MLA Roja: సమతామూర్తి విగ్రహాన్ని దర్శించుకున్న ఎమ్మెల్యే రోజా.. ఈ జన్మకిది చాలు అంటూ భావోద్వేగం

MLA Roja: వైసీపీ నగరి ఎమ్మెల్యే రోజా అవకాశం ఉన్న ప్రతిసారి ఆధ్యాత్మిక కార్యక్రమాల్లో పాల్గొనేందుకు ఇష్టపడతారు. ఆమెలో దైవ చింతన ఎక్కువగానే కనిపిస్తుంది. తాజాగా ఎమ్మెల్యే రోజా సమతామూర్తి భగవత్ రామానుజాచార్యుల విగ్రహాన్ని దర్శించారు. సంప్రదాయ చీరలో స్వామి విగ్రహాన్ని దర్శించుకుని.. ఆ ఫోటోలను సోషల్ మీడియాలో షేర్ చేశారు.

సమతామూర్తి దగ్గరికి రావడం చాలా సంతోషంగా ఉందన్నారు రోజా.. సమతామూర్తి సహస్రాబ్ది వేడుకలు చేయడం చాలా సాహసం అని రోజా అభిప్రాయపడ్డారు. ఇది ఎవరూ చేయలేరని అన్నారు. మన ఇళ్లలో ఒక్క యాగం చేయడమే గగనం అలాంటిది ఇక్కడ 1035 హోమ గుండాలతో హోమం చేయడం చాలా గొప్ప కార్యం అన్నారు.

ఇలాంటి అరుదైన కార్యక్రమాల్లో పాల్గొన్న ప్రతి ఒక్కరూ ఎంతో అదృష్టవంతులు అని రోజా అభిప్రాయపడ్డారు. భగవత్ రామానుజల వారి విగ్రహం చూస్తుంటే మనసుకు ఎంతో హాయిగా ఉంటుందన్నారు. ఒకేచోట 108 దివ్య దేవాలయాల నిర్మాణం, వాటిని ఒకే చోట దర్శనం చేసుకోవడం నిజంగా అదృష్టమే అని ఎమ్మెల్యే రోజా అన్నారు.

రంగారెడ్డి జిల్లా ముచ్చింతల్‌లో శ్రీరామానుజ సహస్రాబ్ది ఉత్సవాలు వైభవోపేతంగా జరుగుతున్నాయి. ఇందులో ఎమ్మెల్యే రోజా పాల్గొన్నారు. సమతామూర్తి విగ్రహం దగ్గర తెలంగాణ సీఎం కెసిఆర్., త్రిదండి చిన్న జీయర్ స్వామి. ఎంపీ సంతోష్ కుమార్., చంద్రగిరి ఎమ్మెల్యే చెవిరెడ్డి రెడ్డి తో కలిసి ఫోటోలు దిగారు.

ప్రస్తుతం భగవత్ శ్రీ రామనుజాచార్యుల సహస్రాబ్ది ఉత్సవాలు ఘనంగా జరుగుతున్నాయి. శ్రీరామానుజుల సహస్రాబ్ది ఉత్సవాల్లో భాగంగా రెండోరోజు అరణి మథనంతో వేడుకలు ప్రారంభమయ్యాయి. ఈ మహాక్రతువులో ప్రధాన ఘట్టమైన శ్రీలక్ష్మి నారాయణ మహా యాగాన్ని నిర్వహించారు.

యాగశాలలో శాస్త్రోక్తంగా అగ్నిహోత్రాన్ని తయారు చేశారు. ప్రధాన యాగ మండపంలో శమి, రావి కర్రలను రాపిడి చేసి బాలాగ్నిని రగిలించారు. ఆ అగ్నిహోత్రాన్ని పెద్దది చేస్తూ యాగశాలలో ఏర్పాటు చేసిన 1035 కుండలాలకు తీసుకెళ్లారు. యాగశాలను 114 శాలలుగా విభజించి హోమాలను చేశారు. శ్రీరామనగరంలో నేలపై 5 వేల మంది రుత్విజులు యాగం చేయడం ఇదే తొలిసారని వేద పండితులు చెబుతున్నారు.

శ్రీశ్రీశ్రీ త్రిదండి చిన్నజీయర్ స్వామి పర్యవేక్షణలో అయోధ్య, నేపాల్, తమిళనాడుతో పాటు తెలుగు రాష్ట్రాల్లోని జీయర్ స్వాములు హాజరై శ్రీలక్ష్మినారాయణ మహా యాగాన్ని నిర్వహించారు. యాగశాలకు కుడివైపు భాగాన్ని శ్రీరంగ క్షేత్రానికి ప్రతీకగా భోగ మండపం, మధ్య భాగాన్ని తిరుమల క్షేత్రానికి గుర్తుగా పుష్ప మండపం, వెనుక వైపు ఉన్న భాగాన్ని కాంచిపురానికి గుర్తుగా త్యాగ మండపం, ఎడమ వైపు ఉన్న మండపాన్ని మేలుకోట కేత్రంగా భావిస్తూ జ్ఞాన మండపంగా నామకరణం చేశామన్నారు చిన్నజీయర్ స్వామి.

ప్రపంచానికి సమతా సిద్ధాంతాన్ని నేర్పించిన గురువు. కులమతాలకతీతంగా మనుషులంతా ఒక్కటేనని చాటిన ఐక్యతామూర్తి. విశిష్టాద్వైతాన్ని ప్రబోధించిన మహనీయుడు. ఆ మహానుభావుడు అవతరించి వెయ్యేళ్లు పూర్తయిన సందర్భం.. మరో వెయ్యేళ్లు సమతా సిద్ధాంతాన్ని చాటే అత్యద్భుత ఘట్టం శ్రీరామానుజాచార్య సహస్రాబ్ది సమారోహ మహోత్సవం.

విశిష్టాద్వైతాన్ని వ్యాప్తిలోకి తెచ్చిన యతి.. వ్యక్తికన్నా సమాజశ్రేయస్సే ముఖ్యమని చాటిన మానవతావాది.. భగవదారాధనకు కులమతాలు ప్రాతిపదిక కాదన్న సమతామూర్తి.. రామానుజాచార్యులు. వెయ్యేళ్లక్రితం ఈ భూమి మీద నడిచిన ఆ మహానుభావుడి విశ్వమానవ తత్వాన్ని ప్రపంచానికి చాటేందుకు ఏర్పాటుచేసిందే సమతా విగ్రహం.