Gold Rate Today: బంగారం కొనే వారికి పిడుగులాంటి వార్త.. రూ.60 వేలు దాటేసిన ధర, ఈరోజు కొత్త రేట్లు ఇలా!

Gold Prices | బంగారం ధర కొత్త రికార్డులు క్రియేట్ చేస్తోంది. పసిడి రేటు ఆల్‌టైమ్ గరిష్టాన్ని నమోదు చేసింది. నేడు గోల్డ్ రేటు ఏకంగా రూ. 60 వేలు దాటిపోయింది. దీంతో బంగారం కొనే వారిపై తీవ్ర ప్రతికూల ప్రభావం పడుతోందని చెప్పుకోవచ్చు.

అంతర్జాతీయ మార్కెట్‌లో బంగారం ధరలు పరుగులు పెట్టడంతో ఆ ప్రభావం దేశీ మార్కెట్‌పై కూడా పడిందని బులియన్ మార్కెట్ నిపుణులు పేర్కొంటున్నారు. అందుకే మన దేశంల కూడా బంగారం ధరలు పెరిగాయని తెలియజేస్తున్నాయి.

హైదరాబాద్ మార్కెట్‌లో బంగారం ధరలు కొండెక్కి కూర్చున్నాయి. గోల్డ్ రేట్లు ఆకాశాన్నితాకాయి. పది గ్రాముల 24 క్యారెట్ల బంగారం ధర భారీగా పెరిగింది. ఒకే రోజు రూ. 1630 మేర ర్యాలీ చేసింది. దీంతో పసిడి రేటు రూ. 60,320 స్థాయికి చేరింది. పది గ్రాముల 24 క్యారెట్ల బంగారానికి ఇది వర్తిస్తుంది.

అదేసమయంలో 22 క్యారెట్ల బంగారం ధర విషయాన్ని వస్తే.. ఈ ఆర్నమెంటల్ గోల్డ్ రేటు నేడు రూ. 1500 మేర పెరిగింది. దీంతో ఈ పసిడి రేటు ఏకంగా రూ. 55,300 స్థాయికి చేరింది. బంగారం ధర గత మూడు రోజుల్లో దాదాపు రూ. 2,500 వరకు పెరిగాయి.

బంగారం ధర బాటలోనే వెండి రేటు కూడా పయనించింది. సిల్వర్ రేటు నేడు భారీగా పెరిగింది. ఏకంగా రూ. 1300 వరకు పైకి చేరింది. దీంతో వెండి ధర ఈరోజు రూ. 74,400కు చేరింది. వెండి రేటు గత వారం రోజులుగా పైపైకి కదులుతూనే వస్తోంది.

కాగా పైన పేర్కొన్న బంగారం ధరలకు వస్తు సేవల పన్ను జీఎస్‌టీ అదనం. అలాగే తయారీ చార్జీలు కూడా ఉంటాయి. అందువల్ల వీటిని కూడా కలుపుకుంటే.. బంగారం ధరలు మరింత పైకి చేరుతాయని చెప్పుకోవచ్చు.

మరోవైపు అంతర్జాతీయ మార్కెట్‌లో బంగారం ధరలు దూసుకుపోతున్నాయి. పసిడి రేటు ఏకంగా 3 శాతానికి పైగా పెరిగింది. గ్లోబల్ మార్కెట్‌లో బంగారం ధర 3.68 శాతం మేర పెరిగింది. దీంతో బంగారం ధర ఔన్స్‌కు 1993 డాలర్ల పైకి కదిలింది. అలాగే వెండి రేటు 4.88 శాతం ర్యాలీ చేసింది. దీంతో వెండి ధర ఔన్స్‌కు 22.75 డాలర్లకు చేరింది.

కాగా బంగారం ధరలు రానున్న కాలంలో మరింత పెరగొచ్చనే అంచనాలు ఉన్నాయి. పసిడి గ్రాములకు రూ. 65 వేలకు చేరొచ్చని నిపుణులు పేర్కొంటున్నారు. అమెరికా డాలర్ బలహీనపడటం, సిలికాన్ వ్యాలీ బ్యాంక్ పతనం వంటి పలు అంశాలు బంగారం ధర పరుగుకు దోహదపడుతున్నాయని తెలియజేస్తున్నారు. దీంతో బంగారం కొనే వారిపై ప్రతికూల ప్రభావం పడుతోందని చెప్పుకోవచ్చు.