UPI International: ఫోన్‌పే వాడే వారికి గుడ్ న్యూస్.. 2 కొత్త సర్వీసులు!

UPI Payments | మీరు యూపీఐ పేమెంట్స్ యాప్ ఫోన్‌పే ఉపయోగిస్తున్నారా? అయితే గుడ్ న్యూస్. ఎందుకంటే కొత్త సర్వీసులు అందుబాటులోకి వచ్చాయి. ఫోన్‌పే వాడే వారు ఇకపై అంతర్జాతీయంగా పేమెంట్లు చేయొచ్చు. కంపెనీ తాజాగా ఈ విషయాన్ని వెల్లడించింది.

యూపీఐ ఇంటర్నేషనల్ పేమెంట్స్ సర్వీసులు అందుబాటులోకి తీసుకువచ్చినట్లు డిజిటల్ పేమెంట్స్ సంస్థ ఫోన్‌పే ప్రకటించింది. ఈ కొత్త సర్వీసుల్లో భాగంగా ఫోన్‌పే యూజర్లు ఇకపై విదేశీ మర్చంట్లకు చెల్లింపులు చేయొచ్చని వెల్లడించింది. యూనిఫైడ్ పేమెంట్స్ ఇంటర్‌ఫేస్ (యూపీఐ) ఇన్‌ఫ్రాస్ట్రక్చర్ ప్లాట్‌ఫామ్ ద్వారా ఈ సేవలు లభిస్తాయని వివరించింది.

యునైటెడ్ అరబ్ ఎమిరేట్స్ (యూఏఈ), సింగపూర్, మారిషస్, నేపాల్, భూటన్ వంటి దేశాల్లో ఈ సేవలు అందుబాటులో ఉంటాయని ఫోన్‌పే వెల్లడించింది. దీని వల్ల ఫోన్‌పే వాడే వారు ఈజీగా ఇంటర్నేషనల్ పేమెంట్స్ నిర్వహించొచ్చు.

ఫోన్‌పే ప్రకారం చూస్తే.. ఫోన్‌పే వాడే వారు నేరుగా వారి బ్యాంక్ అకౌంట్ నుంచే విదేశీ కరెన్సీ రూపంలో పేమెంట్లు నిర్వహించొచ్చు. ఇంటర్నేషనల్ డెబిట్ కార్డుల ద్వారా ఎలాగైతే లావాదేవీలు నిర్వహిస్తామో.. అలానే ఇప్పుడు ఫోన్‌పే ద్వారా చెల్లింపులు చేయొచ్చు.

‘యూపీఐ ఇంటర్నేషనల్ అనేది అతి కీలకమైనది. అంతర్జాతీయ స్థాయిలో ఇతర దేశాలు కూడా యూపీఐ సేవల పనితీరును తెలుసుకుంటాయి. ఇది గేమ్ ఛేంజర్. దీని వల్ల ఇండియన్స్ విదేశాలకు వెళ్లినప్పుడు చాలా ఈజీగా పేమెంట్లు చేయొచ్చు’ అని ఫోన్‌పే కో - ఫౌండర్, చీఫ్ టెక్నాలజీ ఆఫీసర్ రాహుల్ చారి తెలిపారు.

వాల్‌మార్ట్‌కు చెందిన ఫిన్‌టెక్ కంపెనీగా కొనసాగుతూ వస్తున్న ఫోన్‌పేకు 43.5 కోట్లకు పైగా యూజర్లు ఉన్నారు. అలాగే 3.5 కోట్ల మంది ఆఫ్‌లైన్ మర్చంట్లను కలిగి ఉంది. యూపీఐ మార్కెట్‌లో కూడా అధిక వాటాను కలిగి ఉంది.

తాజా కొత్త సర్వీసుల ఆవిష్కరణ కారణంగా ఫోన్‌పే మార్కెట్ వాటా మరింత పెరిగే అవాకాశం ఉంది. మరోవైపు నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ) కూడా యూపీఐ సేవలను అంతర్జాతీయంగా విస్తరించడానికి అవసరమైన చర్యలు తీసుకుంటూ వస్తోంది.

గత నెలలో ఎన్‌పీసీఐ ఒక సర్క్యూలర్ జారీ చేసింది. దీని ప్రకారం.. నాన్ రెసిడెంట్ ఇండియన్స్ (ఎన్ఆర్ఐ) కూడా యూపీఐ సర్వీసులు వాడుకోవచ్చు. ఇంటర్నేషనల్ నెంబర్స్‌పై బ్యాంక్ అకౌంట్లను లింక్ చేసుకొని యూపీఐ సేవలు పొందొచ్చని తెలిపింది. ఎన్ఆర్ఈ, ఎన్ఆర్‌వో అకౌంట్లకు ఈ సేవలు లభిస్తాయి.

ఆస్ట్రేలియా, సింగపూర్, యూఏఈ, యూకే, యూఎస్‌, ఖతర్, ఇతర దేశాలకు చెందిన ఇంటర్నేషనల్ మొబైల్ నెంబర్లకు యూపీఐ సేవలు అందుబాటులో ఉండేలా ఎన్‌పీసీఐ నిర్ణయం తీసుకుంది. అలాగే ఫ్రాన్స్‌కు చెందిన మల్టీ నేషనల్ పేమెంట్స్ కంపెనీ వరల్డ్ లైన్‌తో కూడా భాగస్వామ్యం కుదుర్చుకుంది.

అంతేకాకుండా ఫోన్‌పే తన ప్లాట్‌ఫామ్‌పై యూపీఐ లైట్ సేవలు కూడా అందుబాటులోకి తీసుకురానుందని తెలుస్తోంది. దీని ద్వారా తక్కువ విలువ ట్రాన్సాక్షన్లు నిర్వహించొచ్చు. రూ.200 వరకు ట్రాన్సాక్షన్లను పిన్ లేకుండా నిర్వహించొచ్చు.