Vastu Tips: తెలియని సమస్యలా? ఆర్థికంగా బలపడాలనుకుంటున్నారా? ఈ వాస్తు టిప్స్ తప్పక పాటించండి

మనిషి జీవితాన్ని జాతకం, వాస్తు (Vastu) వంటివి ప్రభావితం చేస్తాయి. చాలామంది జ్యోతిష్య పండితుల దగ్గర తమ జాతకాన్ని చూపించుకుంటారు. వారి సూచనల మేరకు పరిహారాలు చేయించుకుంటారు. వాస్తు కూడా అదే స్థాయిలో ప్రభావితం చేస్తుందని, చిన్న చిన్న టిప్స్ పాటించడం ద్వారా చికాకుల నుంచి బయటపడొచ్చని వాస్తు నిపుణులు చెబుతున్నారు.

ఆర్థికపరమైన, అనారోగ్య ఇబ్బందుల్లో చిక్కుకోకుండా ఉండేందుకు, ఆనంద, విలాసమైన జీవితం గడిపేందుకు కొన్ని వాస్తు సూత్రాలు పాటించమని ఆల్ ఇండియా ఇన్‌స్టిట్యూట్ ఆఫ్ అకల్ట్ సైన్స్ వాస్తు నిపుణుడు అంకుష్ మనోహర్ జిచ్కర్ సూచిస్తున్నారు. అవేంటో ఇందులో తెలుసుకుందాం.

* బ్రహ్మస్థానం : వాస్తుశాస్ర్తం ప్రకారం బ్రహ్మస్థానం అనేది ఇల్లు, కార్యాలయాల నిర్మాణాలలో కేంద్ర బిందువు లాంటిది. బ్రహ్మస్థానంలో బరువులు ఉంచకూడదు. ఈ ప్రదేశంలో ఎలాంటి నిర్మాణాలు చేపట్టకపోవడం మంచిది.

* ఆగ్నేయ దిశ (South east direction) : ఆగ్నేయ దిశకు అధిపతిగా అగ్ని కారకుడైన శుక్రుడును చెప్తారు. అందుచేత ఈ దిశలో అగ్ని సంబంధమైన వస్తువులు, పరికరాలు ఉండటం మంచింది. వంటగది కూడా ఉండొచ్చు. అగ్నికి వ్యతిరేకమైన నీరు, గాలి మూలకాలు ఉండకుండా చూసుకోవాలి. అవి ఉంటే ఆర్థిక సమస్యలకు కారణం అవ్వొచ్చు.

* ఈశాన్య దిశ (North east direction) : వాస్తుశాస్ర్తంలో ఈశాన్య దిశకు ప్రత్యేకమైన స్థానం ఉంది. దీన్ని అత్యంత శుభమైన ప్రదేశంగా భావిస్తారు. ఈశాన్యం అనేది జీవితకాల శ్రేయస్సు, ఆనందాన్ని ప్రసాదించే దిక్కుగా భావిస్తారు. అందుకే ఈ స్థానంలో ఎటువంటి బరువులు ఉంచరు. సింక్, టాయిలెట్, బాత్రూం వంటివి ఈ దిక్కులో ఉండకూడదు. ప్రవహించే నీరు ఉత్సాహానికి, సానుకూల దృక్పథానికి చిహ్నం.. కాబట్టి ఫౌంటేన్ లాంటిది ఉంటే మంచిదని, సుఖ, సంతోషాలతో ఉంటారని చెబుతున్నారు.

* ఉత్తర దిశ (North) : ఈ దిశ కుబేరునికి అంకితం చేయబడింది. డబ్బు, శ్రేయస్సుకు స్థానం. సింక్, బాత్రూమ్, టాయిలెట్ వంటివి ఈ స్థానానికి దూరంగా ఉండాలి.

* ప్రధాన ద్వారం : ఇంటికి ఇది ఎంతో కీలకం. ఎటువంటి శక్తి ప్రవాహమైన దీని గుండానే లోపలకు వస్తాయి. ప్రధాన ద్వారం సరైన దిశలో ఉన్నప్పుడే ఇంట్లో ఆనందం వెల్లివిరుస్తుంది. చాలామంది తూర్పు, ఉత్తర ముఖంగా ప్రధాన ద్వారాలు ఉండేలా చూసుకుంటారు.

* వార్డ్ రోబ్ : బీరువాల స్థానంలో వార్డ్ రోబ్‌లు వచ్చాయి. చాలామంది తమ వద్ద విలువైన సామగ్రిని ఇందులోనే ఉంచుతున్నారు. ఈ క్రమంలో ఇవి ఏ దశలో ఉన్నది.. అన్నది ముఖ్యం. ఇంటికి దక్షిణ దిశలో వార్డ్ రోబ్ ఉంటే మంచిది. దాని తలుపు ఉత్తర దిశలో తెరుచుకునేలా ఉండాలి.

* ఏ వైపు తలపెట్టి పడుకోవాలి? : పురాణాల ప్రకారం మన ఉత్తరం వైపు తల పెట్టుకుని పడుకోకూడదు. వాస్తు శాస్త్రం ప్రకారం తల దక్షిణం వైపు ఉండేలా చూసుకోండి. మీ మంచం ముందు ఎటువంటి అద్దాలు ఉంచకూడదు. అవి మీ ఆరోగ్యాన్ని, శక్తిని ప్రభావితం చేస్తాయి. (Disclaimer: ఈ కథనం ప్రజల విశ్వాసాలు, ఇంటర్నెట్‌లో ఉన్న సమాచారం ఆధారంగా మాత్రమే ఇవ్వబడింది. న్యూస్18 దీనిని ధృవీకరించలేదు. ఆధారాలు లేవు.)