Realme: రియల్​మీ ఫ్యాన్స్​​కు గుడ్​న్యూస్​.. రూ. 10 వేలు లోపే 5జీ స్మార్ట్​ఫోన్​ విడుదల..!

స్మార్ట్ ఫోన్ లవర్స్ కు శుభవార్త.. ఎప్పటికప్పుడు అతి తక్కువ ధరలోనే ట్రెండ్ అప్ డేట్ అవ్వాలి అనుకునే వారికి నిజంగా ఇది శుభవార్తే.. భారత మార్కెట్​లోకి వరుస స్మార్ట్​ఫోన్లను విడుదల చేస్తూ దూకుడుమీదుంది రియల్​మీ సంస్థ. ఈ సంస్థ నుంచి సరసమైన ధరలోనే అద్భుతమైన ఫీచర్లతో కూడిన స్మార్ట్​ఫోన్లు విడుదలవుతున్నాయి. దీంతో మార్కెట్​లో వీటికి మంచి ఆదరణ లభిస్తుంది. ఇదే జెట్ స్పీడ్ వేగంతో వచ్చే ఏడాది నాటికి అతి తక్కువ ధరలో 5జీ మోడళ్లను తీసుకురావాలని ప్రణాళికలు రచిస్తోంది. ఈ మేరకు రియల్​మీ ఇండియా సీఈవో మాధవ్​ శేత్​ ట్వీట్​ చేశారు. రియల్​మీ వచ్చే ఏడాది నాటికి రూ. 10 వేలలోపు ధరలో 5జీ ఫోన్లను ఆవిష్కరించనుందని ఆయన పేర్కొన్నారు. రాబోయే రోజుల్లో కేవలం 100 డాలర్లు అంటే ( సుమారు 7,500) లకే 5 జి ఫోన్‌ను విడుదల చేయాలని లక్ష్యంగా పెట్టుకున్నట్లు ఆయన తెలిపారు. అంతేకాదు, రియల్​మీ నుంచి 15 వేల ధర పైబడి విడుదలయ్యే ప్రతి మోడల్​లో 5జీ సపోర్ట్​ అందిస్తామని ఆయన స్పష్టం చేశారు. ఈ మేరకు హామీ ఇస్తున్నట్లు #realmeFans హ్యాష్​ ట్యాగ్​ జత చేసి ట్వీట్ చేశారు.

రియల్​మీ నుంచి రాబోయే మూడు నెలల్లోపు జీటీ సిరీస్​ను లాంచ్​ చేయనున్నట్లు మాధవ్ ప్రకటించారు. దీన్ని ధ్రువీకరిస్తూ #realmeGT అనే హ్యాష్​ ట్యాగ్​ జత చేశారు. మరోవైపు ఇప్పటికే మంచి ఆదరణ పొందిన నార్జో సిరీస్‌ను కూడా విస్తరిస్తామని సీఈవో మధవ్​ శేత్​ పేర్కొన్నారు. దీన్ని ధ్రువీకరిస్తూ # #DemocratizerOf5G అనే హ్యాష్​ ట్యాగ్​ జతచేసి ట్వీట్ చేశారు.

త్వరలోనే రియల్​మీ జిటి సిరీస్​..​

రియల్​మీ నుంచి గతేడాది రియల్​మీ ఎక్స్​ 50 ప్రో 5జీ లాంచ్​ అయ్యింది. ఈ మొబైల్​తో మొట్టమొదటి 5జీ వేరియంట్​ను భారత మార్కెట్​లోకి ప్రవేశపెట్టింది. అయితే, రియల్​మీ ఇటీవల దేశంలో తన 5జీ ఫోన్​ పోర్టుఫోలియోను విస్తరించింది. రియల్​మీ 5జీ, రియల్​మీ నార్జో 30 ప్రో, రియల్​మీ ఎక్స్​ 7 మాక్స్​ వంటి 5జీ మోడళ్లను లాంచ్​ చేసింది. ఈ నేపథ్యంలోనే వచ్చే త్రైమాసికంలో రియల్​మీ జిటి సిరీస్​ను దేశంలో ప్రవేశపెట్టాలని యోచిస్తోంది. కాగా, లీకైన స్పెసిఫికేషన్లను బట్టి చూస్తే రియల్​హీ జీటీ సరీస్​లో అద్భుతమైన ఫీచర్లను అందించినట్లు తెలుస్తోంది. కెమెరా విషయంలో అద్భుతాలు చేసిందని లీకులను బట్టి తెలుస్తోంది. అయితే, రియల్​మీ జీటీ సిరీస్​​ ఎప్పుడు విడుదలవుతుందనే దానిపై ప్రస్తుతానికి ఎటువంటి స్పష్టత లేదు. రియల్ మీ నుంచి అతి తక్కువ ధరకు లభించనున్న ఆ ఫోన్ కోసం అంతా ఆసక్తిగా ఎదురు చూస్తున్నరు.