IND vs NZ 2nd ODI : షమీ దెబ్బకు గజగజ వణికిపోతున్న కివీస్.. అసలు ఇది న్యూజిలాండ్ టీమేనా?

IND vs NZ 2nd ODI :  భారత్ (India)తో జరుగుతున్న మూడు మ్యాచ్ ల వన్డే సిరీస్ లో న్యూజిలాండ్ (New Zealand) బ్యాటింగ్ పేలవ ప్రదర్శన చేస్తూనే ఉంది. రెండు రోజుల క్రితం జరిగిన తొలి వన్డేలో 130 పరుగులకే 6 వికెట్లను కోల్పోయిన కివీస్.. తాజాగా రెండో వన్డేలో అంతకంటే దారుణమైన ప్రదర్శన చేస్తుంది. టాస్ ఓడి బ్యాటింగ్ కు దిగిన కివీస్ జట్టు 25 ఓవర్లలో 6 వికెట్లకు నష్టపోయి 73 పరుగులు చేసింది. భారత బౌలర్లు మొహమ్మద్ షమీ (Mohammed Shami), మొహమ్మద్ సిరాజ్ (Mohammed Siraj)లు కివీస్ ను ఓ ఆట ఆడుకున్నారు. ముఖ్యంగా షమీ 3 వికెట్లతో కివీస్ ను రఫ్పాడించాడు. సిరాజ్, హాార్దిక్, శార్దుల్ ఠాకూర్ లు తలా ఒక వికెట్ సాధించారు.

ఇది కూడా చదవండి : కావ్య మేడంకు పెళ్లి ప్రపోజల్.. ఏకంగా మైదానంలోనే.. ఫోటో వైరల్

రెండో వన్డేలో టాస్ నెగ్గిన టీమిండియా కెప్టెన్ రోహిత్ శర్మ ఫీల్డింగ్ ఎంచుకున్నాడు. పిచ్ పై పచ్చిక ఎక్కువగా ఉండటంతో పాటు రెండో ఇన్నింగ్స్ సమయంలో డ్యూ వచ్చే అవకాశం ఉండటంతో భారత్ ఫీల్డింగ్ ఎంచుకుంది. తమ కెప్టెన్ సరైన నిర్ణయమే తీసుకున్నాడని భారత బౌలర్లు నిరూపించారు. తొలి ఓవర్ వేసిన షమీ.. డేంజరస్ ఫిన్ అలెన్ (0)ను క్లీన్ బౌల్డ్ చేశాడు. కాసేపటికే నికోల్స్ (2)ను సిరాజ్ బోల్తా కొట్టించాడు. 20 బంతులు ఎదుర్కొన్న నికోల్స్ 2 పరుగులు మాత్రమే చేశాడు. డారిల్ మిచెల్ (1) ఇచ్చిన రిటర్న్ క్యాచ్ ను షమీ పట్టేయడంతో కివీస్ 3వ వికెట్ ను కోల్పోయింది.

కాసేపటికే డెవోన్ కాన్వే (7)ను అద్భుతమైన రిటర్న్ క్యాచ్ తో హార్దిక్ పాండ్యా అవుట్ చేశాడు. ఆ తర్వాత కెప్టెన్ టామ్ లాథమ్ (1)ను శార్దుల్ ఠాకూర్ పెవిలియన్ కు పంపాడు. దాంతో న్యూజిలాండ్ 15 పరుగులకే 5 వికెట్లను కోల్పోయి కష్టాల్లో పడింది. అయితే ఈ దశలో తొలి వన్డే హీరో బ్రేస్ వేల్ (22; 4 ఫోర్లు) జట్టును ఆదుకునే ప్రయత్నం చేశాడు. గ్లెన్ ఫిలిప్స్ తో కలిసి కాసేపు భారత బౌలర్లను ప్రతిఘటించాడు. ఈ క్రమంలో కొన్ని చూడచక్కటి షాట్లను ఆడాడు. దాంతో కివీస్ 50 మార్కును దాటింది. అయితే బౌలింగ్ కు వచ్చిన షమీ.. బౌన్సర్ తో బ్రేస్ వెల్ ఆటను ముగించాడు. దాంతో 56వ పరుగు వద్ద న్యూజిలాండ్ 6వ వికెట్ ను కోల్పోయింది. ప్రస్తుతం ఫిలిప్స్ (38 బంతుల్లో 26 బ్యాటింగ్; 4 ఫోర్లు), సాంట్నెర్ (21 బంతుల్లో 8 బ్యాటింగ్, 1 ఫోర్) లు క్రీజులో ఉన్నారు.

తెలుగు వార్తలు, తెలుగులో బ్రేకింగ్ న్యూస్ న్యూస్ 18‌లో చదవండి. రాష్ట్రీయ, జాతీయ, అంతర్జాతీయ, టాలీవుడ్, క్రీడలు, బిజినెస్, ఆరోగ్యం, లైఫ్ స్టైల్, ఆధ్యాత్మిక, రాశిఫలాలు చదవండి.

Tags: Hardik Pandya, Ind vs Nz, Ind vs NZ ODI series, India vs newzealand, Mohammed Shami, Mohammed Siraj, Rohit sharma, Team India