PAN- Aadhaar Link: 10 రోజులే గడువు.. వెంటనే పాన్, ఆధార్ లింక్ చేసుకోండిలా..

భారీ మొత్తంలో క్యాష్ ట్రాన్సాక్షన్స్ చేయడానికి, ఐటీ రిటర్న్స్ ఫైల్ చేయడానికి, ఇంకా అనేక అవసరాలకు పాన్ (పర్మినెంట్ అకౌంట్ నంబర్) కార్డు తప్పనిసరి. ఇటీవల పాన్ కార్డు ప్రాధాన్యతను పెంచేలా కేంద్ర ప్రభుత్వం చర్యలు తీసుకుంది. అలాగే దీన్ని ఆధార్ కార్డుతో లింక్ చేయాలని స్పష్టం చేసింది.

అందుకు గడువు మార్చి 31గా నిర్ణయించిన సంగతి తెలిసిందే. అంటే ఆధార్‌, పాన్ లింక్ చేసేందుకు గడువు మరో పది రోజుల్లో ముగియనుంది. ఈ నేపథ్యంలో ఈ రెండు డాక్యుమెంట్స్‌ను ఎలా లింక్ చేయాలి? ఒకవేళ చేయకపోతే ఎదురయ్యే పరిణామాలేంటో తెలుసుకుందాం.

పాన్-ఆధార్ లింక్ గడువును ప్రభుత్వం ఇప్పటికే చాలాసార్లు పొడిగించింది. మార్చి 31 తరువాత మళ్లీ పొడిగించే అవకాశం ఉండకపోవచ్చు. దీంతో పాన్-ఆధార్ లింక్ చేయనివారు వెంటనే ఈ ప్రక్రియ పూర్తి చేయడం బెటర్. ఒకవేళ ఇలా చేయకపోతే ఏప్రిల్ 1 నుంచి వారి పాన్‌కార్డ్ పనిచేయకపోవచ్చు. ఫలితంగా దీన్ని ఉపయోగించి ఎలాంటి ఆర్థిక లావాదేవీలు జరపడానికి అవకాశం ఉండదు.

* లింక్ చేయకపోతే ఎదురయ్యే పరిణామాలు : ఆధార్‌తో పాన్‌ను లింక్ చేయకపోతే అనేక సమస్యలు ఏర్పడే అవకాశం ఉంది. ముఖ్యంగా లింక్ చేయని కారణంగా పాన్ చెల్లుబాటు కాదు. దీంతో ఐటీ రిటర్న్స్ ఫైల్ చేయలేరు. ఇప్పటికే పెండింగ్‌లో ఉన్న రిటర్న్స్ కూడా ప్రాసెస్ కావు. అలాగే పెండింగ్‌లో ఉన్న రిఫండ్స్ సైతం జారీ చేయడం సాధ్యం కాదు. పెండింగ్ ప్రొసీడింగ్స్ క్లియర్ చేయడానికి వీలుపడదు.

* ఆధార్‌తో పాన్ లింక్ ఇలా : ఆదాయపు పన్ను శాఖ ఇ-ఫైలింగ్ పోర్టల్‌ ద్వారా ఆన్‌లైన్‌లో ఆధార్, పాన్ లింక్ చేసుకోవచ్చు. ఇందుకు ఫాలో అవ్వాల్సిన ప్రాసెస్ ఇదే..

స్టెప్- 1: ముందు ఆదాయపు పన్ను శాఖ ఇ-ఫైలింగ్ వెబ్‌సైట్ incometaxindiaefiling.gov.in విజిట్ చేయాలి.

స్టెప్- 2: హోమ్ పేజీలో లింక్ యువర్ పాన్ (Link Your Pan) అనే ఆప్షన్‌పై క్లిక్ చేయాలి. ఇప్పుడు కొత్త పేజీ ఓపెన్ అవుతుంది. అక్కడ మీ పాన్ కార్డు నంబర్‌, యూజర్ ఐడీగా ఎంటర్ చేయాలి.

స్టెప్- 3: ఒకవేళ మీరు ఇంతకు ముందు రిజిస్టర్ కాకపోతే రిజిస్ట్రేషన్ ప్రాసెస్ పూర్తయ్యాక లాగిన్ కావాల్సి ఉంటుంది.

స్టెప్- 4: ఆ తరువాత లింక్ పాన్ విత్ ఆధార్ (Link PAN with Aadhaar) అనే పాపప్ వస్తుంది. అక్కడ క్లిక్ చేసి ఆధార్‌తో పాన్ లింక్ చేసుకోవచ్చు. పాపప్ రాకపోతే మెనూబార్‌లో ప్రొఫైల్ సెటింగ్స్‌లో లింక్ ఆధార్‌పై క్లిక్ చేయండి.

స్టెప్- 5: పాన్ కార్డు ప్రకారం అక్కడ మీ పేరు, డేట్ ఆఫ్ బర్త్ సహా మరిన్ని వివరాలు కనిపిస్తాయి. ఆధార్ వివరాలతో వాటిని చెక్ చేసుకోండి. సరిపోతే ఆధార్ నంబర్ ఎంటర్ చేసి.. ‘లింక్ నౌ’ ఆప్షన్‌పై క్లిక్ చేయండి. అనంతరం ఆధార్‌తో పాన్ కార్డు లింక్ అయిందని ఓ పాపప్ మెసేజ్ కనిపిస్తుంది.

కాగా, ఆధార్‌తో పాన్ లింక్‌ను SMS ద్వారా, ఆఫ్‌లైన్‌లో కూడా చేసుకోవచ్చు. SMS లింక్ కోసం ముందుగా స్మార్ట్ ఫోన్‌లో మెసేజ్ యాప్ ఓపెన్ చేయాలి. అందులో UIDPAN < SPACE > <12-అంకెల ఆధార్ నంబర్ > < SPACE > < 10-అంకెల పాన్ నంబర్ > ఎంటర్ చేసి 567678 లేదా 56161కి SMS చేసి పాన్‌ను ఆధార్‌తో లింక్ చేయవచ్చు. ఇక ఆఫ్‌లైన్‌లో లింక్ కోసం సమీపంలోని పాన్ లేదా ఆధార్ సెంటర్‌ను విజిట్ చేయాల్సి ఉంటుంది.