Andhra Pradesh: సీఎం జగన్ ఐడియాతో పోలీసుల ఆల్ టైమ్ రికార్డ్.. 9 నెలల్లో 90వేల కేసులు.

ఆంధ్రప్రదేశ్ లో ముఖ్యమంత్రి వైఎస్ జగన్మోహన్ రెడ్డి ప్రవేశపెట్టిన స్పెషల్ ఎన్ ఫోర్స్ మెంట్ బ్యూరో ఫలితాలిస్తోంది. మద్యం, ఇసుక, గుట్కా అక్రమ రవాణా, అవినీతిపై సీఎం ఏర్పాటు చేసిన SEB తొమ్మిది నెలల్లో దాదాపు లక్ష కేసులు నమోదు చేసింది. స్పెషల్‌ ఎన్‌ఫోర్స్‌మెంట్‌ బ్యూరో పనితీరుపై క్యాంపు కార్యాలయంలో సీఎం జగన్‌ సమీక్ష నిర్వహించారు.

సీఎం జగన్ మాట్లాడుతూ మద్యం, ఇసుకలో ఎక్కడా అక్రమాలకు అస్కారం ఉండకూడదని.. అక్రమ రవాణాకు పాల్పడిన వారిపై ఉక్కుపాదం మోపాల్సిందేనని అధికారులకు స్పష్టం చేశారు. అక్రమాలతో ప్రభుత్వ ఆదాయాలకు గండికొట్టేవారిని ఉపేక్షించవద్దన్న సీఎం.. వ్యవస్థీకృతంగా కూడా అవినీతికి ఆస్కారం ఉండకూడదన్నారు. ఎక్కడైనా తప్పులు జరిగాయన్న సమాచారం రాగానే కచ్చితంగా దానిపై విచారణ జరిపి చర్యలు తీసుకోవాలని ఆదేశించారు.

వచ్చే 15 రోజుల్లో కచ్చితంగా మెరుగైన ఫలితాలు రావాలని స్పష్టం చేశారు. ఎస్ఈబీ ప్రతివారం సమావేశమై సమీక్ష చేయాలని.. వారికి కావాల్సిన అన్నిరకాల మౌలిక సదుపాయాలు కల్పించాలన్నారు. అలాగే ఈ విభాగంలో పనిచేసేవారికి స్పెషల్ ఇన్సెంటివ్‌లు కూడా ఇవాలని ఉన్నతాధికారులను ఆదేశించారు.

మే 16, 2020న ఏర్పాటైన స్పెషల్ ఎన్‌ఫోర్స్‌మెంట్ బ్యూరో ఇప్పటివరకు రికార్డు స్థాయిలో దాడులు నిర్వహించి దాదాపు లక్ష కేసులు కేసులు నమోదు చేసింది.

ఎస్‌ఈబీ ఏర్పాటైన తర్వాత మద్యం అక్రమాలపై 79,632 కేసులు నమోదు చేసినట్లు సీఎంకు వివరించారు. అలాగే 4, 85,009 లీటర్ల మద్యం , 12,766 లీటర్ల బీరు  సీజ్ చేసినట్లు తెలిపారు.

ఎస్ఈబీ ఇప్పటివరకు 4, 54,658 లీటర్ల నాటుసారా , 1, 12,70,123 లీటర్ల బెల్లం ఊట ధ్వంసం చేయగా..2, 85,142 కేజీల నల్లబెల్లం , 22,715 వాహనాలు స్వాధీనం చేసుకుంది.  240 మంది ప్రభుత్వ ఉద్యోగులపై కూడా కేసులు నమోదు చేసింది.

ఇసుక అక్రమ రవాణాలో 7,244 కేసులు నమోదు చేసిన ఎస్ఈబీ  4, 79,692 టన్నుల ఇసుక స్వాధీనం చేసుకొంది. 9,689 వాహనాలు సీజ్‌ చేయడంతో పాటు  22 మంది ప్రభుత్వ ఉద్యోగులపై కేసులు నమోదు చేసింది. అలాగే  మద్యం, ఇసుక అక్రమాలకు పాల్పడ్డ 82 మంది పోలీసులపై కేసులు నమోదు  చేసింది.

ఇప్పటివరకు ఎస్ఈబీ ఆధ్వర్యంలో 1, 00,979 కేజీల గంజాయి  సీజ్ చేశారు. అలాగే 90, 97,628 గుట్కా ప్యాకెట్లను పట్టుకున్నారు. 

రాష్ట్ర వ్యాప్తంగా పేకాట శిబిరాలపై దాడులు చేసి రూ. 4.92 కోట్ల నగదు పట్టుకున్నారు.