Bank Charges: కస్టమర్లకు భారీ షాక్.. ఈ 9 సర్వీసులపై చార్జీలు పెంచేసిన బ్యాంక్!

Bank News | ప్రభుత్వ రంగానికి చెందిన దిగ్గజ బ్యాంకుల్లో ఒకటైన కెనరా బ్యాంక్ తాజాగా చార్జీలను సవరించింది. సర్వీస్ చార్జీల్లో మార్పులు చేసింది. ఈ చార్జీల సవరణ నిర్ణయం ఫిబ్రవరి 3 నుంచి అమలులోకి వస్తుందని బ్యాంక్ తెలిపింది.

బ్యాంక్ వెబ్‌సైట్ ప్రకారం చూస్తే.. చెక్ రిటర్న్, ఈసీఎస్ డెబిట్ రిటర్న్ చార్జీలు, యావరేజ్ మినిమమ్ బ్యాలెన్స్, నాన్ మెయింటెనెన్స్ ఆఫ్ యావరేజ్ మంత్లీ మినిమమ్ బ్యాలెన్స్, లెడ్జర్ ఫోలియో చార్జీలు, ఫండ్ ట్రాన్స్‌ఫర్ చార్జీలు వంటివి వాటిని సవరించింది.

చెక్ రిటర్న్ ఇన్‌వర్డ్, ఔట్‌వర్డ్, లోకల్, ఔట్‌స్టేషన్ సేవలకు సంబంధించి టెక్నికల్ రీజన్స్ వల్ల చెక్ రిటర్న్ జరిగితే ఎలాంటి చార్జీలు ఉండవు. అయితే ఇప్పుడు మాత్రం రూ. 1000లోపు చెక్ అమౌంట్ ఉంటే చార్జీ రూ. 200 చెల్లించుకోవాలి. అదే రూ. 1000 నుంచి రూ. 10 లక్షల మధ్యలో చెక్ అమంట్ ఉంటే రూ. 300 చార్జీ పడుతుంది.

అలాగే రూ. 10 లక్షల నుంచి రూ. 50 లక్షల మధ్యలో చెక్ అమౌంట్ ఉంటే రూ. 500 చార్జీ పడుతుంది. రూ. 50 లక్షల నుంచి రూ. కోటి మధ్యలో చెక్ అమౌంట్ ఉంటే రూ. 1000 కట్టాలి. ఇక రూ.కోటికి పైగా చెక్ అమౌంట్ అయితే రూ. 2 వేలు పడుతుంది.

ఈసీఎస్ డెబిట్ రిటర్న్ అయితే ఇకపై రూ. 1000లోపు అమౌంట్‌కు రూ. 300 చార్జీ చెల్లించాలి. రూ. 1000 నుంచి రూ. 5 వేల మధ్యలో అమౌంట్ అయితే రూ. 400 కట్టాలి. రూ. 5000 నుంచి రూ. 10 వేల మధ్యలో అమౌంట్ అయితే రూ. 450 చార్జీ చెల్లించాలి.

రూ. 10 వేల నుంచి రూ. లక్ష వరకు అమౌంట్ అయితే రూ. 475, రూ. లక్ష నుంచి రూ. 50 లక్షల అమౌంట్‌కు రూ. రూ.500 చార్జీ పడుతుంది. ఇక రూ. 50 లక్షలనుంచి రూ. కోటి వరకు అయితే రూ. 1000, రూ. కోటి పైన అయితే రూ. 2 వేలు చార్జీ చెల్లించాలి.

యావరేజ్ మంత్లీ బ్యాలెన్స్ విషయానికి వస్తే.. సేవింగ్స్ అకౌంట్ కలిగిన వారు కచ్చితంగా రూ. 500 కలిగి ఉండాలి. ఇది గ్రామీణ ప్రాంతాలకు వర్తిస్తుంది. అదే పాక్షిక పట్టణ ప్రాంతాల్లో అయితే మినిమమ్ బ్యాలెన్స్ రూ. 1000 ఉండాలి. ఇక పట్టణాలు, మెట్రో ప్రాంతాల్లో అయితే యావరేజ్ మినిమమ్ బ్యాలెన్స్ రూ. 2 వేలుగా ఉంది.

ఒకవేళ యావరేజ్ మినిమమ్ బ్యాలెన్స్ కలిగి లేకపోతే.. అప్పుడు మెట్రో, పట్టణ ప్రాంతాల్లోని కస్టమర్లు రూ. 1999 నుంచి రూ. 1500 వరకు అయితే రూ. 25 చెల్లించాలి. అదే రూ. 1499 నుంచి రూ.1000 వరకు అయితే రూ. 35 కట్టాలి. ఇక రూ. 999 లేదా అంత కన్నా తక్కువ అయితే రూ. 45 చెల్లించాలి.

పాక్షిక పట్టణ ప్రాంతాల్లో అయితే రూ. 999 నుంచి రూ. 700 అయితే రూ. 25 కట్టాలి. రూ. 699 నుంచి రూ. 400 వరకు అయితే రూ. 35 చెల్లించాలి. రూ. 399 నుంచి తక్కువ అయితే రూ. 45 చార్జీ పడుతుంది. ఇక గ్రామీణ ప్రాంతాల్లో రూ. 499 నుంచి రూ. 350 వరకు అయితే రూ. 25 కట్టాలి. రూ. 349 నుంచి రూ.200 వరకు అయితే రూ. 35 చెల్లించాలి. ఇక రూ. 199 నుంచి తక్కువ అయితే రూ. 45 చార్జీ పడుతుంది. జీఎస్‌టీ అదనంగా ఉంటుంది.

పేర్లు జత చేయడం లేదంటే తొలగించడానికి రూ. 100 చార్జీ పడుతుంది. దీనికి కూడా జీఎస్‌టీ అదనం. ఆన్‌లైన్‌లో అయితే ఎలాంటి చార్జీలు ఉండవు. జాయింట్ అకౌంట్ కలిగిన వారు మరణిస్తే.. పేరు తొలగింపునకు చార్జీలు ఉండవు.

ఇంటర్నెట్ లేదా మొబైల్ బ్యాంకింగ్ ఫండ్ ట్రాన్స్‌ఫర్ (ఐఎంపీఎస్) విషయానికి వస్తే.. రూ.1000లోపు అమౌంట్‌కు చార్జీలు ఉండవు. రూ. 1000 నుంచి రూ. 10 వేల వరకు అయితే రూ. 3, రూ. 10 వేల నుంచి రూ. 25 వేల వరకు రూ. 5, రూ. 25 వేల నుంచి రూ.లక్ష వరకు రూ. 8, రూ. లక్ష నుంచి రూ. 2 లక్షల వరకు రూ. 15, రూ. 2 లక్షల నుంచి రూ. 5 లక్షల వరకు రూ. 20 చార్జీలు చెల్లించాలి. జీఎస్‌టీ అదనం.

అకౌంట్ మొబైల్ నెంబర్, ఈమెయిల్, అడ్రస్ వంటివి మార్చుకోవాలని భావిస్తే.. రూ. 50 చార్జీ చెల్లించాలి. ఇక బీఎస్‌బీడీ అకౌంట్ కలిగిన వారికి నెలలో తొలి నాలుగు ఏటీఎం ట్రాన్సాక్షన్లు ఉచితంగా. ఈ లిమిట్ దాటితే ఒక్క విత్‌డ్రాయెల్‌కు రూ. 5 చార్జీ పడుతుంది.