CZ Smartwatch: గుండెపోటును ముందే పసిగట్టే స్మార్ట్‌వాచ్‌? నాసా,AI టెక్నాలజీతో వస్తున్న డివైజ్‌ వివరాలివే..

CZ Smartwatch : కొంత కాలంగా స్మార్ట్‌వాచెస్‌లో లేటెస్ట్‌ ఫీచర్లు అందుబాటులోకి వస్తున్నాయి. ఫిట్నెస్‌, హెల్త్‌ ట్రాకింగ్‌ కోసం మెరుగైన ఆప్షన్లు అందిస్తున్నాయి. తాజాగా సిటిజన్ వాచ్ బ్రాండ్ సంస్థ సరి కొత్త ఫీచర్లతో స్మార్ట్‌వాచ్‌ లాంచ్‌ చేసింది. ఈ డివైజ్‌ అలసటను లెక్కిస్తుందని, గుండెపోటును ముందుగానే గుర్తించి అప్రమత్తం చేస్తుందని కంపెనీ తెలిపింది. ఆర్టిఫిషియల్‌ ఇంటెలిజెన్స్‌, నాసా టెక్నాలజీ ఈ వాచ్‌ పని చేస్తుందని వివరించింది. ఇటీవల అమెరికా లాస్‌వెగాస్‌లో జరిగిన కన్స్యూమర్ ఎలక్ట్రానిక్ షో 2023లో ఈ స్మార్ట్‌వాచ్‌ను లాంచ్‌ చేసింది.

ప్రముఖ సిటిజన్ బ్రాండ్‌ లాంచ్‌ చేసిన స్మార్ట్‌వాచ్‌ ఏఐ, నాసా టెక్నాలజీతో పని చేస్తుంది. ఈ టెక్నాలజీ ద్వారా వాచ్ ధరించిన వ్యక్తి ఎటువంటి అలసటకు గురైనా వెంటనే అలర్ట్‌ చేస్తుంది. అంతేకాకుండా ఆ సమయంలో తీసుకోవాల్సిన జాగ్రత్తల గురించి కూడా ఈ వాచ్ సూచనలు చేస్తుంది. ఈ సిటిజన్ బ్రాండ్ వాచ్‌లో ‘CZ Smart YouQ’ అప్లికేషన్ ఉంటుంది. దీని ఆధారంగా వాచ్‌లో ఉన్న కొత్త ఫీచర్ పనిచేస్తుంది. ప్రతిరోజూ ఎప్పటికప్పుడు ఈ అప్లికేషన్ ద్వారా అలర్ట్‌ మానిటర్ టెస్ట్ చేసుకోవచ్చు. ఈ అలర్ట్ మానిటర్ శరీరంలో చోటు చేసుకుంటున్న మార్పులను నిరంతరం పర్యవేక్షిస్తూ ఉంటుంది.

అంతరిక్షంలో వ్యోమగాములు అలసటకు, అనారోగ్యానికి గురైనప్పుడు వెంటనే వాటిని పసిగట్టేందుకు వ్యోమగాములు వేసుకున్న సూట్‌లోనే ‘సైకోమోటర్ విజిలెన్స్ టాస్క్ టెస్ట’ను అమర్చుతారు. అదే టెక్నాలజీని ఈ కొత్త సిటిజన్ బ్రాండ్ వాచ్‌లో అందుబాటులోకి తెచ్చారు. ప్రముఖ అంతర్జాతీయ సంస్థ ఇంటర్నేషనల్ బిజినెస్ మెషీన్స్, నాసా కలిసి ఈ కొత్త టెక్నాలజీ వాచ్‌లను తయారు చేసినట్లు సిటిజన్ వాచ్ అమెరికా ప్రెసిడెంట్ జెఫ్రీ కోహెన్ తెలిపారు.

గుండెపోటు సమస్యతో బాధపడే వారికి ఈ వాచ్ చాలా ఉపయోగకరంగా ఉంటుంది. హార్ట్ రేట్‌ను ఎప్పిటికప్పుడు చెక్‌చేసి క్యాల్కులేట్ చేస్తుంది. గుండెపోటు రావడానికి ముందు ఈ వాచ్ అప్రమత్తం చేస్తుంది.

సిటిజన్ బ్రాండ్‌కు సంబంధించిన సెకండ్ జనరేషన్ వాచీల్లోనే ఈ కొత్త ‘YouQ’ అప్లికేషన్ అందుబాటులో ఉంటుందని సిటిజన్ వాచ్ యాజమాన్యం తెలిపింది. ఈ యూక్యూ ఫీచర్‌తో పాటు వాచీలో 24 గంటల బ్యాటరీ, గూగుల్ ఫిట్, స్ట్రావా, స్పోటిఫై, యూట్యూబ్ మ్యూజిక్, అమెజాన్ అలెక్సా, ఆండ్రాయిడ్‌, ఐవోఎస్ కంపాటబిలిటీ ఫీచర్లు కూడా అందుబాటులో ఉంటాయి. ప్రస్తుతం కేవలం ప్రదర్శనకు మాత్రమే పెట్టిన ఈ ‘సిటిజన్ యూక్యూ’వాచ్, 2023 మార్చ్‌ నుంచి అమెరికన్ మార్కెట్లో అందుబాటులోకి రానుంది. దీని ధర సుమారు రూ.31,000 (350 డాలర్లు) ఉంటుంది. ఇప్పుడున్న ఫిట్‌నెస్ వాచీలతో పోలిస్తే ఇందులో చాలా బెటర్ ఫీచర్స్ ఉన్నాయి. నాసా టెక్నాలజీతో తయారైన.. ఈ స్మార్ట్‌వాచ్‌.. హెల్త్ అలర్ట్‌ కావాలనుకున్న వారికి బెస్ట్‌ ఛాయిస్‌ అవుతుంది.