Srisailam: శ్రీశైలంలో కర్ణాటక భక్తుల బీభత్సం.. ఆలయం వద్ద దుకాణాలకు నిప్పు.. ఏం జరిగిందంటే..

శ్రీశైలం మల్లన్న ఆలయ పుర వీధుల్లో ఇరు వర్గాల కొట్లాట, దుకాణాలకు నిప్పు పెట్టడం, వాహనాల ద్వంసం లాంటి దృశ్యాలతో బుధవారం రాత్రి శ్రీశైలంలో బీభత్స వాతావరణం కనిపించింది. అప్రమత్తమైన పోలీసులు ఇరు వర్గాలను అదుపు చేశారు. జగద్గురు పీఠం వారి సహాయంతో కర్ణాటక భక్తులను శాంతిపజేశారు.

ప్రతి ఉగాదికి కర్ణాటక నుంచి వందలాది మంది భక్తులు కాలి నడకన శ్రీశైలానికి వస్తుంటారు. ఉడిపి తదితర ప్రాంతాల నుంచి నడుచుకుంటూ శ్రీశైలం వచ్చే కన్నడ భక్తులు రెండు మూడు రోజులపాటు ఇక్కడే మకాంవేసి, పండుగ తర్వాత వెనుదిరుగుతారు.

బుధవారం నాటి ఘటనలో శ్రీశైలం లోని బీరప్ప సదన్ వద్ద స్థానికులకు, కర్ణాటక భక్తులకు గొడవ జరిగింది. బీరప్ప సదన్ వద్ద ఉన్న ఓ టీ షాప్ వద్ద తొలుత వివాదం మొదలైంది. స్థానికుడైన టీ షాప్ యజమానికి ,కర్ణాటక వ్యక్తికి మధ్య చిన్న వివాదం చిలికి చిలికి గాలి వానలా మారింది..

టీ కొనుగోలు చేసిన కర్ణాటక వ్యక్తి మంచి నీళ్లు కావాలని అడగ్గా, నీళ్లు లేవని టీ షాపు వ్యక్తి బదులిచ్చాడు. టీ కొన్నవారికి మంచి నీళ్లు ఇవ్వకపోవడమేంటని ఆ వ్యక్తి హోటల్ యజమానితో వాగ్వాదానికి దిగాడు. అదికాస్తా గొడవకు దారి తీసింది.

టీ దుకాణందారుకు స్థానికులు మద్దతుగా రావడంతో సీన్ ఘర్షణగా మారింది. కర్ణాటక భక్తుడిపై స్థానికుడు ఒకరు గొడ్డలితో దాడి చేయడంతో పరిస్థితి అదుపుతప్పింది. గొడ్డలి దాడిని నిరసిస్తూ కర్ణాటక భక్తులు శ్రీశైలంలో ఆందోళనకు దిగారు.

అయితే ఇదే సందుగా కొందరు అల్లరిమూకలు గొడవలోకి దూరి, ఆలయ పురవీధుల్లోని దుకాణాలకు నిప్పు పెట్టారు. కనిపించిన వాహనాలను పగులగొట్టారు. కురువ సత్రం సమీపంలో తాత్కాలిక దుకాణాలను, కోన్ని వాహనాలను తగులబెట్టారు. ఆలయం వద్ద భయానక దృశ్యాలు చూసి అక్కడున్నవారంతా భీతిల్లిపోయారు.

ఈలోపే పోలీసు బలగాలు అక్కడికి చేరుకుని ఇరు వర్గాలను చెదరగొట్టారు. ఉద్రిక్తత నేపథ్యంలో శ్రీశైలానికి అదనపు బలగానూ తరలించారు. పరిస్థితిని చక్కదిద్దే క్రమంలో శ్రీశైలం ఆలయ ఈవో లవన్న.. కర్ణాటకకు చెందిన జగద్గురు పీఠం పీఠాధిపతులు, పండితారాధ్యుల సహాయం తీసుకున్నారు.

జాగ్రత్త చర్యల్లో భాగంగా క్షేత్ర పరిసర ప్రాంతాలలో విద్యుత్ నిలిపేసిన అధికారులు పరిస్థితిని అదుపులోకి తెచ్చారు. రాష్ట్రాల మధ్య గొడవల నేపథ్యంలో శ్రీశైలం ఘటన ఎలాంటి మలుపు తిరుగుతుందోననే భయాందోళనలకు వ్యక్తమవుతున్నాయి. ప్రస్తుతానికి శ్రీశైలం క్షేత్రంలో సాధారణ పరిస్థితులు నెలకొన్నట్లు అధికారులు చెప్పారు.