Village Tradition: గో కరోనా గో.. వైరస్ రక్కసి రాకుండా ఉండేందుకు ఆ గ్రామం ఏం చేసిందంటే..?

Village Tradition: ప్రస్తుతం ప్రపంచాన్ని తీవ్రంగా భయపెడుతోంది కరోనా మహమ్మరి.. వివిధ దేశాలు చుట్టొచ్చిన వైరస్ భూతం.. ఇప్పుడు యావత్ భారత దేశాన్ని వణికిస్తోంది. తెలుగు రాష్ట్రాల్లోనూ పరిస్థితి దారుణంగా ఉంది. రోజు రోజుకూ కేసుల సంఖ్య పెరుగుతోంది. పట్టణం నుంచి పల్లె వరకు దేన్నీ ఈ భూతం విడవడం లేదు. ఈ నేపథ్యంలో గో కరోనా గో అంటూ ఓ గ్రామం ప్రత్యేక జాతర నిర్వహించింది.. 

తమ ఊరి‌కి కరోనా రాకుండా చూడమ్మా..! అంటూ ఆ గ్రామ దేవత అయిన అమ్మవారికి మొక్కులు మొక్కారు గ్రామస్థులంతా కలిసి. ఎందుకంటే తొలి రెండు దశల్లో కరోనా మహమ్మారి ప్రజలపై విరుచుకుపడింది. ఎన్నో కుటుంబాలను రోడ్డుపై పడేసింది. పిల్లలను, పెద్దలను అనాథలుగా మార్చేసింది. అందుకే ఇకపై ఇలాంటి కష్టం రాకూడదని ఆ గ్రామస్థులు మొక్కుకున్నారు. 

మూడో దశ అన్నది తమ గ్రామంలో అడుగు పెట్టకూడదని కోరుకుంటూ దేవతకు మొక్కులు మొక్కారు. అమ్మవారికి భక్తి శ్రద్ధలతో మొక్కితే కరోనా గిరోనా ఏదీ తమ దగ్గరకు దరిచేరదని ఆ గ్రామస్థుల నమ్మకం. అందుకే భక్తి శ్రద్ధలతో అమ్మవారిని కొలిచి ప్రత్యేక పూజలు నిర్వహించారు ఆ గ్రామస్తులు.. 

ప్రతి ఏడాది గ్రామంలో నిర్వహించే జాతర సందర్భంగా గ్రామస్థులు ఈసారి కరోనా బారిన పడకుండా కాపాడాలని మొక్కులు మొక్కారు. పశ్చిమ గోదావరి జిల్లా పెనుమంట్ర గ్రామంలో జరిగింది ఈ జాతర. ఈ గ్రామదేవత కనకదుర్గమ్మకు ప్రత్యేక గుర్తింపు ఉంది. దాదాపు 600 ఏళ్ల నుంచి ఇక్కడ అమ్మవారు పూజలందుకుంటూ ఉందని గ్రామస్థులు చెబుతున్నారు. 

అమ్మవారికి భక్తి శ్రద్ధలతో జాతర జరిపిస్తూ.. ఆ జాతరలో ఏదైనా కోరిక మొక్కితే.. తప్పకుండా నెరవేరుతుందన్నది భక్తుల విశ్వాసం. అందుకే ఈ ఏడాది ఈ జాతరను ప్రత్యేకంగా నిర్వహించారు. గ్రామస్తులంతా కలిసి ఒకే కోరిక కోరుతు.. కరోనా మహమ్మరి తమపై దాడి చేయకుండా కాపాడమ్మ అంటూ జాతర నిర్వహించారు. 

గతంలో ఇదే గ్రామంలో వంద మంది దాకా వైరస్​ బారిన పడ్డారు. దీంతో ప్రజలు తీవ్ర భయాందోళనకు గురయ్యారు. మరోసారి అలాంటి పరిస్థితి రాకూడదని వాళ్లంతా నిర్ణయించుకున్నారు. అందుకే ప్రత్యేక జాతర ఏర్పాటు చేసి.. అమ్మవారికి ప్రజలంతా కలిసి అదే మొక్కు మొక్కున్నారు. 

ఈ గ్రామ జనాభా దాదాపు ఆరువేల మంది ఉంటారు. తొలి రెండు దశాల్లో ఊరిలో చాలామంది వైరస్​ బారినపడ్డారు. అందులో 20 మంది దాకా చనిపోయారు.. దీంతో థర్డ్ వేవ్ లో ఎలాంటి ప్రమాదాలు సంభవించకూడదని.. అంతా క్షేమంగా ఉండాలి అని కోరుకుంటూ అమ్మవారికి ప్రత్యేక పూజలు చేశారు.