Pulasa Fish: పులస వచ్చేసిందోచ్‌.. పుస్తెలమ్మైనా సరే.. పులస రుచి చూడాలి అంటరు.. ఎందుకంత డిమాండ్.. ప్రత్యేకత ఏంటి..?

Pulasa Fish: ఆస్తులు అమ్ముకొనైనా పులస చేప కూర తినాలన్నది ఓ మాట. జీవితంలో ఒక్కసారైనా పులస చేప కూర తినాల్సిందే అంటారు గోదావరి జిల్లాల ప్రజలు. అందుకే వర్షాకాలంతో పాటు.. పులస కోసం వారంతా ఎదురు చూస్తారు. వారు చూపులు ఫలించాయి.. గోదావరి జిల్లాలకు పులస వచ్చింది. 

నిగనిగలాడే పులసను పడితే జాలర్లకు పండగే. ఎందుకంటే పుస్తెలమ్మయినా సరే పులస తినాలని జనం క్యూ కడుతారు. ఖరీదు ఎంతైతేనేం పులసెట్టి పులస కూర తినాల్సిందే అంటారు.. అందుకే టేస్టు వేరే లెవల్ అంటారు. నిజంగానే చూస్తూనే నోరూరిపోద్ది. పులస మాట వింటే చాలు.. జిహ్వా రుచి కోరుకుంటుంది.  

గోదావరి (Godavari) వంటకాలు వాల్డ్‌ ఫేమస్‌ అనడం ఎంత నిజమో. కొసిరి కొసిరి వడ్డించే గోదావరి జిల్లా వాసుల ఆత్మీయతకు ఫిదా కాని వారుండరనేది కూడా అంతే వాస్తవం.. అలాగే గోదావరి గట్టున పొయ్యి పెట్టి పులస పులుసు తినాలంటే రాసిపెట్టి వుండాలంటారు. ఎందుకంటే ఆ రుచి అంత ప్రత్యేకంగా ఉంటుంది మరి.  

గోదావరిలో ఎర్రనీరు పోటెత్తిందంటే చాలు.. నాన్‌ వెజిటేరియన్స్‌ అంతా నదీ తీరం వైపు పరుగులు తీస్తారు.. అదిరిపోయే రుచి వుండే పులస చేపల కోసం. ఇటీవల వరదలతో.. మళ్లీ పులస ప్రత్యక్షమైంది. మొన్నటి వరకూ.. తెలుగు రాష్ట్రాల్లో(Telugu states) ముసురు ముంచెత్తి.. వాగులు, వంకలు పొంగి పొర్లాయి. గోదావరి కనీవినీ ఉగ్రరూపం దాల్చింది.

ఇదే సమయంలో గోదావరి వరదను సముద్రంలోకి వదిలేందుకు ధవళేశ్వరం బ్యారేజ్‌ దగ్గర గేట్లు కూడా ఎత్తివేశారు. మరోవైపు సముద్రంలో నుంచి ఇలసలు అంతర్వేది దగ్గర.. వరదకు ఎదురీదుతూ గోదావరిలో ప్రవేశించాయి. ఇప్పుడు గోదారిలో పులసలు సందడి చేస్తున్నాయి. దీంతో వీటిని కొనేందుకు జనం ఎగబడుతున్నారు. 

మిలమిల మెరిసే పులస.. అందుకే దీన్ని ఏక్ పీస్ అని కూడా అంటారు. ప్రతీ ఏటా జూన్‌, ఆగస్ట్‌, సెప్టెంబర్‌ మాసాల్లో మాత్రమే గోదావరిలో పులసల గలగల వుంటది. అన్ని చేపలు నీటి వాటానికి తగ్గట్టుగా పోతుంటాయి. కానీ… పులస రూటే సపరేటు..! ప్రవాహానికి ఎదురీదడం పులస స్పెషాల్టీ.. 

ఆస్ట్రేలియా, న్యూజిలాండ్‌, టాంజనీయల నుంచి సముద్ర మార్గంలో మన గోదార్లోకి వస్తుందీ పులస.. గోదావరి సముద్రంలో కలిసే చోట ఇలా ప్రవాహానికి ఎదురీదుతూ ఈదుతూ ధవళేశ్వరం వరకు వస్తాయి పులస చేపలు. ఇక్కడ ఇంకో ముచ్చట కూడా వుంది. నిజానికి సముద్రంలో వున్నప్పుడు వీటిని ఇలస అంటారు. గోదారి నీళ్లు తాకగ.. వెండి పసిడి కలగలిసిన రంగులోకి మారి ఇలస కాస్తా పులసగా మారుతుంది.  

పులసలా ప్రవాహానికి ఎదురీదే చేపలు మరెక్కడా కన్పించవు. ఇదిక్కొటే కాదు.. పులుసులో పులసకు మించిన రుచి వుండదు అంటారు. గోదారిలో ఎన్నెన్నో జలపుప్షాలు.. అన్నీ ఆరోగ్యానికి శ్రేయస్కారమే..! కానీ అన్నింటా పులస రూటే సపరేటు. పులుసు పెడితే రుచి కథ మామూలుగా ఉండదు అంటారు.

చిన్నా పెద్దా..ధనికా..పేద తేడాలేదు. పులస దొరికిందంటే .. నాన్‌ వెజ్ జనులకు ఇక పండగే. రేటు ఎంతన్నది అసలు చూడరు.. పులస రుచి చూడని జీవితం వేస్ట్ అని ఫీల్ అవుతారు. అందుకే ఈ సీజన్ వచ్చిందంటే..? పులసకు అంత డిమాండ్.. కొందరైతే వీటికి కోసం లక్షలు కూడా ఖర్చే చేయడానికి వెనుకాడరు.