Tokyo: అమెరికాను దెబ్బకొట్టిన డ్రాగన్.. అగ్రస్థానానికి చెక్

పెద్దన్న అమెరికాను డ్రాగన్​ దెబ్బకొట్టింది. తన నంబర్​వన్​ స్థానాన్ని లాగేసుకుంది. అవును ఎన్నో ఏళ్లుగా ఇటు ఆర్థికపరంగా అటు ఆధిపత్యం పరంగా ప్రపంచాన్ని శాసిస్తూ వస్తున్న అమెరికాను చైనా వెనక్కునెట్టింది. ఇది ఎక్కడంటారా.. పతకాల వేటలో.. ఏళ్లుగా ఒలింపిక్స్​లో అమెరికాదే ఆధిపత్యం. స్వర్ణాల వేటలో వారిదే అగ్రస్థానం. కానీ, ఈ సారి చైనా గట్టి దెబ్బే కొట్టింది. అగ్రరాజ్యాన్ని రెండో స్థానంలో నిలబెట్టి టాప్​లో నిలిచింది. 37 స్వర్ణాలతో పెద్దన్నను ఓరగా చూస్తోంది. ఇప్పటికే ఆర్థికపరంగానూ తన స్థానానికి ఎసరు పెడుతున్న చైనా ఇపుడు ఒలింపిక్స్​లోనూ దెబ్బకొట్టడం అమెరికాకు రుచించని విషయం. ఒలింపిక్స్​ 28 సార్లు నిర్వహించగా అందులో 17 సార్లు అమెరికాదే అగ్రస్థానం. గత రియో ఒలింపిక్స్​లో అమెరికా 46 స్వర్ణాలతో ఎవరికీ అందనంత ఎత్తులో ఉంది. ఇపుడు చైనా రావడం పెద్దన్న ఆధిపత్యానికి గండిపడటం లాంటిదే. ఇప్పటికే కరోనాను కట్టడి చేయడంలో ప్రపంచంలోనే అత్యుత్తమంగా చైనా నిలిచింది. అన్ని దేశాల కంటే ముందే లాక్​డౌన్​ ఎత్తేసి ఔరా అనిపించుకుంది. పెద్దన్న మాత్రం కోవిడ్​ దెబ్బకు కుదేలయ్యాడు. ఒలింపిక్స్​ జరిగే చివరి రెండు రోజుల్లో 40కిపైగా ఈవెంట్​లు ఉండటంతో అమెరికా అగ్రస్థానం కోసం ఆశలు పెట్టుకుంది. తన స్థానాన్ని డ్రాగన్​ నుంచి తిరిగి సంపాదించుకోవాలని పట్టుదలగా ఉంది.

4 స్వర్ణాలే తేడా..

స్వర్ణాల రేసులో ఫ్రాన్స్​, జపాన్​, రష్యా, చైనాలు గట్టిగా పోటీపడినా ఈ సారి అమెరికాదే పైచేయిగా అందరూ భావించారు. కానీ, ఇప్పటివరకు కేవలం 33 స్వర్ణాలు 36 రజతాలు 32 కాంస్యాలతో రెండో స్థానంలో నిలిచింది. అదే డ్రాగన్​ దేశం చైనా 37 స్వర్ణాలు 28 రజతాలు 17 కాంస్యాలతో అగ్రస్థానంలో ఉంది. మొత్తం పతకాలతో అమెరికాది టాప్​ అయినా సాధారణంగా మొదటి స్థానం ఇచ్చేది మాత్రం స్వర్ణాల లెక్కమీదే. దీంతో ప్రస్తుతానికైతే చైనానే నంబర్​వన్​.



టోక్యో ఒలింపిక్స్​లో అమెరికాకు ప్రధానంగా జిమ్నాస్టిక్స్​, స్విమ్మింగ్​, అథ్లెటిక్స్​లో ఎదురుదెబ్బలు తగిలాయి. రియోలో అథ్లెటిక్స్​లో అమెరికాకు 13 పతకాలు రాగా, టోక్యోలో కేవలం 5 పతకాలు మాత్రమే వచ్చాయి. ఇక గతంలో మైకెల్​ ఫెల్ప్ష్​ లాంటి వాళ్లు స్విమ్మింగ్​లో ఆధిపత్యం చెలాయించి పతకాలు కొల్లగొట్టేవాళ్లు. కానీ, సారి అమెరికా స్విమ్మర్లు తేలిపోయారు. వారికి పోటీగా ఆస్ట్రేలియా 9 స్వర్ణాలతో దెబ్బకొట్టింది. ప్రస్తుతం యూఎస్​కు 11 పతకాలు స్విమ్మింగ్​లో వచ్చాయి. మరోవైపు జిమ్నాస్టిక్స్​లో పేరుగాంచిన సిమోన్​ బైల్స్​ కూడా చాలా ఈవెంట్​లలో బరిలోకి దిగకపోవడంతో స్వర్ణాలకు ఎసరు పడింది. ఏళ్లుగా ఆధిపత్యం చెలాయిస్తున్న ఇలాంటి విభాగాల్లో పతకాలు తగ్గడంతో అమెరికా రెండో స్థానంలో సరిపెట్టుకోవాల్సి వచ్చింది. చైనాలో జరిగిన ఒలింపిక్స్​లో డ్రాగన్​ దేశం మొదటిస్థానంలో నిలిచినా.. దేశం బయట జరిగిన ఒలింపిక్స్​లో టాప్​లో నిలవడం ఇదే తొలిసారి. ఏళ్లుగా అమెరికాకు చెక్​ పెట్టి ప్రపంచంలో గుత్తాధిపత్యాన్ని సాధించాలనుకుంటున్న డ్రాగన్​ దేశానికి టోక్సో ఒలింపిక్స్​ ఊరటనిచ్చేదే. చూద్దాం చివరి రెండు రోజుల్లోనైనా అమెరికా చైనాకు చెక్​ పెట్టేనా.. లేదా మొదటి స్థానాన్ని డ్రాగన్​కే అప్పగిస్తుందా.. వెయిట్​ అండ్​ వాచ్​...

తెలుగు వార్తలు, తెలుగులో బ్రేకింగ్ న్యూస్ న్యూస్ 18‌లో చదవండి. రాష్ట్రీయ, జాతీయ, అంతర్జాతీయ, టాలీవుడ్, క్రీడలు, బిజినెస్, ఆరోగ్యం, లైఫ్ స్టైల్, ఆధ్యాత్మిక, రాశిఫలాలు చదవండి.

Tags: Games, Gold, Tokyo Olympics, US-China