• HOME
  • »
  • NEWS
  • »
  • TECHNOLOGY
  • »
  • HERE ARE THE PROS CONS OF HYDROGEN AS AN ALTERNATIVE FUEL NS GH

Hydrogen energy: హైడ్రోజన్‌ను ప్రత్యామ్నాయ ఇంధనంగా వాడవచ్చా? ఇది విజయవంతమవుతుందా?

Hydrogen energy: హైడ్రోజన్‌ను ప్రత్యామ్నాయ ఇంధనంగా వాడవచ్చా? ఇది విజయవంతమవుతుందా?

ప్రతీకాత్మక చిత్రం

హైడ్రోజన్‌ను ఇంధనంగా ఉపయోగించడంపై దృష్టి పెట్టనున్నట్లు కేంద్ర ప్రభుత్వం ప్రకటించింది. 2021-22లో దేశంలో నేషనల్ హైడ్రోజన్ ఎనర్జీ మిషన్ (NHEM)ను ప్రారంభించనున్నట్లు కేంద్ర ఆర్థిక మంత్రి నిర్మలా సీతారామన్ తెలిపారు.

  • Share this:
మన దేశంలో ఇంధన ధరలు రోజురోజుకీ పెరిగి పోతున్నాయి. కేంద్ర, రాష్ట్ర ప్రభుత్వాలు పెట్రోలియం ఉత్పత్తులపై ట్యాక్స్‌ తగ్గించే సూచనలు కనిపించట్లేదు. దీనికి తోడు పర్యావరణానికి హాని చేయని ఎలక్ట్రిక్ వాహనాలకు భారత్‌లో ఆదరణ లభించేందుకు మరికొంత సమయం పట్టే అవకాశాలు ఉన్నాయి. ఈ నేపథ్యంలో హైడ్రోజన్‌ను ఇంధనంగా ఉపయోగించడంపై దృష్టి పెట్టనున్నట్లు కేంద్ర ప్రభుత్వం ప్రకటించింది. 2021-22లో దేశంలో నేషనల్ హైడ్రోజన్ ఎనర్జీ మిషన్ (NHEM)ను ప్రారంభించనున్నట్లు కేంద్ర ఆర్థిక మంత్రి నిర్మలా సీతారామన్ తెలిపారు. తాజా బడ్జెట్ ప్రసంగంలో ఆమె NHEM గురించి ప్రకటించారు. రానున్న రెండు నెలల్లో నేషనల్ హైడ్రోజన్ ఎనర్జీ మిషన్‌పై అధికారులు ఒక డ్రాఫ్ట్‌ను సిద్ధం చేయనున్నారు. హైడ్రోజన్‌ను ఇంధన వనరుగా ఉపయోగించడానికి ఒక రోడ్ మ్యాప్ తయారు కానుంది. ముఖ్యంగా పర్యావరణానికి ఏమాత్రం హాని కలిగించని గ్రీన్ హైడ్రోజన్‌, హైడ్రోజన్‌ ఎకానమీపై ప్రత్యేక దృష్టి పెట్టనున్నారు.

రవాణా రంగంలో హైడ్రోజన్ ఇంధనాన్ని వాడటం వల్ల ఎన్నో ప్రయోజనాలు ఉన్నాయని నిపుణులు చెబుతున్నారు. ఈ రంగం నుంచే మూడింట ఒక వంతు కార్బన్ ఉద్గారాలు గాల్లోకి వెలువడుతున్నాయి. దీనివల్ల పర్యావరణ కాలుష్యం పెరిగిపోతోంది. శిలాజ ఇంధనాలతో వెలువడే ఈ గ్రీన్ హౌస్ వాయువులను హైడ్రోజన్ ఫ్యూయెల్‌ ద్వారా కట్టడి చేయవచ్చు. ఇది సంప్రదాయ విద్యుత్ వాహనాలకంటే మంచి ఫలితాలను ఇచ్చే అవకాశం ఉంది. కానీ మన దేశంలో హైడ్రోజన్ టెక్నాలజీ ఇంకా పూర్తిస్థాయిలో అభివృద్ధి చెందలేదు. దీంతో ఈ ప్రతిపాదిత హైడ్రోజన్ ఇంధనం పూర్తిగా కార్యరూపం దాల్చేందుకు చాలా సమయం పట్టవచ్చు.

లక్ష్యాలను విధించుకున్న భారత్
మన దేశం 2050 నాటికి కార్బన్ ఉద్గార రహిత దేశంగా మారాలని లక్ష్యంగా పెట్టుకుంది. 2022 నాటికి 175 గిగావాట్ల పునరుత్పాదక ఇంధన శక్తిని ఉత్పత్తి చేయాలని 2021 బడ్జెట్‌లో కేంద్ర ప్రభుత్వం ప్రతిపాదించింది. ఇందుకు రూ.1500 కోట్లను కేటాయించారు. ఈ మొత్తాన్ని పునరుత్పాదక ఇంధన వనరులు, హైడ్రోజన్ ఎనర్జీ మిషన్‌పై ఖర్చు చేయనున్నారు.

హైడ్రోజన్ మాత్రమే ఎందుకు?
భారత్‌ విద్యుత్ కోసం ఎక్కువగా బొగ్గు వనరులపైనే ఆధారపడుతోంది. ఇలాంటి శిలాజ ఇంధనాన్ని హైడ్రోజన్‌తో భర్తీ చేయవచ్చు. దీనివల్ల ధరలు భారీగా తగ్గుతాయి. పెరుగుతున్న జనాభాకు తగ్గట్లు ఇంధన శక్తి లభిస్తుంది. దీనికి తోడు ప్రకృతిలో హైడ్రోజన్ విరివిగా లభిస్తుంది. చాలా తేలికైన, సాంద్రత తక్కువగా ఉన్న ఈ వాయువును పెట్రోల్‌తో పోలిస్తే సులభంగా మండించవచ్చు. తద్వారా తక్కువ ఖర్చుతో ఎక్కువ శక్తిని ఉత్పత్తి చేయవచ్చు. రవాణా రంగంలో హైడ్రోజన్‌ను ఇంధనంగా వాడటం వల్ల గ్రీన్ హౌజ్ ఉద్గారాల తీవ్రత చాలా వరకు తగ్గుతుంది. మన దేశంలో ఐరన్, స్టీల్, రసాయనాలను ఎక్కువగా రవాణా చేస్తున్నారు. ఇందుకు ఎక్కువ మొత్తంలో ఇంధనం అవసరమవుతోంది. దీన్ని హైడ్రోజన్‌తో భర్తీ చేస్తే ప్రభుత్వానికి, పర్యావరణానికి కూడా లబ్ధి చేకూరుతుంది.

హైడ్రోజన్ ఎన్ని రకాలు?
మనకు లభించే హైడ్రోజన్‌ను మూడు వర్గాలుగా విభజించవచ్చు. ఈ జాబితాలో గ్రే హైడ్రోజన్, బ్లూ హైడ్రోజన్, గ్రీన్ హైడ్రోజన్ ఉన్నాయి. గ్రే హైడ్రోజన్‌ను శిలాజ ఇంధనాలు, సహజ వాయువు.. వంటి హైడ్రోకార్బన్ల నుంచి ఎక్కువ మొత్తంలో ఉత్పత్తి చేయవచ్చు. ఈ ప్రక్రియలో కార్బన్ డయాక్సైడ్ బై ప్రొడక్ట్‌గా వస్తుంది.

-బ్లూ హైడ్రోజన్‌ను కూడా శిలాజ ఇంధనాల నుంచే సేకరిస్తారు. ఈ ప్రక్రియలో బై ప్రొడక్ట్స్‌గా వెలువడే కార్బన్ మోనాక్సైడ్, కార్బన్ డయాక్సైడ్ వంటి ప్రమాదకరమైన వాయువులను నిల్వ చేయవచ్చు. ఫలితంగా కాలుష్యాన్ని నివారించవచ్చు. ఇది గ్రే హైడ్రోజన్‌తో పోలిస్తే మెరుగైన ఇంధన వనరు.

-గ్రీన్ హైడ్రోజన్‌ను సోలార్ పవర్, పవన విద్యుత్ వంటి పునరుత్పాదక శక్తి నుంచి ఉత్పత్తి చేయవచ్చు. విద్యుత్ ద్వారా నీటిని హైడ్రోజన్, ఆక్సిజన్‌గా విభజించవచ్చు. ఈ ప్రక్రియలో నీరు, తేమ వంటివి బై ప్రొడక్ట్స్‌గా వస్తాయి. ఇవి పర్యావరణానికి ఎలాంటి హాని చేయవు. అందువల్ల దీన్ని గ్రీన్ హైడ్రోజన్ అని పిలుస్తున్నారు.

విద్యుత్ వాహనాలతో ఎలాంటి ప్రయోజనాలు?
విద్యుత్ వాహనాలు కూడా మూడు రకాలుగా ఉంటాయి. హైడ్రోజన్ తో నడిచే వాహనాలు సంప్రదాయ ఎలక్ట్రిక్ వెహికిల్స్ కంటే చాలా బాగా పని చేస్తాయి.

HEV (హైబ్రిడ్ ఎలక్టిక్ వెహికిల్స్)
ఇవి పెట్రోలియం ఉత్పత్తులకంటే తక్కువ శక్తిని తీసుకుంటాయి. ఈ వాహనాల నుంచి చాలా తక్కువ మొత్తంలో ఉద్గారాలు విడుదల అవుతాయి.

BEV (బ్యాటరీ పవర్డ్ ఎలక్ట్రిక్ వెహికిల్స్)
ఈ వాహనాలు బ్యాటరీ సాయంతో పనిచేస్తాయి. విద్యుత్ సాయంతో వాహనం బ్యాటరీని రీఛార్జ్ చేసుకోవచ్చు. వీటిలో పెట్రోలు అవసరం ఉండదు.

PEV (ప్లగ్ ఇన్ హైబ్రిడ్ వెహికిల్స్)
వీటిని బ్యాటరీ, పెట్రోలు రెండింటిలో ఏదో ఒక దాని సాయంతో నడిపేలా రూపొందిస్తారు.

FCEV (ఫ్యుయెల్ సెల్ ఎలక్ట్రిక్ వెహికిల్స్)
వీటిని హైడ్రోజన్, ఆక్సిజన్‌ సాయంతో నడపవచ్చు. ఇవి పూర్తిగా ఎలక్ట్రిక్ వాహనాలే అయినప్పటికీ.. BEVల మాదిరిగా వీటి బ్యాటరీని రీఛార్జ్ చేయలేరు. హైడ్రోజన్, ఆక్సీజన్ ఇంధనం అయిపోయిన తరువాత మళ్లీ నింపుకోవాల్సి ఉంటుంది.

హైడ్రోజన్ ఇంధనంతో లాభాలు
హైడ్రోజన్‌ను ఇంధనంగా వాడటం వల్ల కార్బన్ ఉద్గారాలు పూర్తిగా తగ్గిపోతాయి. పర్యావరణ కాలుష్యం తగ్గిపోతుంది. ఒక్కసారి హైడ్రోజన్ వెహికిల్స్ ను పూర్తిగా ఛార్జ్ చేస్తే 400 నుంచి 500 కిలోమీటర్ల వరకు ప్రయాణించవచ్చు. CNG మాదిరిగానే హైడ్రోజన్‌ను వాహనాల్లోని ట్యాంకుల్లో నింపుకోవచ్చు. ఇది ఎలక్ట్రిక్ వెహికిల్స్‌లో వాడే లిథియం అయాన్ బ్యాటరీలకంటే తేలికగా ఉంటుంది. అందువల్ల ఎక్కువ దూరం ప్రయాణించే రవాణా ట్రక్కులు, కమర్షియల్ వెహికిల్స్‌కు వీటి వల్ల మరింత ప్రయోజనం కలుగుతుంది. ఈ ఇంధనాన్ని కేవలం ఐదు నిమిషాల్లోనే నింపుకోవచ్చు.

విజయవంతం అవుతుందా?
మన దేశంలో ఇప్పటి వరకు మూడు సంస్థలు మాత్రమే హైడ్రోజన్‌తో నడిచే వాహనాలను తయారు చేస్తున్నాయి. హోండా, టొయోటా, హ్యుందాయ్ కంపెనీలు వీటిని అభివృద్ధి చేస్తున్నాయి. 2020 నాటికి దేశంలో 80 లక్షల విద్యుత్ వాహనాలు రోడ్లపైకి వచ్చాయి. కానీ ఇదే సమయానికి కేవలం 25,000 హైడ్రోజన్ FCEVలను మాత్రమే భారత్‌లో ఉపయోగిస్తున్నారు. దేశంలో 500 కంటే తక్కువ హైడ్రోజన్ ఫ్యుయెల్‌ ఫిల్లింగ్ స్టేషన్లు మాత్రమే ఉన్నాయి. వీటి సంఖ్య పెరగాల్సి ఉంది. చాలా తేలికగా ఉండే వాయువు కాబట్టి పేలిపోయే అవకాశాలు ఉంటాయని ప్రజలు భావిస్తున్నారు. దీన్ని ఎక్కువ ప్రెజర్‌ వద్ద నిల్వ చేయాలి. ఇది ప్రమాదాలకు కారణం కావచ్చు. వీటన్నింటినీ బట్టి చూస్తే హైడ్రోజన్‌ను శిలాజ ఇంధనాలకు ప్రత్యామ్నాయంగా మార్చడానికి ఊహించినదానికంటే చాలా ఎక్కువ సమయం పట్టే అవకాశాలు ఉన్నాయని తెలుస్తోంది.
Published by:Nikhil Kumar S
First published:

అగ్ర కథనాలు