Petrol Diesel Rates: గుడ్ న్యూస్.. పెట్రోల్, డీజిల్ ధరలు భారీ తగ్గింపు? కేంద్రం శుభవార్త చెప్పబోతోందా?

Petrol Price | కేంద్ర ప్రభుత్వం తీపికబురు అందించబోతోందా? పెట్రోల్, డీజిల్ ధరలను తగ్గించేందుకు రెడీ అవుతోందా? వెలువడుతున్న నివేదికల ప్రకారం చూస్తే.. అవుననే సమాధానం వినిపిస్తోంది. మోదీ సర్కార్ పెట్రోల్, డీజిల్‌పై ట్యాక్స్ తగ్గించనుందని తెలుస్తోంది. ఇదే జరిగితే వాహనదారులకు ఊరట లభిస్తుందని చెప్పుకోవచ్చు. ఎందుకంటే దేశంలో ఫ్యూయెల్ రేట్లు గరిష్ట స్థాయిల్లోనే ఉన్నాయి.

రిటైల్ ద్రవ్యోల్బణాన్ని తగ్గించడానికి దేశీ కేంద్ర బ్యాంక్ రిజర్వు బ్యాంక్ ఆఫ్ ఇండియా (ఆర్‌బీఐ) కీలక పాలసీ రేట్లను పెంచుకుంటూ వస్తోంది. అలాగే ఆర్‌బీఐ కూడా కేంద్రానికి పలు సూచనలు చేసినట్లు నివేదికలు పేర్కొంటున్నాయి.

ఆర్‌బీఐ సిఫార్సులకు అనుగుణంగా కేంద్ర ప్రభుత్వం మొక్కజొన్న, ఫ్యూయెల్ వంటి కొన్నింటిపై పన్నులు తగ్గించే ప్రతిపాదనను పరిశీలిస్తోందని, ఈ అంశంతో సంబంధం ఉన్న ఇద్దరు వ్యక్తులు ఈ విషయాన్ని వెల్లడించినట్లు రాయిటర్స్‌ పేర్కొంది.

రాయిటర్స్ కథనం ప్రకారం.. భారత ప్రభుత్వం ఫిబ్రవరి నెల ద్రవ్యోల్బణ గణాంకాలు వెల్లడి అయిన తర్వాతనే ఏదో ఒక నిర్ణయం తీసుకోవచ్చని సంబంధిత వర్గాలు పేర్కొన్నాయి. దేశంలో జనవరి నెలలో రిటైల్ ద్రవ్యోల్బణం 6.52 శాతానికి చేరింది. డిసెంబర్ నెలలో ఇది 5.72 శాతంగా నమోదు అయ్యింది.

’ఆహార ద్రవ్యోల్బణం గరిష్ట స్థాయిల్లోనే కదలాడే ఛాన్స్ ఉంది. పాల ధరలు పెరిగాయి. మొక్కజొన్న, సోయా ఆయిల్ వంటి వాటి వల్ల ద్రవ్యోల్బణం సమీక కాలంలో పెరిగే ఛాన్స్ ఉంది’ అని ఈ విషయంపై సెంట్రల్ బ్యాంక్, ప్రభుత్వ ఆలోచన గురించి తెలిసిన సీనియర్ సోర్స్ ఒకరు చెప్పారు.

ప్రభుత్వం మొక్కజొన్న వంటి పలు ప్రొడక్టులపై దిగుమతి సుంకాలను తగ్గించొచ్చని ఆయన పేర్కొన్నారు. అలాగే ఫ్యూయెల్‌పై పన్నుల్లో కోత విధించొచ్చని తెలిపారు. అందువల్ల ఇదే జరిగితే చాలా మందికి ఊరట కలుగుతుందని చెప్పుకోవచ్చు.

కాగా ఈ అంశానికి సంబంధించి రాయిటర్స్ అటు ఆర్‌బీఐని, ఇటు ఆర్థిక మంత్రిత్వ శాఖను సంప్రదిస్తే.. ఎలాంటి స్పందన రాలేదు. కాగా గ్లోబల్ మార్కెట్‌లో క్రూడ్ ఆయిల్ ధరలు తగ్గాయి. గత కొన్ని నెలలుగా స్థిరపడుతూ వస్తున్నాయి.

అయినా కూడా ఆయిల్ మార్కెటింగ్ కంపెనీలు మాత్రం ఆ ప్రయోజనాన్ని వినియోగదారులకు అందించడం లేదు. కేంద్రం ట్యాక్స్‌లు తగ్గిస్తే.. దాని వల్ల ఆయిల్ కంపెనీలు ధరల తగ్గింపు రూపంలో వాహనదారులకు ప్రయోజనం కలిగిస్తాయి.

కాగా జనవరి నెలలో రిటైల్ ద్రవ్యోల్బణం ఆర్‌బీఐ అప్పర్ టార్గెట్ లిమిట్ 6 శాతం కన్నా ఎక్కువగా నమోదు అయ్యింది. అక్టోబర్ నుంచి చూస్తే.. ఈ స్థాయిలో ద్రవ్యోల్బణం నమోదు కావడం ఇదే తొలిసారి. ఈ క్రమంలో ఫిబ్రవరి నెల ద్రవ్యోల్బణ గణాంకాల తర్వాత కేంద్రం ఫ్యూయెల్‌పై ట్యాక్స్ తగ్గింపుపై ఒక నిర్ణయం తీసుకోవచ్చని తెలుస్తోంది.