Sai Taja: ఉదయం భార్య పిల్లలతో వీడియో కాల్.. ఇంతలో ఊహించని విషాదం.. చివరి మాటలు ఇవే

Army Helicpter Crash: తమిళనాడులో (Tamilnadu) కుప్పకూలిన ఆర్మీ హెలికాఫ్టర్ కూలిన (Army Helicopter Crash) ఘటనలో ఆంధ్రప్రదేశ్ (Andhra Pradesh) వాసి కూడా మృతి చెందడంతో రాష్ట్ర వ్యాప్తంగా విషాద ఛాయలు అలముకున్నాయి. చిత్తూరు జిల్లా కురబలకోట ఎగువ రేగడ గ్రామానికి చెందిన జవాన్ సాయి తేజ సైన్యంలో లాన్స్ నాయక్ గా పనిచేస్తున్నారు. ఆర్మీలో చేరిన అతి కొద్ది కాలంలోనే ఎంతో గుర్తింపు దక్కింది. అందుకే సీడీఎస్ బిపిన్ రావత్ కు వ్యక్తిగత భద్రతా సిబ్బందిలో సభ్యుడయ్యారు.

2013లో బెంగళూరు రెజిమెంట్‌ నుంచి ఆర్మీ సిపాయిగా ఎంపికయ్యారు సాయి తేజ. సిపాయిగా పనిచేస్తూనే ఏడాది తర్వాత పారా కమాండో పరీక్షరాసి ఉత్తీర్ణుడయ్యారు. అతి కొద్ది కాలానికే 11వ పారాలో లాన్స్‌ నాయక్‌ హోదా దక్కింది. అక్కడ అతని పని తీరుకు ఉన్నతాధికారుల నుంచి పలు ప్రశంసలు దక్కాయి.

ఏడాది క్రితం వరకు బెంగళూరులోని సిపాయిల శిక్షణా కేంద్రంలో శిక్షకుడిగా పనిచేశారు. అక్కడ కూడా మంచి ప్రతిభ కనబర్చి ఉన్నతాధికారుల మనసు దోచాడు. త్వరగా గుర్తింపు తెచ్చుకున్నాడు. దీంతో ఇటీవలే సీడీఎస్‌ బిపిన్‌ రావత్‌కు వ్యక్తిగత భద్రతా బృందంలో సభ్యుడిగా వచ్చారు.

సాయి తేజకు భార్య శ్యామల, మూడేళ్ల కుమార్తె దర్శిని, కుమారుడు ఐదేళ్ల మోక్షజ్ఞ ఉన్నారు. ప్రస్తుతం సాయితేజ కుటుంబ సభ్యులు మదనపల్లిలోని ఎస్‌బీఐ కాలనీలో నివాసముంటున్నారు. ఈ ఏడాది వినాయక చవితికి స్వగ్రామానికి వచ్చారు సాయి తేజ.. ఆ సమయంలో గ్రామంలో అందరితో చాలా కలివిడిగా ఉన్నారంటూ గ్రామస్థులు అతడి గుర్తులను నెమరవేసుకుంటూ కన్నీరు మున్నీరు అవుతున్నారు.

సాయి తేజ చివరి మాట ఇదే..
ప్రమాదానికి ముందు అంటే ఉదయం 8.45 గంటలకు సాయితేజ వీడియో కాల్‌ చేసి భార్య, కుమార్తె, కుమారుడితో మాట్లాడారు. కుమారుడితోనే చివరిగా మాట్లాడినట్టు తెలుస్తోంది. బాగా చదువుకో.. అల్లరి చేయకు.. త్వరలోనే ఇంటికి వస్తాను.. మంచి గిప్ట్ తెస్తాను అని కొడుక్కి చెప్పినట్టు తెలుస్తోంది. అవే అతడి చివరి మాటలు అంటూ ఆ కుంటుంబం గుర్తు చేసుకుంటోంది.

అయితే సాయి తేజ మరణ వార్త తెలియగానే గ్రామస్థులు, ప్రముఖులు అంతా ఆ ఇంటికి క్యూ కట్టారు. అయితే తండ్రి లేడని.. రాడని తెలియన మూడేళ్ల పాప, ఐదేళ్ల బాబును చూసి.. అంతా కన్నీటి పర్యంతమవుతున్నారు. ఇంత చిన్న వయసులోనే నాన్నను పోగుట్టుకున్నారు అంటూ అంతా కన్నీరు కారుస్తున్నారు..

ఉదయమే తాను క్షేమంగా ఉన్నానని.. త్వరలోనే ఇంటికి వస్తాను అను చెప్పిన సాయి తేజకు ఇలా జరగడంతో ఆ కుటుంబం కన్నీటికి ఆపుకోలేకపోతోంది. ఉన్నత శిఖరాలకు చేరుకున్నాడు అనుకున్న తమ కొడుకు ఇలా అర్థాంతరంగా తమను వదిలి వెళ్తాడని ఊహించలేదు అంటున్నారు అతడి తల్లిదండ్రులు..

సాయితేజ మృతితో మదనపల్లిలో విషాదఛాయలు అలముకున్నాయి. ఆ కుటుంబ సభ్యులంతా స్వగ్రామానికి చేరుకున్నారు. ఇతడి స్వస్థలం చిత్తూరు జిల్లా కురబాలకోట మండలం ఎగువరేగడ గ్రామం. సాయితేజ్ రక్షణ శాఖలో లాన్స్ నాయక్‌గా విధులు నిర్వర్తిస్తున్నారు. సీడీఎస్ బిపిన్‌ రావత్‌‌కు వ్యక్తిగత భద్రతా అధికారిగా సాయితేజ్ విధులు నిర్విహిస్తున్నారు.

తమిళనాడులోని ఊటీ కొండల్లో సీడీఎస్‌ జనరల్‌ బిపిన్‌ రావత్‌ ప్రయాణిస్తున్న హెలికాప్టర్‌ కుప్పకూలింది. సీడీఎస్‌ జనరల్‌ బిపిన్‌ రావత్‌కు వ్యక్తిగత భద్రతా బృందంలో సభ్యుడిగా ఉన్న సాయితేజ ఈరోజు మధ్యాహ్నం జరిగిన హెలికాప్టర్‌ ప్రమాదంలో రావత్‌తో పాటు మృతి చెందారు. సాయితేజ మృతి పట్ల చిత్తూరు జిల్లాకు చెందిన పలువురు తీవ్ర సంతాపం వ్యక్తం చేశారు.