Karnataka: జేడీ(ఎస్‌) భవిష్యత్తు ఏంటి? వొక్కలిగల ఓటు కమలానికా, కాంగ్రెస్‌కా? ఆసక్తికరంగా కర్ణాటక రాజకీయాలు

( డి పి సతీష్.. న్యూస్18)

కర్ణాటక రాజకీయాల్లో (Karnataka Politics) ప్రధానంగా రెండు వర్గాల ఆధిపత్యం కొనసాగుతోంది. హెచ్‌డీ దేవగౌడ వయసు రీత్యా అనారోగ్యంతో బాధపడున్నారు. అదే విధంగా బీజేపీ నేత యడియూరప్ప క్రియాశీల రాజకీయాల నుంచి వైదొలిగారు. దీంతో వొక్కలిగ ( Vokkaligas), లింగాయత్‌ (Lingayats) వర్గాలు తమను నడిపించే నేత కోసం ఎదురుచూస్తున్నాయి. ఈ సమయంలో కాంగ్రెస్‌, బీజేపీలు తమ రాజకీయ లబ్ధిని కాపాడుకునే ప్రయత్నాల్లో ఉన్నాయి. ఏ వర్గం ఎవరి వెంట నడుస్తుందో తెలియాలంటే మరికొంత కాలం వేచి ఉండక తప్పదు.

* వొక్కలిగాలు చరిత్రలో గొప్పరోజు

1996 జూన్ 1 కర్ణాటకలో రెండో అత్యంత శక్తివంతమైన వర్గం వొక్కలిగాలు చరిత్రలో గుర్తుపెట్టుకోవాల్సిన రోజు. హెచ్ డి దేవెగౌడ ఆ రోజున భారత ప్రధానమంత్రిగా ప్రమాణ స్వీకారం చేశారు. భారతదేశంలో అధికార పీఠాన్ని అధిరోహించిన తమ నాయకుడిని చూసి ఒక ఉప-ప్రాంతీయ వర్గం సంబరాలు చేసుకుంది. ఆ రోజు నుంచి కర్ణాటకలో వొక్కలిగ ఓటు బ్యాంకును ఇప్పటికీ నియంత్రించే తిరుగులేని నాయకుడిగా గౌడ ఎదిగారు. అదే వర్గం వారు గౌడను ఓడించి మూడేళ్ల తర్వాత మరో వొక్కలిగ ఎస్‌ఎం కృష్ణను ముఖ్యమంత్రిని చేశారు. అయితే దాదాపు 30 ఏళ్లుగా గౌడ వారి అగ్రనేతగా కొనసాగుతున్నారు.

* మూడు, నాలుగు జిల్లాల్లోనే వొక్కలిగల ఆధిపత్యం

స్వాతంత్య్రానంతరం కర్ణాటక రాజకీయాలలో లింగాయత్‌లు, వొక్కలిగలు అనే రెండు వర్గాల ఆధిపత్యం కొనసాగుతోంది. దాదాపుగా వారే పాలనలో కొనసాగుతున్నారు. కర్ణాటక మొత్తం లింగాయత్‌ల ఉనికి ఉంది. వొక్కలిగలు (అక్షరాలా అర్థం 'రైతు') పాత మైసూర్ ప్రాంతంలో కేంద్రీకృతమైన వర్గం. కేవలం మూడు - నాలుగు జిల్లాల్లోనే ఈ వర్గం ఎక్కువగా ఉంది.

ఈ 100% వ్యవసాయ సంఘంలో కొంతమంది మధ్యయుగ అధిపతులు ఉన్నారు. వీరిలో బెంగళూరు వ్యవస్థాపకుడు కెంపె గౌడ ప్రముఖులు. బ్రిటీష్ వారి పాలనలో మైసూర్ రాజుల పాలనలో, వొక్కలిగలు వ్యవసాయానికి మాత్రమే పరిమితమయ్యారు. అక్షరాస్యత స్థాయి, రాజకీయ భాగస్వామ్యం అధ్వాన్నంగా ఉన్నాయి. 1947లో స్వాతంత్ర్యం అన్నింటినీ మార్చివేసింది. కర్ణాటక సామాజిక-రాజకీయ జీవితంలో వొక్కలిగాలు కీలక పాత్రధారులుగా మారారు.

* కర్ణాటక సమైక్య ఉద్యమం

1947, 1956 మధ్య, కన్నడ మాట్లాడే ప్రాంతాలన్నీ ఒకే రాష్ట్రం కింద పునరేకీకరించబడే వరకు, వొక్కలిగాలు పాత మైసూర్ రాష్ట్రంలో అధికారాన్ని నియంత్రించేవారు. రాష్ట్ర పునర్వ్యవస్థీకరణ వారిని ఉత్తర కర్ణాటకలో ఆధిపత్య కులంగా ఉన్న, పాత మైసూర్‌లో గణనీయమైన జనాభా ఉన్న లింగాయత్‌ల ఆధిపత్యాన్ని అంగీకరించేలా చేసింది.

ఇది కూడా చదవండి : మహారాష్ట్రలో మరో నగరం పేరు మార్పు.. బీజేపీ సరికొత్త డిమాండ్

1950వ దశకం ప్రారంభంలో, కర్ణాటక ఏకీకరణ ఆందోళన (కర్ణాటక సమైక్య ఉద్యమం) ఉధృతంగా ఉన్న సమయంలో వొక్కలిగ కులానికి చెందిన అగ్రనేతలు తమ భవిష్యత్తు కార్యాచరణను నిర్ణయించుకోవడానికి సెంట్రల్ బెంగళూరులోని ఒక ఇంటిలో సమావేశమయ్యారు. వీరంతా కాంగ్రెస్ నాయకులు, స్వాతంత్య్ర ఉద్యమంలో పాల్గొన్నవారు. చాలా మందికి నిష్కళంకమైన వ్యక్తిగత ఆధారాలు ఉన్నాయి. కానీ వారిలో ఎక్కువ మంది కన్నడ మాట్లాడే ప్రాంతాలన్నింటినీ ఒకే పరిపాలన కింద ఏకం చేయడం పట్ల పెద్దగా ఉత్సాహం చూపలేదు. అందుకు వారికి చాలా కారణాలున్నాయి.

మహారాజా మైసూర్ లేదా పాత మైసూర్ ఇప్పటికే బాగా అభివృద్ధి చెందిన రాష్ట్రంగా ఉందని, పేద ముంబై - కర్ణాటక మరియు హైదరాబాద్ - కర్ణాటక ప్రాంతాలను విలీనం చేయడం వల్ల రాష్ట్ర ఖజానా, వనరులపై భారం పడుతుందని కొందరు వాదించారు. కన్నడ మాట్లాడే ప్రాంతాలన్నీ ఏకమైతే, వొక్కలిగలు తమ కుల ఆధిపత్యాన్ని కోల్పోతారని, లింగాయత్ ఆధిపత్యానికి మార్గం సుగమం అవుతుందని మరి కొందరు వాదించారు. రాష్ట్రంలోని రెండు అత్యంత శక్తివంతమైన కులాలు అప్పుడు కూడా ఒకరినొకరు జాగ్రత్తగా చూసుకున్నారు.

ఇది కూడా చదవండి : Modi: దేశానికి కొత్త గుర్తింపు తెస్తున్న నగరాలు! మ్యాన్ హోల్ నుంచి మెషీన్ హోల్!

అయితే అప్పటి పాత మైసూర్ రాష్ట్ర ముఖ్యమంత్రి కెంగల్ హనుమంతయ్య రాష్ట్ర ఏకీకరణకు పూనుకున్నారు. స్వాతంత్ర్య సమరయోధుడు, సమర్ధుడైన నిర్వాహకుడు, హనుమంతయ్య వొక్కలిగాలకు పెద్ద నాయకుడు. కుల, రాజకీయ కారణాలతో ఏకీకరణను వ్యతిరేకిస్తే భావి తరాల కన్నడిగులు వారిని ఎప్పటికీ క్షమించరని హునుమంతయ్య తన సొంత కుల నేతలను వీటో చేశారు. బొంబాయి ప్రెసిడెన్సీలోని కన్నడ మాట్లాడే ప్రాంతాలతో కూడిన ఏకీకరణ ఉద్యమం, కొత్త మైసూర్ రాష్ట్రం వెనుక వొక్కలిగ నాయకుడు తన బలాన్ని ప్రదర్శించాడు. ప్రస్తుత కర్ణాటకలోని కొన్ని జిల్లాలు, నిజాం యొక్క హైదరాబాద్, కర్ణాటక, మద్రాసు ప్రెసిడెన్సీ, స్వతంత్ర, చిన్న రాష్ట్రం కొడగు (కూర్గ్) 1956 నవంబర్ 1న ఏర్పాటైంది.

* మైసూర్ రాష్ట్రానికి మొదటి ముఖ్యమంత్రి నిజలింగప్ప

దురదృష్టవశాత్తు, కెంగల్ హనుమంతయ్య అధికారాన్ని కోల్పోయారు. లింగాయత్ బలమైన వ్యక్తి S నిజలింగప్ప కొత్త మైసూర్ రాష్ట్రానికి మొదటి ముఖ్యమంత్రిగా బాధ్యతలు చేపట్టారు. ఊహించినట్లుగానే, వొక్కలిగలు ముఖ్యమంత్రి కుర్చీని కోల్పోయారు. వారు తిరిగి కుర్చీని కైవసం చేసుకోవడానికి 38 సంవత్సరాలు వేచి ఉండవలసి వచ్చింది. 1994లో హెచ్‌డి దేవెగౌడ ఉమ్మడి కర్ణాటకకు మొదటి వొక్కలిగ ముఖ్యమంత్రి అయ్యారు.

1956, 1972 మధ్య, నలుగురు లింగాయత్ ముఖ్యమంత్రులు (S నిజలింగప్ప, B D జట్టి, S R కాంతి, వీరేంద్ర పాటిల్) రాష్ట్రాన్ని పాలించారు. 1972, 1983 మధ్య, క్షత్రియుడైన డి దేవరాజ ఉర్స్, బ్రాహ్మణుడైన ఆర్ గుండూరావు లింగాయత్ మద్దతుతో రాష్ట్రాన్ని పాలించారు. 1983లో కర్ణాటక మొదటి కాంగ్రెసేతర ముఖ్యమంత్రి అయిన రామకృష్ణ హెగ్డే బ్రాహ్మణుడైనప్పటికీ మకుటం లేని లింగాయత్ నాయకుడిగా గుర్తింపు తెచ్చుకొన్నారు.

* వొక్కలిగలకు తప్పని ఎదురుచూపులు

హెగ్డే పాలనను అంతం చేయడానికి, అప్పటి ప్రధానమంత్రి, కాంగ్రెస్ అధ్యక్షుడు రాజీవ్ గాంధీ 1989లో లింగాయత్ ప్రముఖుడు వీరేంద్ర పాటిల్‌ను KPCC అధ్యక్షుడిగా, ముఖ్యమంత్రి అభ్యర్థిగా చేశారు. ఆయన నాయకత్వంలో, 224 సభ్యుల సభలో కాంగ్రెస్ 181 స్థానాలను గెలుచుకుంది. కానీ పాటిల్‌ స్థానంలో కాంగ్రెస్ ఇద్దరు వెనుకబడిన తరగతి (OBC) నాయకులు S బంగారప్ప, M వీరప్ప మొయిలీకి అవకాశాలు ఇచ్చింది. వొక్కలిగలు 1994 వరకు వేచి ఉండవలసి వచ్చింది.

* కులరహిత ఉద్యమం నుంచి పుట్టిన లింగాయత్‌

లింగాయత్ విశ్వాసం 12వ శతాబ్దపు బ్రాహ్మణ బసవన్న నేతృత్వంలోని కులరహిత, సమానత్వ సమాజం కోసం జరిగిన ఉద్యమం నుంచి పుట్టింది. అతని అనుచరులు తరువాతి శతాబ్దాలలో కన్నడ మాట్లాడే ప్రాంతాల నలుమూలలకు తీసుకువెళ్లారు. వారు వొక్కలిగ హృదయప్రాంతమైన పాత మైసూర్‌కు కూడా వచ్చారు, అనేక నిమ్న కులాలు, అంటరానివారు కొత్త విశ్వాసాన్ని స్వీకరించారు. కానీ భూస్వామ్య వర్గానికి చెందిన వొక్కలిగాలు దీనికి దూరంగా ఉన్నారు. అయినప్పటికీ ఇద్దరి మధ్య ఎటువంటి ఘర్షణ జరిగిన దాఖలాలు లేవు. శతాబ్దాలుగా అది సామరస్యపూర్వకమైన సహజీవనంగా కొనసాగుతోంది.

SM కృష్ణ, యువ విద్యావంతులైన వొక్కలిగ 1954లో ఫుల్‌బ్రైట్ స్కాలర్‌షిప్ పొందారు. ఉన్నత విద్యను అభ్యసించడానికి అమెరికా వెళ్లారు. అనేక ఇతర యువ వొక్కలిగాలు కూడా అతనిని అనుసరించారు. 1960వ దశకంలో, ఆది చుంచనగిరి మఠాన్ని సృష్టించడం, ఒక జ్ఞానమూర్తికి అభిషేకం చేయడం వల్ల అనేక ఉప కులాలు ఒకే మతం కిందకు వచ్చాయి. వొక్కలిగ రాజకీయ నాయకుల అండదండలతో మఠం వేగంగా విస్తరించి బీభత్సంగా మారింది. ఎన్నికల సమయంలో, రాజకీయ నాయకులందరూ మద్దతు కోరుతూ మఠానికి వెళతారు. దక్షిణ కర్ణాటక రాజకీయాలు, సామాజిక జీవితంలో ఇది పెద్ద పాత్ర పోషిస్తుంది.

* 11 శాతమున్న వొక్కలిగలు

లీక్ అయిన కుల గణన డేటా ప్రకారం.. వొక్కలిగ జనాభా మొత్తం కర్ణాటక జనాభాలో 11 శాతం. ఎస్సీలు, ముస్లింలు, లింగాయత్‌ల తర్వాత వారు నాలుగో స్థానంలో ఉన్నారు. అయితే ఈ డేటాను వొక్కలిగాలు, లింగాయత్‌లు వివాదాస్పదం చేశారు. వొక్కలిగాలు వారి సంఖ్య చాలా ఎక్కువగా ఉందని, 16 శాతంగా ఉన్నామని పేర్కొన్నారు. వొక్కలిగాలు దాదాపు 80 అసెంబ్లీ స్థానాల్లో ఎన్నికల ఫలితాలను నిర్ణయిస్తారు. దాదాపు 50 అసెంబ్లీ నియోజకవర్గాల్లో వారు ఆధిపత్య శక్తిగా ఉన్నారు. 2018లో దాదాపు 42 వొక్కలిగలు అసెంబ్లీ ఎన్నికల్లో విజయం సాధించారు. వీరిలో 23 మంది జేడీఎస్‌కు చెందిన వారు. వొక్కలిగ హెచ్‌డి కుమారస్వామి 14 నెలల పాటు కాంగ్రెస్ మద్దతుతో ముఖ్యమంత్రి అయ్యారు.

స్వాతంత్య్రానంతరం లింగాయత్‌లు, వొక్కలిగలు కాంగ్రెస్‌కు మద్దతు ఇచ్చారు. ఇది 1972 తర్వాత మారిపోయింది. అప్పటి కాంగ్రెస్ ముఖ్యమంత్రి డి దేవరాజ్ ఉర్స్, ఒక క్షత్రియుడు. ఆయన ఇతర వెనుకబడిన తరగతులు, SC/STలు, ముస్లింల నేతగా మారారు. ఈ రెండు కులాల రాజకీయ ఆధిపత్యాన్ని నియంత్రించారు. 1983లో కూటమిగా ఏర్పడి కాంగ్రెస్ ప్రభుత్వాన్ని గద్దె దించారు. 1983, 1989 మధ్య, జనతా పార్టీ ప్రభుత్వం ప్రధానంగా లింగాయత్ - వొక్కలిగ ప్రభుత్వం వచ్చింది. మళ్లీ 1994లో కాంగ్రెస్‌ను ఓడించేందుకు ఈ రెండు కులాలు ఒక్కటయ్యాయి. 1989లోనే ఇద్దరూ కాంగ్రెస్‌కు మద్దతు పలికారు. గతంలో తమ రాజకీయ ఆధిపత్యానికి ముప్పు వచ్చినప్పుడల్లా ఈ రెండు కులాలు తమ విభేదాలను పూడ్చిపెట్టి ఉమ్మడి శత్రువుకు వ్యతిరేకంగా ఓటు వేసేవి.

* ఎవరు ఎటువైపు?

హెచ్‌డి దేవెగౌడ ప్రస్తుతం 90 ఏళ్ల వయసులో అనారోగ్యంతో ఉన్నారు. తన వారసత్వాన్ని కాపాడుకోవడానికి, కుటుంబం నడుపుతున్న జేడీఎస్‌కు ఆయన నాయకత్వం వహిస్తున్నారు. బీఎస్ యడియూరప్ప ఎన్నికల రాజకీయాల నుంచి వైదొలగడంతో, లింగాయత్ సామాజికవర్గం ఇతర అవకాశాల కోసం వెతుకుతోంది. అయినప్పటికీ బీజేపీ వాటిని చెక్కుచెదరకుండా ఉంచడానికి ప్రయత్నిస్తోంది. ప్రధానంగా ఓబీసీలు, ఎస్సీలు, ముస్లింల పార్టీ అయిన కాంగ్రెస్ వచ్చే అసెంబ్లీ ఎన్నికల్లో గణనీయమైన సంఖ్యలో లింగాయత్‌లు, వొక్కలిగలు తమకు మద్దతు ఇస్తారని ఆశిస్తోంది.

కేపీసీసీ అధ్యక్షుడు డీకే శివకుమార్‌ వొక్కలిగ, ప్రచార కమిటీ చైర్మన్‌ ఎంబీ పాటిల్‌ లింగాయత్‌. అయితే రాష్ట్రంలో అత్యంత ప్రజాదరణ కలిగిన నాయకుడైన సిద్ధరామయ్య పట్ల ఈ రెండు కులాలు ఇప్పటికీ అప్రమత్తంగానే ఉన్నాయి. అతని నిరాడంబరమైన AHINDA(OBCలు, SC/STలు, మైనారిటీలు) కార్డు వారిని బాధించింది. కాంగ్రెస్ కనీసం 30% ఓట్లు (లింగాయత్‌లు, వొక్కలిగలు) పొందితే తప్ప అధికారంలోకి వచ్చే అవకాశం లేదు.

కఠినమైన ఎన్నికల్లో పోరాడుతున్న అధికార బీజేపీ, వొక్కలిగలు గౌడ కులస్తులు (జేడీఎస్)తో కలిసి కాంగ్రెస్ ఓటమిని ఖాయమని భావిస్తోంది. వేసవిలో విధానసౌధను చేజిక్కించుకునేందుకు గౌడ కోటను బద్దలు కొట్టేందుకు కాంగ్రెస్ సర్వశక్తులు ఒడ్డుతోంది. అరడజను మంది ముఖ్యమైన వొక్కలిగ నాయకులను కలిగి ఉన్న బీజేపీ ఆ సంఘం ఎవరి గుత్తాధిపత్యం కాదని, గణనీయమైన సంఖ్యలో కాషాయ పార్టీతో ఉందని వాదిస్తోంది. ఓట్ల లెక్కింపు పూర్తయితే గానీ వొక్కలిగలు ఎటువైపు మొగ్గారో తెలియదు.

తెలుగు వార్తలు, తెలుగులో బ్రేకింగ్ న్యూస్ న్యూస్ 18‌లో చదవండి. రాష్ట్రీయ, జాతీయ, అంతర్జాతీయ, టాలీవుడ్, క్రీడలు, బిజినెస్, ఆరోగ్యం, లైఫ్ స్టైల్, ఆధ్యాత్మిక, రాశిఫలాలు చదవండి.

Tags: Bjp, Congress, Jds, Karnataka, Karnataka Politics