒక వేరియంట్ అయితే ఫుల్‌గా చార్జ్ చేస్తే 120 కిలోమీటర్లు వెళ్తుంది. మరో వేరియంట్ రేంజ్ 160 కిలోమీటర్లుగా ఉంది. ఇక టాప్ వేరియంట్ అయితే ఒక్కసారి చార్జింగ్ పెడితే 200 కిలోమీటర్లు దూసుకుపోతుంది.

ఈ ఎలక్ట్రిక్ కారు చార్జింగ్ టైమ్ 3 నుంచి 4 గంటలుగా ఉంది. ఇందులో ఇద్దరు పెద్ద వారు, ఒక చైల్డ్ కూర్చోవచ్చు. ఈ కారు దాదాపు 550 కేజీల వరకు బరువును మోయగలదు. ఈ కారులో 4జీ ఉంటుంది. పలు రకాల డ్రైవింగ్ మోడ్స్ ఉంటాయి.

ఇందులో రిమోట్ పార్కింగ్ అసిస్ట్, క్రూయిజ్ కంట్రోల్, రిమోట్ కనెక్టివిటీ, డయాగ్నసిస్, బ్లూటూత్ కనెక్టివిటీ, ఆన్‌బోర్డ్ నావిగేషన్ వంటి ఫీచర్లు ఉన్నాయి. ఇందులో ఐపీ 67 రేటింగ్ కలిగిన పర్మనెంట్ మ్యాగ్నైట్ సింక్రోనస్ మోటార్ ఉంది. దీని పవర్ 13 హెచ్‌పీ, టార్క్ 50 ఎన్ఎం.

ఈ కారు వెడల్పు 1157 ఎంఎం. ఇతర క్వాడ్రాలిక్ వెహికల్స్‌తో పోలిస్తే దీని వెడల్పు తక్కువనే చెప్పుకోవచ్చు. ఇకపోతే ఈ పీఎంవీ ఎలక్ట్రిక్ కారు పొడవు 2915 ఎంఎం, ఎత్తు 1600 ఎంఎం. దీని గ్రౌండ్ క్లియరెన్స్ 180 ఎంఎం.

ఇందులో మందు భాగంలో బ్లాంక్డ్ ఆఫ్ గ్రిల్ డిజైన్ కలిగి ఉంది. ఎల్ఈడీ డే టైమ్ రన్నింగ్ లైట్స్ ఉన్నాయి. టూ రౌండ్ హెడ్ ల్యాంప్స్ ఉన్నాయి. విండ్ స్క్రీన్ వైపర్ కూడా ఉంది. వెనుక భాగంలో ఎల్ఈడీ లైట్ బార్, టెయిల్ లైట్స్, సర్క్యూలర్ యాక్సింలరీ ల్యాంప్స్ వంటివి ఉన్నాయి.

ఇది సింగిల్ డోర్ కారు. డ్యూయెల్ టోన్ కలర్‌లో ఉంటాయి. కారు లోపలి భాగంలో ఎల్‌సీడీ డిజిటల్ ఇన్‌స్ట్రుమెంట్ క్లస్టర్ ఉంటుంది. ఇన్ఫోటైన్‌మెంట్ డిస్‌ప్లే ఉంది. స్మార్ట్‌ఫోన్ కనెక్టివిటీ ఫీచర్ కూడా ఉందని చెప్పుకోవచ్చు.

ఇంకా ఇందులో రీజరేటివ్ బ్రేకింగ్, సింగిల్ పెడల్ డ్రైవింగ్, రిమోట్ పార్కింగ్ అసిస్ట్, ఫాలో మీ హోమ్ లైట్స్ వంటి పీచర్లు కూడా ఉన్నాయని చెప్పుకోవచ్చు. ఈ కారుకు బజాజ్ క్యూట్ పోటీగా నిలిచే అవకాశం ఉంది. కంపెనీ వెబ్‌సైట్‌కు వెళ్లి ఈ కారును బుక్ చేసుకోవచ్చు.