RBI Repo Rate Hike: ఆర్‌బీఐ షాక్.. మీ పర్సనల్, హోమ్, కార్ లోన్ ఈఎంఐలు ఎంత పెరుగుతాయంటే?

Interest Rates | ఆర్‌బీఐ రెపో రేటు పెంపు నేపథ్యంలో రానున్న కాలంలో హోమ్ లోన్, వెహికల్ లోన్, పర్సనల్ లోన్ ఈఎంఐలు కూడా పైకి చేరే అవకాశం ఉంది. ఆర్‌బీఐ తాజాగా రెపో రేటును 35 బేసిస్ పాయింట్ల మేర పెంచేసిన విషయం తెలిసిందే. దీంతో ఆర్‌బీఐ రెపో రేటు 6.25 శాతానికి చేరింది.

ఆర్‌బీఐ రెపో రేటు పెంపు నేపథ్యంలో బ్యాంకులు, నాన్ బ్యాంకింగ్ ఫైనాన్స్ కంపెనీలు రుణ రేట్లను పెంచేందుకు రెడీ కాబోతున్నాయి. ఇప్పటికే పలు బ్యాంకులు ఈ మేర రుణ రేట్లు పెంచుతున్నట్లు ప్రకటించేశాయి.

రిజర్వు బ్యాంక్ రెపో రేటు పెంపు నేపథ్యంలో మనం ఏ ఏ రుణాలపై ఎంత వరకు వడ్డీ భారం పెరుగుతుందో ఒకసారి తెలుసుకుందాం. పర్సనల్ లోన్, హోమ్ లోన్, కారు లోన్ ఇలా వేటి వేటిపై ఈఎంఐలు ఎంత పెరుగుతాయో తెలుసుకుందాం.

ఉదాహరణకు మీరు రూ. లక్ష మొత్తాన్ని హోమ్ లోన్‌ కోసం తీసుకున్నారని అనుకుందాం. వడ్డీ రేటు 8.4 శాతం. దీనికి నెలవారీ ఈఎంఐ 20 ఏళ్ల టెన్యూర్‌కు గానూ రూ.862గా ఉంటుంది. ఇప్పుడు 35 బేసిస్ పాయింట్ల మేర వడ్డీ రేటు పెరిగింది. అంటే వడ్డీ రేటు 8.75 శాతానికి చేరింది.

ఇప్పుడు రూ.లక్ష మొత్తానికి నెలవారీ ఈఎంఐ రూ. 884 అవుతుంది. అంటే రుణ గ్రహీతలకు రూ.లక్ష మొత్తానికి రూ. 22 అదనంగా చెల్లించాల్సి ఉంటుంది. ఇలా ఒక్కొక్కరు రూ.లక్షల్లో లోన్ తీసుకొని ఉంటారు. అంటే ఈఎంఐ కూడా ఎంత మేర పెరుగుతుందో అర్థం చేసుకోవచ్చు.

ఇక పర్సనల్ లోన్ విషయానికి వస్తే.. మీరు ఐదేళ్ల టెన్యూర్‌తో రూ. లక్ష మొత్తాన్ని రుణంగా తీసుకున్నారని అనుకుందాం. ఇప్పుడు 10.65 శాతం పరంగా చూస్తే.. నెల వారీ ఈఎంఐ రూ. 2157 అవుతుంది.

అయితే ఇప్పుడు వడ్డీ రేటు 35 బేసిస్ పాయింట్లు పెరగడం వల్ల ప్రతి నెలా రూ. 17 మేర అదనంగా చెల్లించాల్సి వస్తుంది. ఇక కార్ లోన్ విషయానికి వస్తే.. మీరు రూ. లక్ష మొత్తాన్ని రుణంగా తీసుకొని ఉ:టే.. ఐదేళ్ల టెన్యూర్‌కు 8.4 శాతం వడ్డీ రేటు పరంగా అయితే నెలవారీ ఈఎంఐ రూ. 2047 అవుతుంది. రేటు పెంపు తర్వాత చూస్తే.. నెలకు రూ. 2064 కట్టాల్సి వస్తుంది.

అలాగే ఉదాహరణకు 8.5 శాతం వడ్డీ రేటు ప్రకారం రూ. 10 లక్షల మొత్తాన్ని పదేళ్ల టెన్యూర్‌తో రుణంగా తీసుకొని ఉంటే.. ఇప్పుడు వడ్డీ రేటు 0.35 శాతం పెరిగితే నెలవారీ ఈఎంఐ రూ. 300 పైకి చేరుతుంది. అంటే రెపో రేటు పెంపు వల్ల ఈఎంఐ మొత్తం ఏ విధంగా పైపైకి చేరుతుందో అర్థం చేసుకోవచ్చు. బ్యాంకులు ఈఎంఐ పెంచొచ్చు. లేదంటే టెన్యూర్‌ను పొడిగించొచ్చు.