• Home
  • »
  • News
  • »
  • international
  • »
  • SCIENTISTS DEVELOPED NUCLEAR POWERED ROCKETS THAT COULD GET ASTRONAUTS TO MARS IN JUST 3 MONTHS MS GH

Nuclear Powered Rocket: న్యూక్లియర్ పవర్‌తో పనిచేసే రాకెట్లపై ప్రయోగాలు.. దీంట్లో అంగారకుడి మీదకు 3 నెలల్లోనే చేరొచ్చు

ప్రతీకాత్మక చిత్రం

అమెరికాకు చెందిన అల్ట్రా సేఫ్ న్యూక్లియర్ టెక్నాలజీస్ (USNC-టెక్) కంపెనీ కూడా ఈ పరిశోధనల్లో భాగమైంది. కేవలం మూడు నెలల్లోనే భూమి నుంచి అంగారకుడి మీదకు మనుషులను తీసుకువెళ్లే న్యూక్లియర్ థర్మల్ ప్రొపల్షన్ (NTP) ఇంజిన్‌ తయారీపై ఈ సంస్థకు చెందిన పరిశోధకులు దృష్టి పెట్టారు.

  • News18
  • Last Updated :
  • Share this:
న్యూక్లియర్ పవర్‌తో పనిచేసే రాకెట్‌ సాయంతో అంగారకుడి మీదకు వెళ్లేందుకు ప్రైవేటు ఏరోస్పేస్‌ కంపెనీలు ప్రయోగాలు చేస్తున్నాయి. అమెరికా అంతరిక్ష పరిశోధన సంస్థ నాసా కూడా ఈ టెక్నాలజీపై పనిచేస్తోంది. ఇలాంటి రాకెట్‌లు తక్కువ సమయంలో నిర్దేశించిన లక్ష్యాలను పూర్తి చేయగలవని నిపుణులు చెబుతున్నారు. 2035 నాటికి అంగారక గ్రహంపైకి మనుషులను తీసుకెళ్లాలని నాసా లక్ష్యంగా పెట్టుకుంది. కానీ ఈ గ్రహం మనకు 140 మిలియన్ మైళ్ల దూరంలో ఉంది. అంటార్కిటికా కన్నా శీతల వాతావరణం అక్కడ ఉంటుంది. ఆక్సిజన్ కూడా లేని ఆ గ్రహాన్ని వ్యోమగాములు చేరుకోవడం కష్టమైన విషయం. వ్యోమగాములు రాకెట్‌లో అక్కడికి చేరుకోవడానికి చాలా సమయం పడుతుంది. వారు అక్కడ ఎన్ని ఎక్కువ రోజులు ఉంటే, వారికి ప్రమాదం కూడా అంతే ఎక్కువగా ఉంటుంది. అందుకే ప్రయాణ సమయాన్ని తగ్గించడంపై శాస్త్రవేత్తలు పరిశోధనలు చేస్తున్నారు.

అమెరికాకు చెందిన అల్ట్రా సేఫ్ న్యూక్లియర్ టెక్నాలజీస్ (USNC-టెక్) కంపెనీ కూడా ఈ పరిశోధనల్లో భాగమైంది. కేవలం మూడు నెలల్లోనే భూమి నుంచి అంగారకుడి మీదకు మనుషులను తీసుకువెళ్లే న్యూక్లియర్ థర్మల్ ప్రొపల్షన్ (NTP) ఇంజిన్‌ తయారీపై ఈ సంస్థకు చెందిన పరిశోధకులు దృష్టి పెట్టారు. ప్రస్తుతం ఒక మానవరహిత అంతరిక్ష నౌక అంగారకుడి మీదకు వెళ్లేందుకు కనీసం ఏడు నెలల పాటు ప్రయాణించాల్సి ఉంటుంది. కానీ ఒక క్రూడ్ మిషన్‌కు కనీసం తొమ్మిది నెలలు పడుతుందని శాస్త్రవేత్తలు భావిస్తున్నారు. దీన్ని మూడు నెలలకు తగ్గించేందుకు ప్రయోగాలు చేస్తున్నారు.

న్యూక్లియర్ రాకెట్‌తో సాధ్యమే...

అంతరిక్ష పరిశోధనలకు న్యూక్లియర్ రాకెట్ ఇంజిన్ టెక్నాలజీపై ఆధారపడాలని నిపుణులు భావిస్తున్నారు. ప్రస్తుతం ఉపయోగిస్తున్న కెమికల్ ఇంజిన్స్‌తో పోలిస్తే న్యూక్లియర్ పవర్‌తో పనిచేసే ఇంజిన్లకు రెండింతలు ఎక్కువ సామర్థ్యం ఉంటుందని USNC-టెక్‌లో ఇంజనీరింగ్ డైరెక్టర్‌గా పనిచేస్తున్న మైకెల్ ఈడెస్ తెలిపారు. వీటి ద్వారా తక్కువ ఇంధనంతో వేగంగా ప్రయాణించవచ్చని చెప్పారు. ఈ ప్రయోగం విజయవంతమైతే అంతరిక్షంలోకి మనుషులను పంపించడం సులభం అవుతుందన్నారు. అంతరిక్ష రంగంలో వ్యాపార అవకాశాలు కూడా మెరుగవుతాయని వివరించారు.

ప్రయాణ వేగం పెరుగుతుంది..

ప్రస్తుతం అంతరిక్ష ప్రయోగాలకు వాడుతున్న రాకెట్లు కెమికల్ ఇంజన్ల ద్వారా పనిచేస్తున్నాయి. వీటి సాయంతో అంగారకుడి మీదకు వెళ్లడానికి చాలా కాలం పడుతుంది. ఒక రౌండ్ ట్రిప్‌కు కనీసం మూడేళ్లు పడుతుందని నాసా స్పేస్ టెక్నాలజీ మిషన్ డైరెక్టరేట్ చీఫ్ ఇంజనీర్ జెఫ్ షీ చెబుతున్నారు. ప్రయాణ సమయాన్ని తగ్గించడం ద్వారా వేగంగా అక్కడికి చేరుకోవచ్చని ఆయన తెలిపారు. దీనివల్ల వ్యోమగాములపై స్పేస్ రేడియేషన్‌ ప్రభావంతో పాటు మిషన్ ఓవరాల్ రిస్క్‌ కూడా తగ్గుంతుందన్నారు.

ఎలా పనిచేస్తుంది..?

NTP సిస్టమ్‌లో యురేనియంను మండించడం ద్వారా శక్తి విడుదలవుతుంది. ఇందుకు ఒక న్యూక్లియర్ రియాక్టర్‌ను వాడాల్సి ఉంటుంది. ఈ ఉష్ణశక్తి లిక్విడ్ హైడ్రోజన్ వంటి ప్రొపెల్లెంట్‌ను వేడి చేస్తుంది. దీనివల్ల విడుదలయ్యే గ్యాస్ రాకెట్‌కు ఇంధనంగా ఉపయోగపడుతుంది. కెమికల్ సిస్టమ్‌తో పోలిస్తే, NTP రాకెట్లు ప్రొపెల్లెంట్ యూనిట్‌కు రెట్టింపు థ్రస్ట్‌ను ఉత్పత్తి చేస్తాయి. దీంతో ఎక్కువ వేగంతో ప్రయాణం సాధ్యమవుతుంది. ఈ టెక్నాలజీని ఉపయోగించి రెండేళ్లలోనే అంగారకుడి మీదకు వ్యోమగాములు వెళ్లి, తిరిగి భూమికి చేరుకోవచ్చు.

అంత సులభం కాదు...

NTP ఇంజిన్‌ను అభివృద్ధి చేయడానికి న్యూక్లియర్ థర్మల్ ఇంజిన్లో ఎక్కువ ఉష్ణోగ్రతల వద్ద యూరేనియంను ఇంధనంగా వాడుకోవడం పెద్ద సవాలుగా మారనుంది. ఈ సమస్యను తాము అధిగమించామని USNC-టెక్ కంపెనీ చెబుతోంది. ఇందుకు 2,700 డిగ్రీల కెల్విన్ (సుమారు 4,400 డిగ్రీల ఫారెన్ హీట్) ఉష్ణోగ్రతల్లో పనిచేసే ఫ్యూయల్‌ను అభివృద్ధి చేశామని ఆ సంస్థకు చెందిన నిపుణులు చెబుతున్నారు. ఈ ఫ్యూయల్‌లో సిలికాన్ కార్బైడ్ ఉంటుంది. దీన్ని ఫ్యూయల్ ట్యాంకు కవచాల్లో ఉపయోగిస్తారు. ఇది థర్మల్ రియాక్టర్ నుంచి రేడియోయాక్టివ్ ప్రొడక్ట్స్ లీక్ అవ్వకుండా నిరోధిస్తూ, వ్యోమగాములను రక్షిస్తుంది. ఈ టెక్నాలజీపై సాధించిన పురోగతి గురించి USNC-టెక్ నాసాకు తెలిపింది.

ఎంతవరకు సురక్షితం...?

తక్కువ సమయంలో పూర్తయ్యే మిషన్ల వల్ల స్పేస్ రేడియేషన్‌కు దూరంగా ఉండవచ్చు. కానీ వ్యోమనౌక లోపల ఉండే న్యూక్లియర్ రియాక్టర్ నుంచి విడుదలయ్యే రేడియేషన్‌పై అనుమానాలు వ్యక్తమవుతున్నాయి. రాకెట్ డిజైన్ ద్వారా రేడియేషన్ బారిన పడకుండా కాపాడుకోవచ్చని ఈడెస్ చెబుతున్నారు. స్పేస్‌క్రాఫ్ట్‌లోని ఇంజిన్, క్రూ ఏరియా మధ్య ఉండే ఖాళీ ప్రాంతంలో లిక్విడ్ ప్రొపెల్లెంట్‌లను నిల్వచేయవచ్చు. ఇవి రేడియోయాక్టివ్ కణాలను నిరోధిస్తూ, లోపల ఉన్నవారు రేడియేషన్ బారిన పడకుండా ఒక కవచంగా పనిచేస్తాయి. రాకెట్ చివర్లో రియాక్టర్ ఉండేలా డిజైన్‌ చేయడం వల్ల ప్రమాదాలు జరగకుండా చూడవచ్చు. ముందు కెమికల్ ఇంజిన్‌తో రాకెట్‌ను భూ కక్ష్య దాటించిన తరువాత, రికాక్టర్‌ను మండించి NTP వ్యోమనౌక వేగాన్ని పుంజుకుంటుంది. ఊహించని ప్రమాదాలు జరగకుండా ఈ ఏర్పాట్లు చేస్తున్నట్లు ఈడెస్ వివరించారు.

ఆ అవసరాలకు కూడా..

అంగారకుడి మీదకు ఐదు నుంచి తొమ్మిది నెలల్లో వ్యోమనౌకను తీసుకెళ్లాలని USNC-టెక్ లక్ష్యంగా పెట్టుకుంది. కానీ న్యూక్లియర్ పవర్ టెక్నాలజీ సాయంతో ఈ ప్రయాణ సమయాన్ని కేవలం 90 రోజులకే పరిమితం చేయగలమని ఈడెస్ చెప్పారు. తమ సంస్థ ఈ టెక్నాలజీని NASA, రక్షణ శాఖ వంటి ప్రభుత్వ సంస్థలతో పంచుకునేందుకు, స్పేస్ టూరిజంను అభివృద్ధి చేసేందుకు సిద్ధంగా ఉందన్నారు.
Published by:Srinivas Munigala
First published: