LIC: ఎల్ఐసీ దగ్గర మీ పాలసీ డబ్బులున్నాయా? ఇలా క్లెయిమ్ చేసుకోండి

1. లైఫ్ ఇన్స్యూరెన్స్ కార్పొరేషన్ ఆఫ్ ఇండియా (LIC) దగ్గర రూ.21,336 కోట్ల అన్‌క్లెయిమ్డ్ ఫండ్స్ ఉన్నట్టు ఇటీవల లెక్కతేలింది. ఐపీఓ కోసం ఫిబ్రవరిలో ఎల్ఐసీ డ్రాఫ్ట్ రెడ్ హెర్రింగ్ ప్రాస్పెక్టర్ (DRHP) ఫైల్ చేసినప్పుడు 2021 సెప్టెంబర్ నాటికి రూ.21,539 కోట్ల అన్‌క్లెయిమ్డ్ ఫండ్స్ ఉన్నాయని ప్రకటించింది. ఆ తర్వాత 2021 డిసెంబర్ నాటికి రూ.21,336 కోట్ల అన్‌క్లెయిమ్డ్ ఫండ్స్ ఎల్ఐసీ దగ్గర ఉన్నాయని లెక్కతేలింది. (ప్రతీకాత్మక చిత్రం)

2. ఎల్ఐసీ దగ్గర అన్‌క్లెయిమ్స్ ఫండ్స్ ఇలా పేరుకుపోవడానికి కారణం పాలసీదారులు తమ డబ్బుల్ని క్లెయిమ్ చేసుకోకపోవడమే. ఎల్ఐసీ పాలసీకి డబ్బులు చెల్లించిన విషయం మర్చిపోవడం, కొన్నేళ్లు ప్రీమియం చెల్లించి ఆపేయడం, పాలసీహోల్డర్ మరణిస్తే వారి పాలసీ గురించి నామినీకి లేదా వారి కుటుంబ సభ్యులకు తెలియకపోవడం లాంటి పలు కారణాలతో ఎల్ఐసీ పాలసీలు క్లెయిమ్ కాకుండా మిగిలిపోతాయి. (ప్రతీకాత్మక చిత్రం)

3. ఇలా క్లెయిమ్ కాని పాలసీల డబ్బంతా ఎల్ఐసీ అన్‌క్లెయిమ్డ్ ఫండ్స్‌లోకి వెళ్తాయి. ఎల్ఐసీతో పాటు ఇతర ఇన్స్యూరెన్స్ కంపెనీల దగ్గర కూడా అన్‌క్లెయిమ్డ్ ఫండ్స్ ఉంటాయి. రూ.1,000 లేదా అంతకన్నా ఎక్కువ అన్‌క్లెయిమ్డ్ అమౌంట్ ఉంటే ఆ వివరాలను సదరు ఇన్స్యూరెన్స్ సంస్థ తమ వెబ్‌సైట్‌లో తప్పనిసరిగా వెల్లడించాలి. పాలసీహోల్డర్లు అన్‌క్లెయిమ్డ్ అమౌంట్ వివరాలు చెక్ చేసి డబ్బులు క్లెయిమ్ చేసుకోవచ్చు. (ప్రతీకాత్మక చిత్రం)

4. ఎవరైనా పాలసీహోల్డర్ 10 ఏళ్ల తర్వాత కూడా పాలసీ డబ్బుల్ని క్లెయిమ్ చేసుకోకపోతే కేంద్ర ఆర్థిక శాఖ నిబంధనల ప్రకారం ప్రకారం ఆ నిధులన్నీ సీనియర్ సిటిజన్ వెల్ఫేర్ ఫండ్‌కు ట్రాన్స్‌ఫర్ అవుతాయి. ఒక వేళ మీరు గతంలో చెల్లించిన ఎల్ఐసీ పాలసీ డబ్బుల్ని క్లెయిమ్ చేసుకోకపోతే ఆ వివరాలు ఎల్ఐసీ వెబ్‌సైట్‌లో చెక్ చేయొచ్చు. మీ డబ్బుల్ని మీరు క్లెయిమ్ చేసుకోవచ్చు. ఎలాగో తెలుసుకోండి. (ప్రతీకాత్మక చిత్రం)

5. ముందుగా ఎల్ఐసీ అధికారిక వెబ్‌సైట్ https://licindia.in/ ఓపెన్ చేయాలి. హోమ్ పేజీలో కిందకు స్క్రోల్ చేసి Unclaimed Amounts of Policyholders లింక్ పైన క్లిక్ చేయాలి. కొత్త పేజీ ఓపెన్ అవుతుంది. అందులో ఎల్ఐసీ పాలసీ నెంబర్, పాలసీ హోల్డర్ పేరు, పుట్టిన తేదీ, పాన్ కార్డ్ నెంబర్ ఎంటర్ చేయాలి. ఈ వివరాలు అందుబాటులో లేకపోతే పాలసీ హోల్డర్ పేరు, పుట్టిన తేదీ ఎంటర్ చేసినా చాలు. ఆ తర్వాత Submit పైన క్లిక్ చేయాలి. అన్‌క్లెయిమ్డ్ ఫండ్‌లో మీ పాలసీకి సంబంధించిన డబ్బులు ఉన్నట్టైతే ఆ వివరాలు తెలుస్తాయి. (ప్రతీకాత్మక చిత్రం)

6. ఎల్ఐసీ దగ్గర అన్‌క్లెయిమ్స్ ఫండ్స్ ఇంతలా ఉండటం కొత్తేమీ కాదు. 2019 ఆర్థిక సంవత్సరంలో రూ.13,843.70 కోట్లు, 2020 ఆర్థిక సంవత్సరంలో రూ.16,052.65 కోట్లు, 2021 ఆర్థిక సంవత్సరంలో రూ.18,495.32 కోట్లు అన్‌క్లెయిమ్డ్ ఫండ్స్ ఉన్నాయని లెక్కలు చెబుతున్నాయి. (ప్రతీకాత్మక చిత్రం)